Ад родных ніў у Слуцк на свята

...з'ехаліся майстры-ўмельцы з розных раёнаў Мінскай вобласці. Дзясяткі напрамкаў народнай творчасці былі прадстаўлены тут лепшымі аўтарамі.

Капыльскія і старадарожскія ручнікі, лагойская і івянецкая кераміка, клецкае і маладзечанскае лозапляценне, вілейская і мядзельская разьба па дрэве — усё гэта шматкаляровым кірмашом размясцілася на цэнтральнай плошчы горада і суседніх вуліцах.

Абласное свята праводзілася згодна з Дзяржаўнай праграмай адраджэння тэхналогій і традыцый вырабу слуцкіх паясоў і развіцця вытворчасці нацыянальнай сувенірнай прадукцыі «Слуцкія паясы» на 2012-2015 гады. Добрым сімвалам фэсту стала навінка вулічнай скульптуры — фігура маладога ткача, абагульнены вобраз майстроў, якія ў ХVІІІ-ХІХ ст. выраблялі шаўковыя паясы з залатымі і сярэбранымі ніткамі на мануфактуры князя Радзівіла.

На свяце кожны меў магчымасць паспрабаваць сябе ў старажытных рамёствах: вопытныя ўмельцы праводзілі майстар-класы пляцення традыцыйных беларускіх паясоў, у межах свята адбыўся конкурс «Беларуская лялька», дзе навучэнцы гурткоў і студый пазнаёмілі са сваёй творчасцю.

Святочны настрой удзельнікаў і гасцей свята спалучаўся з дзелавой атмасферай рэспубліканскай навукова-практычнай канферэнцыі «Беларускія паясы: гістарычныя шляхі развіцця і сучасная практыка». Вучоныя і спецыялісты-практыкі акрэслілі для сваёй размовы шырокае праблемнае поле. Галоўная ўвага была накіравана на гісторыка-мастацтвазнаўчы кантэкст. Абмяркоўвалі пытанні абрадавых функцый паясоў і месца іх у вусна-паэтычнай і літаратурнай творчасці. Даводзілі цікавыя звесткі пра значнасць пояса ў культуры славянскіх народаў, пра мануфактурную вытворчасць мастацкіх тканін на Беларусі.

Яўген ПЯСЕЦКІ. Фота аўтара.