Вы тут

КАМУ КОЛАС КЛАНЯЕЦЦА


Жлобін сёння проста не пазнаць. Да фестывалю-кірмашу «Дажынкі» ён так змяніў аблічча, што здаецца наноў адбудаваным па самых сучасных еўрапейскіх узорах. Апошнія паўгода ў горадзе работа кіпела не менш актыўна, чым улетку на палях краіны. Было абноўлена ці пабудавана больш за 300 аб'ектаў.

На іх рэканструкцыі і будаўніцтве штодзённа былі заняты больш за дзве тысячы будаўнікоў, вялікую дапамогу аказвалі работнікі мясцовых прадпрыемстваў. Жыхары горада штотыдзень праводзілі суботнікі, на якія таксама выязджалі працоўныя дэсанты з іншых гарадоў вобласці. Можна сказаць, што ў падрыхтоўцы да «Дажынак» прымала ўдзел уся Гомельшчына.

Змянілася цэнтральная плошча, з'явілася новая гасцініца, дабудавана зала гульнявых відаў спорту, разлічаная на 1,5 тысячы месцаў, Палац металургаў набыў новы твар. З аднаго боку ад яго ўзведзены парк, названы «Пяць стыхій», з другога зроблена пляцоўка з каскадам азёр. Дарэчы, галоўная канцэртная пляцоўка свята ўраджаю ўсталявана якраз у гэтым прыгожым месцы. Новы імідж з'явіўся і ў старой часткі горада, так званага Бульвара металургаў. На ўваходзе — герб горада Жлобіна: каваная з медзі ладдзя, якая ўзвышаецца на высокім пастаменце.

1380318700586_1

Да рэспубліканскага фэстывалю-кірмашу «Дажынкі-2013» цалкам абноўлена асфальтавае пакрыццё на многіх кіламетрах гарадскіх вуліц, заменены цеплатрасы і водаправоды, пашыраны магістральныя дарогі, выкладзены дзясяткі новых пешаходных дарожак, пабудавана шмат парковак. Рэканструяваны аўтавакзал стаў цяпер быццам адным цэлым з чыгуначным вакзалам і прывакзальнай плошчай. Акрамя таго, пракладзена чатырохпалосная траса М-5, а таксама электрафікавана частка чыгункі. Такім чынам, Жлобін ва ўсіх сэнсах стаў значна бліжэй як да абласнога цэнтра, так і да сталіцы краіны.

Рэспубліканскі фестываль-кірмаш «Дажынкі-2013» сабраў некалькі тысяч лепшых працаўнікоў вёскі. Тэатралізаванае шэсце, якое прайшло па цэнтры горада металургаў, распачало свята, а дождж, які пачаўся якраз падчас шэсця, механізатары палічылі добрай прыкметай. Шмат людзей з самай раніцы прыйшло ў цэнтр горада, дзе адбываюцца асноўныя мерапрыемствы «Дажынак-2013». Галоўным сімвалам фестывалю стаў хлебны каравай вагой 200 кілаграмаў, які выпеклі майстры прадпрыемства «Гомельхлебпрам». Гэты кулінарны шэдэўр пранеслі падчас шэсця пераможцаў рэспубліканскага спаборніцтва па ўборцы збожжавых і нарыхтоўцы кармоў. Вышыня пяціяруснага сімвала свята склала два метры.

1380318702790_2

У першы дзень свята віцэ-прэм'ер Беларусі Міхаіл Русы і старшыня Гомельскага аблвыканкама Уладзімір Дворнік наведалі стылізаваныя падворкі раёнаў Гомельскай вобласці. На цырымоніі ўручэння другіх і трэціх прэмій пераможцам рэспубліканскага спаборніцтва па ўборцы ўраджаю 2013 года віцэ-прэм'ер Беларусі Міхаіл Русы адзначыў, што беларуская зямля ў любых умовах надвор'я можа стабільна даваць добры ўраджай збожжа і іншай сельгаспрадукцыі.

Увесь Жлобін стаў вялікай канцэртна-мастацкай пляцоўкай, дзе сваё мастацтва дэманструюць больш за 2 тысячы прафесійных і самадзейных артыстаў і майстроў народнай творчасці. Праграма мерапрыемстваў вельмі разнажанравая — ад выступленняў дзіцячых вакальных і харэаграфічных калектываў і ансамбля «Песняры» да «бітвы» дыджэяў і лазернага шоу. У мерапрыемствах удзельнічаюць народная артыстка Украіны Таісія Павалій, групы «Беларусы» і «Тяни-толкай», Аляксандр Ціхановіч і Ядзвіга Паплаўская, Алена Ланская, Жанет, іншыя вядомыя айчынныя выканаўцы, артысты Гомельскай філармоніі...

1380318705877_3

Арганізатары падрыхтавалі асобную праграму для моладзі, якая з задавальненнем назірае за паказальнымі выступленнямі па каратэ і акрабатыцы, ролераў і скейтбардзістаў... Прадстаўнікі ўсіх абласцей Беларусі прымаюць удзел у цыркавым фестывалі. Мерапрыемствы культурнай праграмы на працягу дня не спыняліся ні на хвіліну — ад самага ранку і практычна да ночы падтрымліваючы атмасферу свята.

Сярод відовішчаў, што прыцягвалі асаблівую ўвагу жыхароў і гасцей горада над Дняпром, — фестывалі дзіцячай цацкі, графіці, мотар-шоу... Дарэчы, і паласавацца было чым. На вуліцах горада ўзведзена больш за 400 павільёнаў, а таксама абсталяваны вулічныя кавярні на 8,5 тысячы месцаў. Удзельнікаў і гасцей абслугоўваюць больш за 200 гандлёвых арганізацый з усіх абласцей Беларусі (працягласць гандлёвых радоў склала каля 7 км). Арганізаваны тэматычныя экспазіцыі: «Падворак паляўнічага», «Прыпяцкі рыбалоў», «Беларускія прысмакі». Між іншым, на свяце «Дзеруны-Фэст», якое адбылося ў межах агульнага фестывалю, за 11 хвілін было з'едзена 900 дранікаў. Іх прыгатавалі ў падарунак гасцям «Дажынак» настаўнікі і навучэнцы Гомельскага кулінарнага каледжа.

Удзельнікі і госці фестывалю яшчэ доўга будуць дзяліцца незабыўнымі ўражаннямі, якія яны атрымалі на свяце «Дажынкі-2013» у Жлобіне.

Ірына АСТАШКЕВІЧ.


Выбар рэдакцыі

Грамадства

Камфортнае жыллё і спрыяльнае асяроддзе. Аднайменная дзяржпраграма дазволіць павысіць якасць камунальных паслуг і наблізіць да Мэты-99

Камфортнае жыллё і спрыяльнае асяроддзе. Аднайменная дзяржпраграма дазволіць павысіць якасць камунальных паслуг і наблізіць да Мэты-99

Днямі аб праекце профільнай дзяржпраграмы журналістам падчас прэс-прэзентацыі расказаў міністр жыллёва-камунальнай гаспадаркі Андрэй Хмель.

Эканоміка

Якія асноўныя паказчыкі і параметры закладвае Магілёўшчына ў сваю рэгіянальную праграму развіцця?

Якія асноўныя паказчыкі і параметры закладвае Магілёўшчына ў сваю рэгіянальную праграму развіцця?

Пра гэта ў нашай гутарцы з намеснікам старшыні Магілёўскага аблвыканкама Русланам Страхаром.

Эканоміка

Разбіраем інвестпраграму Мінска на бягучы год

Разбіраем інвестпраграму Мінска на бягучы год

Яна ў гэтым годзе на 20 % «таннейшая», чым у папярэднім.

Культура

Бландзінкі за шпільцішам. Карэспандэнт «Звязды» зазірнуў углыб аргана

Бландзінкі за шпільцішам. Карэспандэнт «Звязды» зазірнуў углыб аргана

Прыгажуні-гераіні паралельна — выкладчыцы Віцебскага дзяржаўнага музычнага каледжа імя Салярцінскага.