5 кастрычніка а 18-й гадзіне ў Віцебску ў культурна-гістарычным комплексе «Залатое кола Віцебска «Дзвіна» пройдзе дабрачынны баль у стылі ХІХ стагоддзя. Усе сродкі ад продажу квіткоў і атрыманыя рэчы (кансервы, корм для жывёл, падсцілкі і г.д.) будуць перададзены гарадскому прытулку для бяздомных жывёл. Квіток на баль каштуе 20 тысяч рублёў. Прытулак для бяздомных жывёл Віцебска быў адкрыты 16 жніўня 2011 года і існуе дзякуючы энтузіязму начальніка ўстановы Наталлі Зубавай, супрацоўнікаў прытулку, валанцёраў. Сёння прытулак перажывае не лепшыя часы. Гэта звязана з недастатковым фінансаваннем, з вялікай колькасцю гадаванцаў, з імкненнем гараджан падкінуць прытулку жывёл, а не забраць іх адтуль. Гэтым балем распачынаецца сезон 2013-2014 гг. у Віцебску, дзе падобныя мерапрыемствы ўжо сталі традыцыйнымі дзякуючы клубу гістарычнай рэканструкцыі «Паўночная вежа» і яго каардынатарам Элі Петрачэнцы і Хрысціне Бондаравай. Баль будзе складацца з двух аддзяленняў: вальсавага і кантраданснага. Прагучаць творы сучасных кампазітараў і аўтараў ХІХ стагоддзя ў жывым выкананні. Вольга ЧАЙКОЎСКАЯ
Канцэрт для дзяцей і моладзі, пластычны спектакль Ягора Дружыніна і «Рок-панарама».