Вы тут

Новая кватэра, стары дом...


Менавіта з жыллёвымі праблемамі давялося разбірацца на прыёме грамадзян старшыні Магілёўскага аблвыканкама Пятру РУДНІКУ.

Шматдзетная маці, якая працуе на прадпрыемстве «Магілёўхімвалакно», звярнулася да кіраўніка вобласці з просьбай дапамагчы разабрацца з ільготамі і фінансавымі магчымасцямі на пабудову новага жылля. Яна мае траіх дзяцей, жыве ў блоку інтэрната, працуе пакаёўкай на базе адпачынку, атрымлівае заробак у 2 мільёны рублёў плюс дапамогу на дзяцей, таму матэрыяльнае становішча гэтай сям'і нельга назваць трывалым.

Дзяржава, вядома, клапоціцца пра новае жыллё для шматдзетных сем'яў, таму жанчына можа быць па-за чаргой уключана ў спіс будаўнічага кааператыву: яна атрымае льготны крэдыт, а большую частку затрачаных на пабудову жылля грошай кампенсуе бюджэт.

Тым не менш, і пры гэтых спрыяльных умовах застаецца сума грошай, якую павінна ўнесці сама сям'я, і гэта не адзін мільён рублёў, і нават не два-тры. Разлічваць шматдзетная маці можа толькі на сябе, таму яна ўважліва слухала парады кіраўнікоў, якія вынікалі з разлікаў, праведзеных тут жа.

Пётр Руднік прапанаваў заяўніцы будаваць меншую па плошчы і колькасці пакояў кватэру, а таксама перавесціся на іншую працу ў «Магілёўхімвалакно», дзе быў бы большы заробак. Сёння прадпрыемства мае патрэбу ў кадрах некаторых спецыяльнасцяў, і пасля перанавучання можна атрымліваць большы заробак і мець, адпаведна, большыя магчымасці — для сябе і сваіх дзяцей.

Губернатар таксама настойліва параіў прадпрыемствам у дачыненні да сваіх лепшых работнікаў, якія маюць патрэбу ў новым жыллі, скарыстацца сістэмай будаўнічага зберагання, якую прапануе Беларусбанк. Для таго, каб атрымаць крэдыт на будаўніцтва, трэба назбіраць на разліковым рахунку 25% ад неабходнай сумы. Якраз яе і можа даць прадпрыемства — як беспрацэнтную пазыку добраму працаўніку. Шляхі вырашэння праблемы ёсць — трэба толькі думаць і працаваць, упэўнены Пётр Руднік.

Быць больш ініцыятыўнымі заклікаў кіраўнік вобласці і іншых заяўнікаў, якія клапоцяцца пра капітальны рамонт свайго дома. На вуліцы Касманаўтаў у Магілёве рамантуюць шмат старых дамоў, але да дома № 4 справа так пакуль і не дайшла. Жыхаркі яго прыйшлі на прыём да Пятра Рудніка, каб спытацца: чаму менавіта іх дом, насуперак ранейшым абяцанням кіраўніцтва гарвыканкама, выкінуты з тытульнага спіса на капітальны рамонт?

Старшыня Магілёўскага гарвыканкама Уладзімір ЦУМАРАЎ растлумачыў, што сёлета гэты дом сапраўды выпаў са спіса, таму што ўлады вырашылі ў 2013 годзе завяршыць усе «даўгабуды» ў капітальным рамонце, а далей пачаць «з чыстага ліста» і не даваць больш пустых абяцанняў, бо грошай у бюджэце на ўсё не хапае. З гэтай прычыны ў спіс наступнага года на капрамонт у Магілёве трапляюць толькі два дзясяткі дамоў, і сярод іх якраз будзе № 4 па вуліцы Касманаўтаў.

Між тым жанчыны паскардзіліся, што калісьці на доме зрабілі новы дах, але не працуе сістэма адтоку вады, таму сцены вільготныя, і дому патрабуюцца не толькі балконы-лоджыі, але і тэрмарэнавацыя. Фотаздымкі кватэр пераканалі Пятра Рудніка, што такія работы сапраўды патрабуюцца. Разам з тым тэрмарэнавацыя зробіць кошт рамонту дома на палову большай, а гэта некалькі мільярдаў рублёў. Таму, лагічна, улады запыталіся ў жыхароў дома: а што яны самі могуць зрабіць для таго, каб ім жылося больш утульна і камфортна?
Размова ідзе не толькі аб грашовым удзеле ў рамонтных работах: рабіць гэта, натуральна, варта ў меру магчымасцяў жыхароў, але ўсё ж такі свой, асабісты, уклад у справу забяспечыць жыхарам дома больш трывалыя пазіцыі ў лісце чакання рамонту. Ёсць таксама патрэба ў ініцыятыве навядзення парадку ў двары і пад'ездах. Што ж, жыхары дома № 4 па вуліцы Касманаўтаў зусім не супраць добрай справы: у іх ёсць вопыт збірання грошай на фарбу для пад'ездаў, устаноўкі сучасных аконных блокаў. Жанчыны не сталі адмаўляцца ад удзелу ў суботніку.

— Там, дзе наводзяць парадак і сочаць за ім — не псуюць выгляд і не кідаюць смецце, — упэўнены старшыня аблвыканкама.
Пётр Руднік таксама параіў уладам Магілёва правесці агульнагарадскі суботнік напярэдадні міжнароднага фестывалю «Залаты шлягер», які хутка распачнецца ў абласным цэнтры. Камунальным службам будзе дарэчы дапамога гараджан.

Ілона ІВАНОВА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.