На днях некаторыя студэнты БДУ павінны былі пераехаць у новы інтэрнат № 4, які знаходзіцца на тэрыторыі так званай Студэнцкай вёскі. Але наваселле чарговы раз адмянілі. Пайшла пагалоска, нібыта ў будынку па вуліцы Чурлёніса здарылася аварыя, затоплена некалькі паверхаў...
Каб удакладніць інфармацыю, карэспандэнт «Звязды» патэлефанавала на эканамічны факультэт БДУ. Навучэнцы гэтага факультэта павінны былі стаць аднымі з насельнікаў інтэрната №4.
— Нашы студэнты зараз не на вуліцы, яны спакойна жывуць у іншых інтэрнатах. А засяленне ў «чацвёрку» планавалася, але пастаянна адкладвалася. Спачатку абяцалі, што гэта адбудзецца ў верасні, пасля тэрмін перанеслі на кастрычнік, — паведаміў намеснік дэкана па вучэбна-выхаваўчай рабоце эканамічнага факультэта БДУ Аляксандр Вараб'ёў.
Па яго словах, у гэтым месяцы верагоднай датай засялення называлі спачатку 15 га, а пазней — 21 кастрычніка, але пераезд зноў адмяніўся.
— Прычыну нам не тлумачылі. Тут трэба разумець, што дырэкцыя студгарадка не можа адказваць за будаўнікоў, якія вядуць работы ў інтэрнаце, — адзначыў Аляксандр Вараб'ёў.
Высветліць, чаму адмянілі пераезд у інтэрнат на Чурлёніса, мы паспрабавалі ў дырэктара студэнцкага гарадка БДУ Міхаіла Чарапеннікава:
— Інфармацыя пра некалькі затопленых паверхаў — гэта няпраўда. У інтэрнаце прарвала водаправод, наступствы распаўсюдзіліся ўсяго толькі на пару пакояў. Але не гэта стала прычынай часовага пераносу засялення, няспраўнасць даволі хутка ліквідавалі, — адзначыў Міхаіл Чарапеннікаў.
Як расказаў дырэктар Студэнцкага гарадка, запаветныя ключы ад пакояў студэнты ўсё яшчэ не атрымалі па прычыне адсутнасці ў інтэрнаце пастаяннай схемы падключэння электрычнасці. Але гэта — «пытанне да заказчыка і падрадчыка». Як толькі праблема з электрычнасцю будзе вырашана, студэнты змогуць пераехаць у інтэрнат літаральна на наступны дзень.
Ганна ГАРУСТОВІЧ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
