Як развіваецца Еўразійская эканамічная супольнасць? Якія вынікі дало вымярэнне індэкса «DOІNG BUSІNESS-2014»? Ці ўлічылі голас бізнесу пры фарміраванні падаткаў на будучы год? На гэтыя і іншыя пытанні прадстаўнікі беларускага бізнесу шукалі адказы падчас пасяджэння Камітэта па прадпрымальніцтве канфедэрацыі прамыслоўцаў і прадпрымальнікаў.
Еўразійская эканамічная супольнасць арыентуе кожнага з яе ўдзельнікаў на рынкі з 5-мільярдным насельніцтвам. Удзел Беларусі ў гэтым аб'яднанні патрабуе ад яе эканамічнай гнуткасці і адкрытасці да змен. Да гэтага часу Беларусь не мае незалежнага антыманапольнага заканадаўства, якое не падпарадкоўваецца ўраду. У гэтым яна саступае сваім партнёрам — Расіі і Казахстану. Менавіта таму Беларусі рэкамендавана аператыўна прывесці заканадаўства краіны ў адпаведнасць з адзінымі прынцыпамі і правіламі канкурэнцыі, рэгламентаванымі пагадненнем ад 9 снежня 2010 года. Таксама на эканамічнай прасторы рэспублікі не праводзяцца даследаванні аб канкурэнцыі на рынках, не хапае статыстычнай інфармацыі аб тым, што на іх адбываецца. «У гэтым Беларусь пакуль адстае, — падсумаваў складнікі праблемы намеснік старшыні Беларускай канфедэрацыі прамыслоўцаў і прадпрымальнікаў (наймальнікаў) Уладзімір Карагін. — Па ўсіх індыкатарах Давоскага форуму Беларусь знаходзіцца на 93-м месцы ў рэйтынгу (усяго прадстаўлена 141 краіна) па канкурэнтаздольнасці рынку».
Наколькі пазітыўна выглядае індэкс дзелавога аптымізму ў 2013 годзе? Паводле рэпрэзентатыўнага апытання 526 уладальнікаў бізнесу, ён мае наступныя значэнні. Суб'ектыўнае ўспрыманне толькі 11,6% бізнесменаў-рэспандэнтаў адзначыла паляпшэнне стану беларускай эканомікі. Калі казаць пра паказчыкі індэкса лёгкасці вядзення бізнесу «DOІNG BUSІNESS-2014», то тут яны маюць зусім іншыя вынікі. Напрыклад, у катэгорыі «Адкрыццё бізнесу» Беларусь знаходзіцца на 15 месцы са 189, хаця лепшым паказчыкам было 7-е, у рэгістрацыі ўласнасці — на 3-м. Дарэчы, Беларусь увайшла ў тройку лідараў свету па хуткасці пераадолення адлегласці паміж развітымі эканомікамі і тымі, якія развіваюцца. Сёння актыўна закладваецца фундамент «дома-бізнесу» ў Беларусі, яго будуюць і ўмацоўваюць.
Напрыканцы Ігар СКРЫННІКАЎ, намеснік начальніка галоўнага ўпраўлення метадалогіі падаткаабкладання арганізацый Міністэрства па падатках і зборах, расказаў пра змяненні, якія чакаюць беларусаў з 1 студзеня 2014 года.
Ігар Скрыннікаў запэўніў: «Хаця павышэнне ПДВ да 22% і планавалася, урад вырашыў пакінуць яго на ранейшым узроўні, бо павелічэнне падатковай нагрузкі на бізнес не паспрыяла б яго развіццю». Адвакаты і натарыусы з пачатку наступнага года змогуць карыстацца спрошчанай сістэмай падаткаабкладання. А вось зніжаную 2-працэнтную стаўку пры экспарце тавараў і паслуг адменяць. Змяненні датычацца і тэрмінаў справаздачных перыядаў па падатку на даход. Сёння ён вызначаецца як каляндарны год, з 1 студзеня будзе аплачвацца штоквартальна. Гэта дазволіць прадпрыемствам плаціць падатак, зыходзячы з фактычнага даходу, які яны ўжо зарабілі. У 5 разоў мясцовыя ўлады змогуць павялічваць падатак на аб'екты звышнарматыўнага будаўніцтва, у 10 — на неэфектыўнае выкарыстанне ці невыкарыстанне нерухомасці ці зямельных участкаў. Новым падаткам стануць абкладаць мікраарганізацыі, якія займаюцца тэхнічным абслугоўваннем і рамонтам аўтамабіляў. Калі даход на супрацоўніка не перавысіць 20 млн рублёў, то стаўка складзе 5%. Абкласці невялікія СТА гэтым падаткам улады вырашылі пасля таго, як параўналі ўзровень падаткавых паступленняў ад іх і індывідуальных прадпрымальнікаў, якія займаюцца той жа дзейнасцю.
Любоў Каспяровіч.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!