Вы тут

Як вы ставіцеся да магчымага ўвядзення падатку з беспрацоўных?


Ужо амаль два месяцы ў беларускай інтэрнэт-прасторы шырока абмяркоўваецца верагоднасць з'яўлення новага падатку — з грамадзян, якія афіцыйна нідзе не працуюць. На ўзроўні чутак называюцца тэрмін яго ўвядзення і нават сума. Нібыта з 2015 года кожны беспрацоўны беларус будзе аддаваць дзяржаве 20 базавых велічынь. Міністр працы і сацыяльнай абароны краіны Марыяна Шчоткіна заявіла падчас анлайн-канферэнцыі, што пытанне новага падатку трэба дакладна прапрацаваць, і параіла ўносіць свае прапановы.

1386302871756_1

Антаніна МОРАВА, старшыня Пастаяннай камісіі Савета Рэспублікі Нацыянальнага сходу па адукацыі, навуцы, культуры і сацыяльным развіцці, міністр працы і сацыяльнай абароны Беларусі ў 2001-2006 гадах:

— Калі гэты падатак і будзе ўведзены, то трэба загадзя акрэсліць у нарматворчых дакументах усе спрэчныя моманты, даць выразныя азначэнні тэрмінам. Напрыклад, што такое дармаедства ці лайдацтва, па якіх крытэрыях яно вызначаецца... Але канчатковага стаўлення я зараз выказаць не магу. Спярша трэба пабачыць сам тэкст праекта ўказа, а пасля рабіць нейкія высновы.

1386302874361_2

Ганна УЛЬРЫХ, сакратар пярвічнай арганізацыі БРСМ БДУІР:

— Магчымасцяў легальна зарабіць цяпер дастаткова. Калі хтосьці незадаволены сваім заробкам, трэба шукаць больш высокааплатную працу. У сталіцы, напрыклад, хапае ўсялякіх курсаў прафесійнай падрыхтоўкі нават з нуля. Так, не кожнаму дадзена ад прыроды стаць праграмістам, але калі няма фізічных супрацьпаказанняў, можна пайсці, напрыклад, на будоўлю, як гэта рабілі мае знаёмыя. Проста ўсё залежыць ад самога чалавека...

1386302877725_3

Іван С. (фатаграфавацца і называць прозвішча адмовіўся), працуе неафіцыйна:

— Негатыўна ўспрымаю гэтую ідэю. Аднак і лайдацтва таксама не падтрымліваю. Я б размежаваў тут дзве гранічныя сітуацыі. Адна справа, калі чалавек гадамі нідзе не працуе, выцягвае грошы з родных ды знаёмых на чарговую дозу выпіўкі. І зусім іншае, калі людзі працуюць неафіцыйна, без фармальнага ўладкавання на працу — «шабашаць» на будоўлях ці займаюцца фрылансам. Але тут трэба адказаць на пытанне: чаму людзі выбралі менавіта гэты шлях? Можа, справа ў велічыні заробку?

Падрыхтаваў Валяр'ян ШКЛЕННІК.

Выбар рэдакцыі

Грамадства

Такое рознае малако... Каму якое падыходзіць?

Такое рознае малако... Каму якое падыходзіць?

«Малако — паўнавартасны прадукт харчавання, а не напой, гэта важна ўлічваць».