Два тыдні таму на маім падаконніку з'явілася незвычайная расліна, якая нібыта гарыць — такі незвычайны ў яе колер. Гэта пуансетыя, што сваімі ярка-ружовымі прыкветкамі стварыла ў нашай кватэры сапраўдны святочны настрой.
Пуансетыя, або малачай найпрыгажэйшы, вось ужо амаль два стагоддзі з'яўляецца самай папулярнай хатняй раслінай на Каляды і Новы год. Пуансетыя найпрыгажэйшая (Poіnsettіa pulcherrіma) — куст з сямейства малачайных, які ў натуральным асяроддзі расце ў Мексіцы. Калі разламаць ліст пуансетыі, то з'явіцца белы сок, які можа выклікаць раздражненне скуры і алергію. Славуты шыкоўны «калядны» выгляд гэтай расліне надаюць прыкветкі — буйнае кантрастнае лісце на самым версе атожылкаў. Такое лісце ў прыродных умовах заўсёды ярка-чырвонае, аднак за шмат гадоў селекцыі былі выведзены гатункі «навагодняй зоркі» з ружовымі, жоўтымі, персікавымі, крэмавымі і нават плямістымі прыкветкамі. Чароўныя прыкветкі пуансетыі трымаюцца на расліне толькі некалькі тыдняў. А вось кветкі яе несамавітыя — дробныя і жоўта-зеленаватыя.
Навагодняя зорка мае доўгую гісторыю. Ацтэкі, першыя знаўцы пуансетыі (яны называлі расліну cuetlaxochіtl), выкарыстоўвалі яе чырвоныя прыкветкі ў якасці натуральнага фарбавальніка для касметыкі і тканін, а белы сок — для лячэння гарачкі. Жыхары ЗША даведаліся пра мексіканскую «зорку» дзякуючы намаганням Дж.Р. Пайнсета (1779—1851) — лекара і батаніка, якога прэзідэнт Мэдысан прызначыў першым амерыканскім амбасадарам у Мексіцы. Сапраўдным захапленнем Пайнсета была, аднак, зусім не палітыка, а батаніка. Упершыню ўбачыўшы найпрыгажэйшую «зорку» ў колеры ў Мексіцы ў 1828 годзе, Пайнсет тут жа адправіў некалькі ўзораў у свае аранжарэі ў Грынвіле (Паўднёвая Караліна), дзе пазней стаў размнажаць пуансетыю і рассылаць яе ў батанічныя сады. У 1830‑х гадах навагодняя зорка трапіла ў камерцыйную вытворчасць і неўзабаве здабыла вядомасць пад імем свайго першаадкрывальніка. З Амерыкі традыцыя купляць пуансетыю для ўпрыгажэння дома на Каляды і Новы год трапіла ў Еўропу.
Каб захаваць набытую пуансетыю ў яе самым чароўным выглядзе як мага даўжэй, пастаўце яе на сонечны бок, забяспечце пастаянную тэмпературу паветра каля 20 градусаў цяпла ўдзень і не ніжэй за 16 уначы і падтрымлівайце грунт у вільготным стане. Неабходна выключыць скразнякі і любое ўздзеянне холаду (напрыклад, дотык лісця да настылай шыбы), бо наша «зорка» вельмі далікатная і лёгка скідае лісце і прыкветкі пры першых прыкметах дыскамфорту.
Сяргей КУРКАЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».