Цукровы дыябет у дзяцей выяўляецца ў розным узросце, аднак найчасцей — у дашкольным і школьным (ад 5 да 13 гадоў). Захворванне рэгіструецца аднолькава часта як у хлопчыкаў, так і ў дзяўчынак. Вялікае значэнне мае спадчынная схільнасць, аднак спрыяюць таксама перакормліванне, лішак вугляводаў і тлушчу ў харчаванні, фізічныя і псіхалагічныя траўмы — траўмы галавы, жывата, моцныя перажыванні, спалох, інфекцыйныя хваробы (эпідэмічны паратыт, адзёр, ветраная воспа, шкарлятына, грып, хвароба Боткіна).
— Захворванне абумоўлена павышанай сакрэцыяй гармонаў — антаганістаў інсуліну, — тлумачыць валеолаг 23‑й гарадской дзіцячай паліклінікі г. Мінска Алена ГАРНІЦКАЯ.
— Пры адсутнасці інсуліну тканкі не засвойваюць глюкозу, парушаюцца акісляльна-аднаўленчыя працэсы. Пры назапашванні недаакісленых прадуктаў развіваецца дыябетычная кома. У дзіцячым узросце з‑за інтэнсіўных працэсаў росту і вялікага расходу энергіі патрэба ў інсуліне больш высокая, што хутчэй прыводзіць да знясілення непаўнацэннага інсулярнага апарату і развіццю дыябету…
Цукровы дыябет у дзяцей можа развівацца паступова, аднак прыкладна ў кожнага трэцяга пачатак бурны — дзеці трапляюць у стацыянар у пачатку комы. Найбольш раннім сімптомам цукровага дыябету з'яўляецца ўзмоцненая смага, пры якой выпіваецца 1500–3000 мл вадкасці за суткі. Гэты стан звязаны з абязводжваннем арганізма, павышэннем канцэнтрацыі хларыду натрыю, мачавіны, глюкозы ў крыві. Адпаведна павялічваецца колькасць мачы, якая выдзяляецца — да 3 л у суткі. Пялёнкі хворых немаўлят становяцца пры высыханні цвёрдымі, нібы накрухмаленымі. Хворыя дзеці маюць павышаны апетыт: абменныя парушэнні змяняюць састаў крыві, уздзеянне «галоднай» крыві на харчовы цэнтр выклікае адчуванне голаду. Пры павышаным апетыце і празмерным ужыванні ежы дзіця худзее. Скура становіцца сухой. Магчыма развіццё стаматыту, парадантозу з расхістваннем зубоў. Павялічваецца печань. Могуць назірацца аслабленне памяці, зніжэнне паспяховасці, стамляльнасць. Зніжаецца супраціўляльнасць інфекцыям, лёгка далучаецца фурункулёз, магчыма развіццё і туберкулёзу. Пры даследаванні крыві раніцай нашча вызначаецца гіперглікемія (павышаная колькасць цукру) — 11,1–16,5 ммоль/л. Для цукровага дыябету характэрна наяўнасць цукру ў мачы. Павялічваецца і колькасць халестэрыну ў крыві — вышэй за 5,2 ммоль/л. Магчыма развіццё такіх ускладненняў, як цыроз печані, полінеўрыт, катаракта, рэцыніт, дыстрафія касцявой тканкі.
Своечасовае і сістэматычнае лячэнне дазваляе захоўваць жыццё на працягу многіх гадоў. Дзіця працягвае вучыцца ў звычайнай школе, змяншаюцца толькі фізічныя нагрузкі.
Святлана БАРЫСЕНКА
Што рабіць, каб не дапусціць?
Адзін з самых эфектыўных спосабаў — прафілактыка атлусцення. Адсюль парады па харчаванні — уключэнне ў рацыён цэльназерневых прадуктаў (хлеб грубага памолу, крупы), якія, у адрозненне ад рафінаваных, не павышаюць узровень цукру ў крыві; выдаленне з рацыёну прадуктаў з транстлушчамі, маргарынам. Па фізічнай нагрузцы — абавязковыя практыкаванні, плаванне, актыўныя гульні.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.