Славутая школа расійскага балета пачыналася ў Ружанах
Рэканструкцыя ружанскага палаца Сапегаў — гэта законная падстава ганарыцца ўсім, хто мае хоць нейкае дачыненне да ажыццяўлення праекта. А колькі было скептыкаў! Казалі, напрыклад: навошта траціць грошы? Дастаткова закансерваваць гэтыя руіны і паказваць іх рэдкім турыстам з акна аўтобуса: тут, маўляў, меў сваю рэзідэнцыю аўтар «Статута Вялікага Княства Літоўскага» і жылі яго нашчадкі. Але ж адолелі, адрэстаўравалі першую частку палаца — уязную браму. За год-другі ў музеі сабраліся экспанаты. І цяпер у яго не сорамна запрашаць турыстаў.
Вядома, большасць кніг, карцін, іншых каштоўных рэчаў з палаца захоўваецца ў краінах блізкага і далёкага замежжа. У фондзе новага музея адна сапраўдная пячатка Сапегаў ёсць. Але і ёй ганарыцца дырэктар установы Руслан Кніга. Яго экскурсіі заўсёды цікавыя, заўсёды дазнаешся пра нешта новае. Напрыклад, колькі разоў даводзілася чытаць пра тое, якая знакамітая балетная трупа працавала ў Ружанскім палацы, як цаніў гэты балет кароль Станіслаў Аўгуст Панятоўскі. Аказваецца, у часы Расійскай імперыі, калі палац па вядомых прычынах канфіскавалі ў гаспадароў, трупа не перастала існаваць, прыгонныя акцёры не пайшлі працаваць на птушыны двор. Яны выехалі ў Пецярбург. Гэтая трупа стала асновай расійскага балета, які праславіўся лепшай у свеце балетнай школай. «А пачыналася гэтая балетная школа вось тут, у Ружанах», — з непрыхаваным гонарам гаворыць Руслан Кніга.
Не менш захапляльную экскурсію па Ружаншчыне для прадстаўнікоў СМІ арганізавала галоўны захавальнік фондаў музея «Пружанскі палацык» Наталля Пракаповіч. Магілёўцы, Лыскава, Баяры, Асошнікі — тут сапраўды ўсё дыхае гісторыяй. Дзве апошнія вёскі з пераліку заснавалі прывілеяваныя сяляне — ахоўнікі Белавежскай пушчы. Такіх паселішчаў абапал новай аб'язной дарогі шмат. А былое мястэчка Лыскава — радзіма магнатаў-асветнікаў. Тут жыў і быў пахаваны Францішак Карпінскі, паэт, перакладчык, педагог. А вяльможы ВКЛ і Рэчы Паспалітай Быхаўцы пабудавалі некалі манастыр місіянераў і прыгожы касцёл. Касцёл гэты чакае сваіх фундатараў і можа стаць яшчэ адной турыстычнай цікавінкай Ружанскага рэгіёна. Дарэчы, Ружаншчына — край унікальны яшчэ і тым, што па ёй праходзіць некалькі ўмоўных межаў. Напрыклад, моўна-этнаграфічных рэгіёнаў. Калі для вёсак на поўначы ад Ружан характэрна цэнтральна-беларуская гаворка, то на поўдні жыхары ўжываюць палескія дыялекты. Зноў жа на поўначы рэкі адносяцца да басейна Балтыйскага мора, а паўднёвыя цякуць у мора Чорнае.
Захаванне гісторыка-культурнай спадчыны — клопат улад. Старшыня Брэсцкага аблвыканкама Канстанцін СУМАР на пытанне карэспандэнта «Звязды» аб перспектывах далейшай работы па адраджэнні гісторыка-культурнай спадчыны ў рэгіёне адказаў, што работа, несумненна, будзе працягвацца. У 2005 годзе ў вобласці быў створаны каардынацыйны савет па ахове матэрыяльнай і духоўнай спадчыны, куды ўвайшлі гісторыкі, навукоўцы, рэстаўратары. Паступова сталі выдзяляцца сродкі на рэстаўрацыйныя праекты. І сёння можна бачыць вынікі шэрагу паспяховых праектаў. Як вядома, першыя спробы аднавіць былую рэзідэнцыю Сапегаў рабіліся яшчэ пры Савецкім Саюзе. Але падзеі пачатку 1990-х адсунулі працу на многія гады. І толькі ў 2009 годзе ў Ружаны прыйшлі рэстаўратары. І вось ужо маем два будынкі былога палаца з прыстойным музеем, з віртуальнай бібліятэкай роду Сапегаў, якую ўдалося сабраць намаганнямі нашых бібліятэкараў пры падтрымцы бюро ЮНЕСКА ў Маскве.
Яшчэ адным набыткам на гэтым шляху стаў палац Нямцэвічаў у вёсцы Скокі Брэсцкага раёна. У сядзібе, узведзенай прыкладна ў 1770-я гады жыў Юльян Урсын Нямцэвіч, пісьменнік, дзяржаўны дзеяч, ад'ютант Тадэвуша Касцюшкі, адзін з аўтараў першай Канстытуцыі ў Еўропе. А яшчэ гэтыя сцены памятаюць значную гістарычную падзею. Менавіта тут 15 снежня 1917 года быў падпісаны пратакол аб ваенным перамір'і паміж Савецкай Расіяй і Германіяй, што паклала пачатак спыненню Першай сусветнай вайны на ўсходзе. Па сутнасці, гэты палац поўнасцю адбудаваны. За сем гадоў з бюджэту выдаткавана больш за восем мільярдаў рублёў.
Працягваюцца работы па аднаўленні Косаўскага палаца Пуслоўскіх. Кіраўнік вобласці заўважыў, што ў бліжэйшыя год-два не плануецца выдзяляць сродкі на тое, каб распачынаць новыя аб'екты. Трэба давесці да поўнага завяршэння пачатыя. Адны адрэстаўраваныя сцены трэба напоўніць зместам, дзе-нідзе патрабуецца добраўпарадкаванне тэрыторый. А каардынацыйны савет будзе распрацоўваць новыя праграмы. Гэта работа не аднаго года, не аднаго дзесяцігоддзя. Але яна патрэбна для нашчадкаў.
Святлана ЯСКЕВІЧ
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.