Споўнілася 70 гадоў адной са шматлікіх карных аперацый нямецка-фашысцкіх акупантаў па знішчэнні партызан і мірных жыхароў Беларусі. Яна называлася «Ота», значылася пад нумарам 105. Для людзей, што нарадзіліся пасля вайны, — гэта ўжо гісторыя. А для тых, хто перажыў вайну, гэта пякучы боль, які вяртаецца зноў і зноў праз дзесяцігоддзі.
Наша лясная вёсачка Абухава, што на Расоншчыне, ужо ў ліпені 1941 года стала «партызанкай». Першымі партызанамі былі акружэнцы. Да іх хутка сталі далучацца мясцовыя жыхары. У жніўні яны арганізавалі ўборку збажыны ў Паляўшчыне (бязлесная мясцовасць каля Дрысы), каб хлеб не дастаўся фашыстам. Мужчыны касілі пшаніцу, а мы, дзяўчаты і жанчыны, жалі, вязалі снапы, зносілі на павозкі. Працавалі і днём, і ноччу. На другі дзень з'явіліся гітлераўцы з дрысенскага гарнізона, пачаўся бой. Два партызаны былі паранены, але збожжа нам удалося вывезці.
У нашай вёсцы заўсёды знаходзіліся партызаны. Адны ішлі на заданні, іншыя вярталіся з іх. Часта суткамі палілася печ, каб наварыць бульбы ці спячы якіх бліноў, а зімой — абсушыць вопратку, абутак. Вяскоўцы дапамагалі партызанам, як маглі. У час «рэйкавай вайны» абухаўцы па заданні партызан разабралі ўчастак аднакалейкі каля Расонаў. Мужчыны развінчвалі і расцягвалі рэйкі, жанчыны зносілі шпалы.
У 1943 годзе карныя экспедыцыі фашыстаў узмацніліся. У дакументах акупантаў раён расонска-асвейскай партызанскай зоны называўся «партызанскай рэспублікай Расоны». Пераўзыходзячыя сілы карнікаў падтрымлівалі танкавыя, артылерыйскія, сапёрныя і іншыя падраздзяленні, авіяцыя. Партызанам усё цяжэй было іх стрымліваць. Насельніцтву давялося хавацца ў лясах. Наша сям'я разам з 9 іншымі сем'ямі пабудавалі зімовы лагер за 4 кіламетры ад вёскі ў балоцістым лесе на востраве (мясцовая назва Смалаўкі).
У другой палове снежня фашыстам удалося адцясніць партызан да апошняй лініі іх абароны па рэках Нішча, Дрыса і далей на поўнач да блізкага ўжо фронту. У вёсцы Роўнае Поле, якую мы называлі «партызанскай Масквой», сканцэнтраваліся падпольныя партыйныя органы, штабы партызанскіх брыгад, перапоўненыя параненымі шпіталі, тысячы жанчын, дзяцей, старых. Каб выратаваць людзей, партыйнае кіраўніцтва і партызанскае камандаванне вырашыла ў ноч на 28 снежня прарваць блакаду і вывесці насельніцтва і параненых за лінію фронту.
27 снежня партызаны сказалі к вечару сабрацца ў дарогу ўсім, хто можа ісці. Мама ўгаварыла мяне пайсці, а сама з іншымі дзецьмі вырашыла схавацца ў Смалаўках. Сабралася мноства народу. Патрабавалася захоўваць абсалютную цішыню. На прыцемках партызаны павялі людзей да ракі Нішча, якая была пакрыта ўмерзлымі ў лёд сплаўнымі бярвёнамі. Пад цяжарам натоўпу лёд у некаторых месцах трэснуў, і бярвенні круціліся на вадзе. На правы бераг я вылезла з мокрымі да локця рукамі, у ботах хлюпала вада. Справа партызаны вялі бой, і над шашой, якую трэба было перабегчы, ляцелі трасіруючыя кулі фашыстаў. Былі параненыя. Ішлі два дні і тры ночы. Быў толькі адзін прывал. 30 снежня па вузкіх мастках фарсіравалі незамерзлую Дрысу і выйшлі да Чырвонай Арміі. Нам дазволілі распаліць вогнішчы, грэцца і сушыцца. Партызаны вывелі за фронт каля 10 тысяч чалавек. Многія засталіся на месцах: не мелі сіл ісці.
Што адбывалася дома далей, ведаю са слоў Марыі Александроўскай, якая была з маёй сям'ёй у Смалаўках. 30 снежня хтосьці пусціў чутку, што карнікі ідуць толькі па вялікіх лясах, бо там размяшчаюцца партызаны і хаваецца насельніцтва. Таму вырашылі вярнуцца ў невялікі лясок каля сваёй вёскі і перачакаць. Уноч на 31 снежня ўсе з лагера перабраліся ў лясок каля Нішчы, які і без таго быў перапоўнены людзьмі, што не змаглі пайсці за лінію фронту. Раніцай 31 снежня карнікі — 16 паліцаяў і 2 немцы з сабакам — па свежых слядах знайшлі прыехаўшых. Людзям загадалі пастроіцца ў шарэнгу. Дзесяцігадовая сястрычка Манечка ішла на расстрэл босенькая, бо намоклыя бу́рачкі ціснулі ёй ножкі і мама ноччу іх зняла. Маня Васілеўская стала карміць грудзямі немаўля, спадзеючыся, што ў гітлераўцаў не паднімецца рука стрэліць у жанчыну з дзіцем. Памылілася… Маці вялікай сям'і Марыя Якубоўская, шасцёра з якой стаялі ў шарэнзе, страціла прытомнасць і павалілася, што яе і выратавала. Калі інвалід Іван Якубоўскі з 8‑гадовым сынам Антонам і Ганна Васілеўская з гадавалым хлопчыкам на руках кінуліся ўцякаць, карнікі з сабакам дагналі іх на хутары Шкорнева і забілі.
Тут былі расстраляны больш за 30 жыхароў вёскі Абухава, з іх — 14 дзяцей, а таксама людзі, што знаходзіліся ў лясочку. У гэты ж дзень гітлераўцы забілі ў лесе сям'ю Яршовых — 10 чалавек. Жывымі спалілі ў пуні сям'ю Карніленкаў — маці і траіх дзяцей, вёску Абухава, якая пасля вайны не адрадзілася.
Падчас аперацыі «Ота» карнікі расстралялі 2 тысячы чалавек, захапілі для вывазу ў Германію больш за 500 чалавек, спалілі 10 вёсак. Забітых абухаўцаў хавалі толькі ў красавіку 1944 года, калі растала зямля і знайшліся сілы выкапаць вялікую магілу і перанесці целы. У 1982 годзе на магіле паставілі помнік. Месца, дзе некалі была вёска, даўно зарасло, магіла аказалася ў балоцістым лесе. А памяць жыве і сёння.
Алена Марозава,
г. Мінск
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.