«У часы Сярэднявечча адзенне з лёну было прывілеяй каралёў. Наша задача — зрабіць яго даступным для ўсіх», — пад такім дэвізам працуюць пружанскія льнаводы.
Гісторыя ААТ «Пружанскі льнозавод» бярэ адлік з 1973 года. За гэты час прадпрыемства пераадолела нялёгкі шлях да працвітання і звання лепшага сярод аналагічных у краіне. Сярод вытворчых цэхаў, аснашчаных па апошнім слове тэхнікі, магутнага машынна-трактарнага парку пра былое сёння нагадвае толькі прымітыўны па цяперашніх мерках ЛК-4, які ўстаноўлены на пастаменце перад тэрыторыяй завода...
— Не пабаюся зрабіць гучную заяву: сёння наша прадпрыемства — адно з самых магутных у свеце, — распавядае дырэктар ААТ «Пружанскі льнозавод» Мікалай Жогал. — Сцвярджаць гэта дазваляюць паказчыкі, якіх нам удалося дасягнуць за апошнія некалькі гадоў.
Варта адзначыць, што старт да новых дасягненняў дала мадэрнізацыя вытворчасці, якая пачалася ў 2010 годзе з узвядзення новага цэха, дзе была ўсталявана высокатэхналагічная бельгійская лінія «Depoortere» па перапрацоўцы льнотрасты. У наступным 2011-м да Дня Перамогі ў новым цэху была знята першая пасма доўгага валакна. А ў 2012 годзе завершана першая чарга рэканструкцыі завода: акрамя цэха, былі пабудаваны тры шохі для захоўвання льнотрасты, палівазаправачны пункт, вагавая, прахадная, праведзена добраўпарадкаванне і агароджванне тэрыторыі.
Але найноўшае перапрацоўчае абсталяванне — гэта толькі палова поспеху.
— Пачынаць варта з работы на полі: каб выпусціць высакаякасную прадукцыю, запатрабаваную на рынку, трэба атрымаць добрую сыравіну, — заўважае Мікалай Сцяпанавіч. — Таму невыпадкова мы штогод павялічвалі пасяўныя плошчы. Так, у 2013 годзе асабістымі сіламі льном засеялі 2,5 тысячы гектараў земляў — не толькі на Пружаншчыне, але яшчэ і на тэрыторыі суседняга Івацэвіцкага раёна. Падчас уборачных работ даводзіцца прыцягваць дадатковыя сілы. Між іншым, сёлета атрад «Васілёк» з навучэнцаў Пружанскага аграрна-тэхнічнага каледжа, які дапамагаў нам прыбіраць лён, быў прызнаны лепшым студатрадам у рэспубліцы. Невыпадкова ўзяліся і за абнаўленне машынна-трактарнага парку, цалкам адмовіўшыся ад састарэлай савецкай тэхнікі. Прадпрыемства набыло 4 трактары МТЗ-3022 з дыскатарамі, плугамі і пасяўнымі агрэгатамі, 2 самаходныя апрысквальнікі «Тэхнома», 10 самаходных двухпаточных церабілак, 5 самаходных ачэсвальнікаў-абарочвальнікаў, 17 самаходных абарочвальнікаў, 3 прычапныя трохрадныя ўспушвальнікі, 6 пагрузчыкаў «Амкадор» і «Маніту», 10 аўтамабіляў і іншую прычапную і навясную тэхніку. Таму можам сабе дазволіць у гарачы сезон, каб на адным полі працавала да трох дзясяткаў прэс-падборшчыкаў. Штосьці, дарэчы, мадэрнізуем самастойна: напрыклад, нашы інжынеры распрацавалі і зрабілі да пагрузчыка стралу з захватамі, якой няма роўных па прадукцыйнасці.
Толькі ў лістападзе на Пружанскім ільнозаводзе выпрацавалі 160 тон доўгага валакна — столькі, колькі яшчэ дваццаць гадоў таму атрымлівалі за ўвесь год. Дарэчы, гэта самы высокі паказчык па краіне. Не саступаюць тут лідарскіх пазіцый і па ўраджайнасці: летась яна дасягнула звыш 17 цэнтнераў валакна з гектара (для параўнання, аналагічныя прадпрыемствы рэспублікі не атрымалі і 10 цэнтнераў). Што датычыць задачы атрымаць дэфіцытнае доўгае валакно, дык і яе ўдалося выканаць: у Пружанах выпрацоўваюць яго нумарамі 12 і 13. Увогуле, сёння якасць апрацоўкі лёну і мяккасць пружанскага валакна па-за канкурэнцыяй: лепшая сыравіна, вядома, застаецца ў краіне — яна вельмі запатрабавана на Аршанскім ільнокамбінаце, астатняя (а гэта каля 40%) ідзе на экспарт, пераважна ў Кітай.
Разам з тым, кіраўніцтва завода зазначае, што немалой доляй сённяшняга поспеху прадпрыемства абавязана людзям: інжынерна-тэхнічнай службе, механізатарам, рабочым усіх цэхаў, ветэранам і маладым кадрам, якія самааддана шчыруюць на заводзе, укладваюць душу ў даручаную справу. Асобныя словы падзякі ў адрас мясцовай улады, якая падтрымлівае сваіх ільнаводаў ва ўсіх пачынаннях.
Сёння лідарская пазіцыя ААТ «Пружанскі льнозавод» бясспрэчна: сведчаннем таму, што таварыства можа з'яўляцца ўзорам для астатніх у сваёй галіне, з'яўляюцца перамогі ў спаборніцтвах ільнаводаў, шматлікія семінары на базе прадпрыемства, а таксама высокія вытворчыя паказчыкі.
Марына Вакульская, Алена ДАЎЖАНОК.
ААТ «Пружанскі льнозавод»
225133, г. Пружаны, вул. Макаранкі, 25.
Тэл.: (8-10-375-1632) 9-08-93, 9-32-07.
Факс: 9-30-18, 2-12-90.
E-maіl: lenzavod@tut.by
УНП 200026990
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».