І сапраўды: значная частка фінансавых сродкаў прадпрыемства накіроўваецца на інавацыйную дзейнасць. Летаськаля аднаго трыльёна рублёў (прыкладна 100 млн долараў)уклалі ў набыццё высокапрадукцыйнага абсталявання,якое дазваляе выпускаць прадукцыю з найменшымі вы-даткамі.
Гэта самыя буйныя капітальныя ўкладанні за апошнія дваццаць гадоў у тэхналогіі і абсталяванне. Акрамя таго, скончана будаўніцтва корпуса вытворчасці звышцяжкіх машын — кар'ерных самазвалаў грузападымальнасцю 240-450 тон. Як мы ўжо паведамлялі, у верасні мінулага года завод прадставіў унікальную распрацоўку — кар'ерны самазвал «БелАЗ-75710» грузападымальнасцю 450 тон. Гэта машына з найвышэйшай грузападымальнасцю ў свеце. Гіганта ўжо выкупіла кампанія «Кузбасразрэзвугаль» і заказала яшчэ дзве такія машыны.
Аднак не толькі пачатак вытворчасці звышцяжкіх машын будзе вызначаць далейшую працу прадпрыемства. «Яшчэ адна з мэтавых задач гэтага года — мадэрнізацыя вытворчасці. Для таго, каб якасць машын адпавядала новаму тэхналагічнаму ўзроўню», — падкрэслівае Станіслаў Якубовіч, намеснік генеральнага дырэктара па інфармацыйнай і ідэалагічнай рабоце. Дарэчы, 450 тон для нашых самазвалаў — не мяжа. Канструктары завода сцвярджаюць, што тэхнічна магчыма сабраць і машыну з грузападымальнасцю 560 тон. Праблема толькі ў тым, што не існуе такіх шын, якія вытрымаюць падобную вагу. «Калі хімікі зробяць шыны, тады будзем працаваць. Канструктары і механікі змогуць гэта зрабіць, тэхналогіі дазваляюць. Калі такі самазвал і з'явіцца, то ён з'явіцца на БелАЗе», — лічыць намеснік гендырэктара.
У найбліжэйшыя два гады завод плануе выйсці на новыя рынкі: Калумбіі, Чылі, Перу, Бразіліі, Марока, ПАР, Ганы, Конга, Намібіі, Мазамбіку, Індыі, Інданезіі, Аўстраліі, ЗША, Турцыі, Фінляндыі.
Між іншым, сёння спецыяльная камісія зафіксуе рэкордную грузападымальнасць БелАЗ-75710 для Кнігі рэкордаў Гінэса.
Уладзіслаў КУЛЕЦКІ, фота аўтара,
г. Жодзіна
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.
