Самы магутны ў свеце

Белаз устанавіў адразу тры рэкорды

Дасягненне належыць самазвалу БелАЗ-75710 грузападымальнасцю 450 тон. З гэтай нагоды ў Беларусь прыехаў Аляксей Свістуноў, галоўны рэдактар «Кнігі рэкордаў Расіі».

— Заяўка ад БелАЗа да нас паступіла яшчэ восенню. Пасля чаго праводзілася сур'ёзная экспертыза. Былы сусветны рэкорд належаў амерыканскай машыне, якая вазіла па палігоне звыш 404 тон вугалю, а еўрапейскі рэкорд належаў нямецкаму самазвалу «Лібхер». Яго паказчык — 363 тоны, — кажа Аляксей Свістуноў.

Аднак для нашага самазвала ўсе гэтыя лічбы непераадольнай перашкодай не сталі. І пасля таго, як кран пагрузіў у кузаў апошнія бетонныя блокі, а машына паспяхова вярнулася з палігона, Аляксей Свістуноў афіцыйна прызнаў, што БелАЗ перавёз 503 тоны 505 кг і, устанавіўшы тры рэкорды (краі н СНД, Еўропы і ўсяго свету), цяпер трапіць у Кнігу рэкордаў Гінэса.

— Пра гэтую ідэю мы задумаліся ўжо ў той час, калі стварылі самазвал, — распавядае Алег Сцяпук, першы намеснік генеральнага дырэктара БелАЗа па тэхнічнай палітыцы і інавацыйных тэхналогіях. — Гэтае мерапрыемства мае вялікае значэнне для нашага прадпрыемства.

Тарас ШЧЫРЫ. Фота Анатоля Клешчука. г. Жодзіна