У вайсковай справе тое, што пазначана тытулам — стратэгічнае — самая моц. У гэтым плане беларускі горад Ліда калісьці меў, можна сказаць, сусветнае значэнне. Узбраення пад рашэнне стратэгічных мэт у Лідскім гарнізоне хапала з лішкам. У час СССР бадай ніводны беларускі горад не меў столькі ядзернай зброі, колькі назапасілі яе каля Ліды. Ну хіба яшчэ Паставы.
Войны гэты горад не шкадавалі. Толькі ў ХХ стагоддзі Ліда дзевяць разоў пераходзіла з рук у рукі.
Недзе з ХІХ стагоддзя тут кватараваў полк данскіх казакоў. Часам сігалі кавалерысты на сваіх скакунах туды, дзе сялянкі працавалі, хапалі, не пытаючыся, маладзіцу, якая спадабалася, перакідвалі яе папярок сядла і мчалі ў далёкі лес. І дарэмна потым хадзілі бацькі ці мужы тых жанок са скаргай у полк. Як пазнаць віноўніка, калі ўсе ў адзінай форме з чырвонымі лампасамі, усе з вусамі, чубатыя? Мясцовыя памешчыкі таксама стаялі за казакоў, бо пасля тых набегаў у мясцовых сем'ях часта нараджаліся моцныя чарнявыя «казачкі» — будучыя добрыя работнікі для панскай гаспадаркі.
Казакоў у гарадку пасля змянілі пехацінцы. Якраз грымнула Першая сусветная, і лідскі 172-і пяхотны полк палёг там амаль цалкам.
Перад той вайной тут з'явіўся адзін з першых расійскіх ваенных аэрадромаў. Спачатку адсюль ляталі дырыжаблі, потым і баявыя самалёты. Славутыя «Ільі Мурамцы» ў лідскае неба выпраўляў сам Ігар Сікорскі — стаўшы пасля эміграцыі ў ЗША сусветна вядомым авіяканструктарам.
Калі Заходняя Беларусь адышла да Польшчы, на аэрадром прыбыў новы камандзір — Ежы Касоўскі, вядомы транскантынентальным пералётам з Варшавы да Токіа. Палякі тут спачатку размясцілі 11-ы полк знішчальнікаў Войска Польскага, пасля 5-ы бамбардзіровачны полк. У верасні 1939 года авіятары з Ліды далі добры бой нямецкім асам. А перад прыходам Чырвонай Арміі перадыслацыраваліся ў Латвію, прычым 23 самалёты пакінулі тут.
Чырвоная Армія адразу перакінула ў Ліду 122-і знішчальны полк і 11-ю змешаную авіядывізію. Яшчэ ў мясцовым гарнізоне раскватаравалі пехацінцаў — 56-ую Маскоўскую Чырванасцяжную стралковую дывізію. На яе рахунку — задушэнне паўстанняў у Тамбоўскай вобласці, у Бухары, і ў Крандштаце. Паваявала і на савецка-фінскім фронце. А вось у чэрвені 1941-га супраць гітлераўцаў 56-я змагалася няўдала. За два-тры дні была ўшчэнт разбіта і расфарміравана.
Немцы, захапіўшы Ліду, аэрадром выкарыстоўвалі слаба. А вось пасля вызвалення там не было спакою. Адсюль ляталі лётчыкі знакамітай «Нармандыі-Нёман». Пасля — штурмавы полк. Дзясяткі Герояў Савецкага Саюза служылі ў тым палку. Шасцёра яго пілотаў Зоркай Героя ўзнагароджваліся двойчы. Пажылыя лідчанкі і дагэтуль памятаюць шыкоўныя танцы ў мясцовым Доме афіцэраў, дзе зала зіхацела ад зорак на грудзях дваццаціпяцігадовых Герояў.
Важкая ваенная місія выпала Лідзе ў пасляваенны час. Бадай, тут быў самы моцны ядзерны гарнізон Савецкай Арміі на беларускай зямлі. Яго аснову складалі дзве баявыя дывізіі — авіяцыйная бамбардзіровачная і ракетная стратэгічная. Абедзве «заточаны» пад прымяненне атамных боепрыпасаў. Ракетчыкі неслі баявыя дзяжурствы з ядзернымі зарадамі пастаянна, а атамныя бомбы самалётаў чакалі свайго часу ў сакрэтным сховішчы.
З-за сваёй «стратэгічнасці» Ліда і сама знаходзілася пад пільным прыцэлам: у тыя часы патэнцыяльны вораг, плануючы ядзерныя ўдары, на выпадак вайны ніяк не мог пакінуць звышмілітарызаваную беларускую Ліду без увагі. І таму знаходзілася ў Лідзе яшчэ цэлая брыгада супрацьпаветранай абароны. Ад нападу чужых самалётаў зенітчыкі Ліду маглі прыкрыць. Ад ракетнага ўдару з космасу — не.
Дзякуй богу, абышлося без вайны.
З 1952 года ў Лідзе «прызямлілася» 1-я гвардзейская Сталінградская ордэна Леніна двойчы Чырванасцяжная ордэнаў Суворава і Кутузава бамбардзіровачная дывізія. І прызямлілася надоўга. Адзін яе полк лятаў з Ліды, два другія — з Росі і Паставаў. Усяго ў дывізіі налічвалася 89 магутных франтавых бамбардзіроўшчыкаў маркі Су-24. Кожны самалёт мог несці да 8 тон бомбавай нагрузкі. У тым ліку і ядзернай. Гэта была адна з самых складаных машын савецкай авіяцыі. І, на жаль, адна з самых аварыйных.
Пасля развалу СССР авіядывізію аддалі Расіі. На месца бамбардзіроўшчыкаў прыляцеў наш «беларускі» штурмавы авіяполк, дзе аб'ядналіся «штурмавікі» з Пружанаў і Паставаў. Перадача аэрадрома прайшла будзённа.
— Мы селі тут на сваіх
Су-25, выйшлі з самалётаў. Насустрач якраз крочылі крайнія экіпажы стаўшых расійскімі бамбардзіроўшчыкаў. Здаецца, на аэрадром Шаталава збіраліся яны ляцець. Мы павіталіся, пажадалі адзін аднаму ўдачы. Так змена гаспадароў на аэрадроме і прайшла, — успамінаў той дзень падпалкоўнік Валерый Хіхол.
На лідскай авіябазе, стаўшай «беларускай», спачатку размясцілі самалёты, якія яшчэ на «афганскай» вайне ваявалі і былі выведзены потым у Беларускую ваенную акругу. Калі закупілі ва Украіне партыю вучэбных Л-39 іх месцам базіравання таксама абралі Ліду. Побач з баявымі лётчыкамі пачалі вучыцца лятаць курсанты авіяцыйнага факультэта Ваеннай акадэміі. Гады тры таму перагналі сюды беларускія франтавыя бамбардзіроўшчыкі Су-24М і Су-24МР з Росі, калі закрывалі аэрадром. Цяпер тыя «дваццаць чацвёртыя « і тут ужо не лятаюць — састарэлі, а падтрымліваць такія «ўзроставыя» найскладанейшыя машыны ў баявым стане дорага.
Летась было заяўлена, што ў Лідзе можа з'явіцца і расійская авіяцыйная база. Калі гэта здарыцца, хутчэй за ўсё, сюды прышлюць знішчальнікі Су-27СМ3. У беларускім войску самалётаў такога тыпу няма. Хаця і ў самой Расіі гэтых мадэрнізаваных самалётаў чацвёртага пакалення пакуль няшмат.
І яшчэ ў Лідзе быў Паўночны гарадок — ракетны.
Першыя савецкія ракетныя палкі фарміравалі ў шасцідзесятыя гады. І размяшчалі іх спачатку на беларускай зямлі. Дагэтуль ядзерны парытэт забяспечвала дальняя авіяцыя (дарэчы, таксама з беларускіх аэрадромаў — Баранавічаў і Балбасава). І вось на падтрымку авіятарам прыйшлі наземныя комплексы, здольныя праз космас закідваць смертаносны зарад на тысячы кіламетраў. Баявое дзяжурства ракетчыкі пачалі несці з 15 мая 1960 года. Два з трох першых дзяжурных палкоў падпарадкоўваліся якраз ракетнай дывізіі са штабам у Лідзе. Адзін з іх знаходзіўся пад Ваўкавыскам (меў 6 ракет, пасля быў перадыслацыраваны ў Слонім), другі — у Бердаўцы пад Навагрудкам (меў дзве ракеты). Трэці баявы полк (з Мазырскай дывізіі, таксама меў дзве ракеты) стаяў у Пінску.
Гарадок для ракетчыкаў у Лідзе «адабралі» ў мотастралковай дывізіі. Пяхота не паспела перадыслацыравацца, як на іх месца ўжо шпарка выгружалася ракетная тэхніка. Колькі нерваў было спалена і сродкаў патрачана, каб выканаць загад Масквы аб пастаноўцы ракет на дзяжурства ў тэрмін! Якраз кіпела «халодная» вайна. Шмат інжынерных часцей і ваенна-будаўнічых атрадаў разам з ракетчыкамі без сну і перадыху рыхтавала раёны і пазіцыі. Работы вяліся пад поўнай завесай сакрэтнасці — нават у навакольных вёсках не здагадваліся пра тое, што тварылася ў гушчары суседніх лясоў. Асноўныя тэхнічныя работы наогул вяліся ноччу, каб і з паветра было нябачна.
Межкантынентальныя ракеты Р-12 і Р-14, якія пачалі баявую службу ў лясах Гродзеншчыны, спачатку аказаліся небяспечнымі не толькі для ворага, але і для саміх разлікаў. Іх перад дзяжурствам належала запраўляць вельмі таксічным палівам і акісліцелем. Ды і атамныя боегалоўкі таксама добра «фанілі». Кажуць, што салдаты і афіцэры, хто непасрэдна запраўляў тады ракеты, у лічаныя гады пайшлі з жыцця.
Гэтыя тыпы ракет прастаялі на Гродзеншчыне да 1980 года. А тады пачалося пераўзбраенне палкоў Лідскай дывізіі на самаходны комплекс РСД-10, больш вядомы пад назвай «Піянер». Яго «лідчане» атрымалі пазней за ўсе ракетныя дывізіі, якія знаходзіліся ў Беларусі. Праз год пасля атрымання «Піянера» 142-і ракетны полк з Навагрудка быў перадыслакаваны ў расійскі горад Ніжні Тагіл — і такія часам бывалі вайсковыя лёсы.
«Піянеры» хутка трапілі пад дагавор паміж Савецкім Саюзам і ЗША аб скарачэнні стратэгічных узбраенняў. Іх пачалі знішчаць. Аднак пазіцыі ў беларускіх лясах нядоўга стаяць пустымі: сюды прыходзіць больш сучасны і больш магутны комплекс «Таполя». Баявы зарад той «Таполі» складаў 500 кілатон, што было роўна 500 тысячам тон звычайнай узрыўчаткі. Дарэчы, магутнасць амерыканскай атамнай бомбы, якую скінулі на Хірасіму, налічвала «ўсяго» 20 кілатон. Яшчэ існавала адна асаблівасць новага ўзбраення: было немагчыма вылічыць, з якой кропкі ракета будзе пушчана па цэлі — у адрозненне ад стацыянарных ці шахтных комплексаў. «Таполя» несла дзяжурства на хаду, магла запусціць ракету са свайго маршруту ў любы момант. Спецыялісты казалі, што за акіянам таксама спрабавалі стварыць падобны тэхнічны цуд. Але не змаглі.
Па якіх непасрэдна цэлях павінны былі вылятаць ракеты з беларускіх лясоў, ужо не даведацца. Тыя даныя лічыліся страшнай тайнай. Нават камандзіры ракетных палкоў яе не ведалі. Іх задача была правесці пуск. Каардынаты ж палёту і маршрут закладвалі ў праграмны блок кожнай ракеты камандзіраваныя маўклівыя спецыялісты са спецыяльнага аддзела Генеральнага штаба.
І яшчэ адзін беларускі след у тых цягачах, на якія чаплялі «Піянеры» і «Таполі». Іх рабілі ў нас, у Мінску, на заводзе колавых цягачоў.
Яшчэ ракетная дывізія мела ўласную авіяцыю — цэлую верталётную эскадрыллю. Чаго не мелі ні пяхотныя, ні танкавыя, ні артылерыйскія дывізіі. Ракетчыкам тады нічога не шкадавалі.
На момант распаду СССР у складзе 49-й ракетнай дывізіі налічваліся 4 ракетныя палкі, якія стаялі ў Мінойтах, Гезгалах, Ружанах і Шэрышаве. Дывізія пасля тых палітычных змен адразу перайшла ў склад расійскіх Узброеных Сіл. І хаця некаторыя гарачыя галовы дагэтуль шкадуюць аб тым кроку, лічачы страту міжкантынентальных ракет бядой для Беларусі, лепш усё ж больш цвяроза глядзець на тагачасныя палітычныя рэаліі. Яшчэ адзначу, што валоданне і абслугоўванне такой зброі для нашай маладой краіны было не па сілах. Нават наша суседка Украіна, перападпарадкаваўшы сабе дзве ракетныя дывізіі (у Хмяльніцкім і Першамайску), змагла «цягнуць» іх на сваіх плячах вельмі нядоўга.
170-ы ракетны полк у Мінойтах працягваў несці баявое дзяжурства і тады, калі ўсе астатнія часці 49-й дывізіі ўжо былі выведзены ў Расію. Менавіта яго ракетныя комплексы пакідалі Беларусь апошнімі. Рэпартажы, як іх грузілі і адпраўлялі, абляцелі ўсе тэлеканалы свету. У той дзень, 26 лістапада 1996 года, Беларусь канчаткова станавілася без'ядзернай.
Мне пашчасціла бываць у ракетным палку ў яго лепшыя часы. Сакрэтнасць у такіх часцях падтрымлівалася неймаверная. Але ўдалося і баявую службу паглядзець. Па некалькі сутак афіцэры дзяжурнай змены не паднімаліся з каманднага пункта, схаванага глыбока ў зямлі. Суткі за суткамі, удвух, у цесным круглым памяшканні дыяметрам недзе ў тры метры ўсяго. І кнопка «Пуск» на пульце пад рукой — кнопка сапраўднага «атамнага» пуску. Каб атрымаць права на дзяжурства, кожны афіцэр вучыўся і трэніраваўся пастаянна. У ракетных войсках было шмат дубліруючых сістэм кіравання, але непасрэдны запуск ракет ажыццяўляўся з пульта дзяжурнай змены вось тут, у самім ракетным палку.
Ракетчыкі тады ўжо ведалі, што іх выведуць з Беларусі. Вельмі не хацелі пакідаць мясцовы край. Каторыя ж і пажаніліся тут з мясцовымі дзяўчатамі. Многіх пасля накіравалі працягваць службу ў Забайкалле. Там, у населеных пунктах з суровым кліматам і безаблічнымі назвамі тыпу Ледзяная, Алавяная, Дравяная, беларускую Ліду будуць памятаць асабліва. А тэрыторыю былога палка ў Мінойтах, якая страціла ваенны статус, аблюбавалі прадпрымальнікі. Там і тэхніку рамантавалі, і мэблю выраблялі, і нават грыбы вырошчвалі.
На месцы колішняга ракетнага гарадка ў Лідзе — сёння пагранічны атрад. Пагранічнікі таксама сцерагуць беларускія межы. Але не стратэгічныя, а надзённыя, памежныя. Дарэчы, у іх музеі клапатліва зберагаюцца вельмі цікавыя матэрыялы і пра сваіх папярэднікаў у Паўночным ваенным гарадку — 49-ю ракетную дывізію. Такі ж даволі змястоўны музей ёсць і ў авіятараў. Абодва музеі такія розныя, на першы погляд. Але яны на адну агульную тэму — пра ваенную гісторыю беларускай Ліды. І пра сучаснасць.
Вікенцій Ключнік.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».