Колішні старшыня сельсавета, а цяперашні пенсіянер Анатоль Забалотны з в. Лучын Рагачоўскага раёна, па сведчанні аднавяскоўцаў, вельмі добры апавядальнік. Але вось занатоўваць свае расказы пра мінулае не любіць. Таму сябры зрабілі гэта за яго дый даслалі гісторыі з гераічнага мінулага земляка разам з некалькімі фотаздымкамі на конкурс у «Звязду».
А мінулае ў Анатоля Андрэевіча сапраўды цікавае. У свой час ён служыў на Паўночным флоце, ды не абы-дзе, а на сакрэтнай базе ў раёне Мурманска. Падводныя лодкі прыходзілі на базу для замены выпрацаваных ядзерных стрыжняў у рэактарах. «Здымкі не лепшай якасці, — чытаем у лісце, — але тое зразумела: здымаць на базе ўвогуле было забаронена, і рабілі гэта літаральна з-пад палы. Але ўсё адно рабілі — хлопцам жа хацелася пакінуць нешта на памяць, а каб «падпольны» фотаапарат не рэквізіравалі, хавалі недзе ў тундры пад камянямі. Затое некаторыя здымкі можна без перабольшання назваць унікальнымі. Напрыклад, вось гэта фота з Брэжневым і Касыгіным — сапраўдны эксклюзіў. Такога ў газетах не было і быць не магло, бо пра гэты візіт нават нідзе не паведамлялася. Гэта быў 1964 год, не апошні для службы Анатоля (тады на флоце служылі 4 гады) і апошні для праўлення Мікіты Хрушчова. Брэжнеў, прыняўшы ў папярэдніка «гаспадарку», першай справай наведваў флаты, каб пераканацца, ці надзейны шчыт (у выглядзе атамных падлодак) у савецкай радзімы. Завітаў і на Грэміху, паблізу якой і месцілася база па замене ядзерных стрыжняў на падлодках. Маладыя марфлотаўцы зрабілі здымак літаральна з рукава, калі высокія госці выходзілі з дзіцячага садка, правяраючы ў тым ліку, як жывуць дзеці марскіх афіцэраў».
Да камянёў, што паслужылі фонам для другога здымка, Брэжнева, вядома ж, не вадзілі. «А было б, сучаснай мовай кажучы, «прыкольна», — мяркуюць нашы чытачы. — Бо ці не гэты лозунг — «Як хочацца дамоў» — адлюстроўвае мэты і памкненні кожнага чалавека значна лепш, чым тагачасны дэвіз «Наша мэта — камунізм»? На фоне таго прапагандысцкага закліку, побач з выявамі Леніна, Маркса ды Энгельса, якія суправаджалі савецкіх людзей хоць у калгасным клубе, хоць на сакрэтнай марской базе, таксама фатаграфаваліся. Але, як той казаў, ужо зусім з іншымі пачуццямі».
* * *
Шаноўныя чытачы! Давайце пагартаем сямейныя альбомы разам! Фотаздымкі з гісторыяй (не больш за тры здымкі) дасылайце на рэдакцыйную пошту альбо электронную скрыню іnfо@zvуаzdа.mіnsk.bу. Аўтар найлепшага фота з гісторыяй будзе адзначаны каштоўным прызам.
Увага! Да ўдзелу ў конкурсе НЕ ПРЫМАЮЦЦА вясельныя фотасесіі, леташнія здымкі з курорта і сучасныя фота дзяцей. Арыгіналы дасланых фотаздымкаў абавязкова вяртаюцца аўтарам.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.