Праваахоўнікі Віцебшчыны раскрылі крымінальныя схемы ў дзейнасці двух прадпрыемстваў, якія займаюцца перапрацоўкай малака.
— Была заведзена крымінальная справа ў дачыненні да дырэктара Верхнядзвінскага масласырзавода, — паведаміў «Звяздзе» Ігар
Яўсееў, начальнік УУС Віцебскага аблвыканкама. — Было ўстаноўлена, што дэпутат раённага Савета дэпутатаў у перыяд з мая па жнівень 2010 года, каб пазбегнуць дысцыплінарнай адказнасці за невыкананне прагнозных паказчыкаў вытворчасці, з мэтай стварэння бачнасці выканання даведзеных паказчыкаў па тэмпах росту аб'ёмаў вытворчасці прадукцыі, сумесна з іншымі службовымі асобамі таварыства арганізаваў фіктыўную ўзаемную пастаўку малака паміж прадпрыемствамі. У прыватнасці, паміж ААТ «Верхнядзвінскі масласырзавод» і ААТ «Полацкі малочны камбінат» — шляхам сустрэчнай адгрузкі ў адрас ААТ «Полацкі малочны камбінат» атрыманага ад яго ж малака без фактычнай прыёмкі і адгрузкі.
У выніку былі зроблены прыпіскі на суму больш як 4,3 мільярда рублёў. Прадпрыемству быў нанесены матэрыяльны ўрон — 130 мільёнаў рублёў — у выглядзе выдаткаў на аплату транспартных паслуг, неабгрунтаванага налічэння і выплаты заработнай платы і прэмій. За парушэнне закона прадугледжана пазбаўленне волі на тэрмін да 10 гадоў.
— Была заведзена крымінальная справа і ў дачыненні да дырэктара Пастаўскага малочнага завода. Ён таксама ў 2010 годзе сумесна з іншымі службовымі асобамі арганізаваў неабгрунтаваную пастаўку малака на Лепельскі малочнакансервавы камбінат і фіктыўную ўзаемную пастаўку малака на Глыбоцкі малочнакансервавы. Гэта спрыяла завышэнню статыстычнай справаздачнасці па аб'ёмах вытворчасці прадукцыі на суму 4,6 мільярда рублёў. У выніку кіраўніку і работнікам прадпрыемства незаконна былі зроблены грашовыя выплаты стымулюючага характару і павялічана заработная плата на агульную суму больш як 35,3 мільёна рублёў, — дадаў начальнік УУС.
Паколькі шкода была пакрыта ў поўным аб'ёме, крымінальная справа спынена.
Аляксандр ПУКШАНСКІ.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».