Японскую экзотыку, якая так прываблівае турыстаў з усіх краін свету, сёння можна пабачыць, не выязджаючы з Магілёва. Прыйсці ў захапленне ад знакамітых храмаў, наведаць чайную цырымонію, пабываць на нацыянальным свяце прапануе выстава «Традыцыі і культура Японіі», якая нядаўна адкрылася ў абласным краязнаўчым музеі імя Раманава.
Сярод экспанатаў — макеты архітэктурна-ландшафтных кампазіцый з выявай храмаў, палацаў, замкаў, якія ўнесены ў спіс культурнай спадчыны ЮНЕСКА, 12 планшэтаў-«месяцаў», дзе адзначаны галоўныя святы краіны, ёсць нават невялічкая кампазіцыя «свята хлопчыкаў», якая стварае ўражанне аб адным з іх. Гэтае свята мае статус нацыянальнага і адзначаецца ў Японіі 5 лютага. Акрамя іншага, уяўленне аб Краіне ўзыходзячага сонца перадаюць лялькі, маскі, посуд для чаявання, вопратка і шмат чаго іншага. Усяго пасольствам Японіі прадстаўлена больш за 100 экспанатаў. Як адзначыла вядучы навуковы супрацоўнік музея Алена Даўляшэвіч, такая падрабязная і разнастайная выстава, якая ахоплівае ўсе бакі японскай культуры, прадстаўлена ў Магілёве ўпершыню. Магчымасць убачыць яе ў жыхароў горада ёсць да 22 лютага.
А вось азнаёміцца з палотнамі мастакоў Венгрыі, якія зараз экспануюцца ў абласным мастацкім музеі імя Паўла Масленікава, можна толькі да 9 лютага. Карціны 24 знакамітых аўтараў канца ХІХ сярэдзіны ХХ стст. з калекцыі Дзяржаўнага музея імя Я. Дам'яніча «прыехалі» ў нашу краіну са старажытнага венгерскага горада Сольнак.
Нэлі ЗІГУЛЯ
Канцэрт для дзяцей і моладзі, пластычны спектакль Ягора Дружыніна і «Рок-панарама».