Перад пачаткам традыцыйнай калегіі Генпракуратуры па выніках мінулага года галоўны пракурор краіны Аляксандр КАНЮК адказаў на пытанні журналістаў. Адно з іх датычылася трагедыі, якая адбылася ў маскоўскай школе. У мінулы панядзелак дзесяцікласнік прыйшоў на ўрок з вінтоўкай і забіў настаўніка геаграфіі, а затым паліцэйскага, якога выклікаў школьны ахоўнік... Пасля гэтага расійскія ўлады ўсур'ёз задумаліся аб узмацненні мер бяспекі ў школах.
— Расійскія калегі маюць рацыю, калі кажуць, што трэба наводзіць парадак у школах, — пракаментаваў Аляксандр Канюк. — У кожнай з іх павінен быць ахоўнік. Прычым гэта павінен быць прафесіянал, фізічна падрыхтаваны, моцны мужчына з нейкім арсеналам. Але не з гумавай дубінкай, якая нічога не дае. Мы, у сваю чаргу, думаем, над алгарытмам сваіх дзеянняў па навядзенні парадку ў беларускіх школах. Гэта ні ў якім разе не павінна быць кампанейшчына. Трэба папярэджваць злачынствы, і новы закон аб прафілактыцы, які ўступае ў сілу 16 красавіка, дае нам у гэтым плане больш паўнамоцтваў.
Генеральны пракурор расказаў таксама аб праверцы, якая праводзіцца на «Віцебскдрэве», пра гучную калійную справу і пра меры, якія прымаюцца ў дачыненні да ананімных інтэрнэт-карыстальнікаў.
У дачыненні ААТ «Віцебскдрэў» завялі справу
— Мы праводзім праверку «Віцебскдрэва» па даручэнні Прэзідэнта. Як толькі пераканаліся, што ёсць усе падставы для завядзення крымінальнай справы, мы яе завялі. Але не ў дачыненні да канкрэтных асоб, а па факце нанясення шкоды дзяржаве зрывам тэрмінаў мадэрнізацыі. У межах гэтай справы праводзім праверку, устанаўліваем вінаватых, суму шкоды, якая нанесена дзяржаве. Будзем падаваць іскі ў суд аб яе кампенсацыі.
Мадэрнізацыя мае на ўвазе вызначаныя тэрміны і графікі. Гэта значыць, што прадпрыемства павінна своечасова пачаць выпуск прадукцыі. Але калі гэтага не адбываецца, хто адкажа за тое, што дзяржава ўклала грошы і не атрымлівае выгаду? Гэта ўпушчаная выгада. І яе неабходна спаганяць з вінаватых асоб. Рацыянальнае выкарыстанне бюджэтных сродкаў і пытанні безгаспадарлівасці — сёлета гэта адзін з прыярытэтных кірункаў нашай дзейнасці.
Журналісты выказалі занепакоенасць, што празмерная ўвага да прадпрыемстваў можа нашкодзіць тым, хто добрасумленна працуе. Ці не стане гэта «паляваннем на вядзьмарак»?
— Ні пра якое «паляванне на вядзьмарак» гаворка не вядзецца. Няма прычын для хваляванняў. Мы гаворым выключна аб беражлівым выдаткоўванні дзяржаўных сродкаў. Калі ў кіраўніка далёка не самага буйнога прадпрыемства 12 намеснікаў ці 50 службовых машын, то такія факты ігнараваць нельга, трэба прымаць меры.
— Акрамя таго, мы праверым выкананне падатковага заканадаўства, у тым ліку Міністэрствам па падатках і зборах, а таксама мясцовымі органамі, — прадоўжыў Аляксандр Канюк. — На жаль, пакуль у Беларусі яшчэ няма разумення таго, што падатковыя злачынствы — адны з самых цяжкіх. Калі не выплаціў падатак, напрыклад, у Германіі — праз дзень будзеш у турме. У нас такога менталітэту яшчэ няма, у нас занадта лёгкае стаўленне да падаткаў.
Пра калійную справу
«Мы будзем падаваць іск у суд і спаганяць матэрыяльную шкоду незалежна ад таго, будзе чалавек прыцягнуты да крымінальнай адказнасці ці не. Гэта датычыцца і калійнай справы, і справы па «Віцебскдрэве», калі віна будзе даказана. У Беларусі прапрацоўваецца пытанне аб змяненні судовай практыкі ў частцы спагнання шкоды. Сёння такое паняцце, як упушчаная выгада, не адносіцца да рэальнай шкоды ў межах крымінальнай справы і не з'яўляецца прадметам даказвання. Але мы будзем заяўляць іскі ў рамках грамадзянскага судаводства і спаганяць гэтую страчаную выгаду.
Калійная справа яшчэ расследуецца, наладжана актыўнае супрацоўніцтва з расійскімі калегамі. Я хачу, каб вы разумелі, што мы не перадавалі ў Расію цалкам справу, а толькі асобныя матэрыялы з яе (Ген-
пракуратура Беларусі дала згоду на выдачу Расіі затрыманага ў Мінску гендырэктара «Уралкалія» і кіраўніка назіральнага савета Беларускай калійнай кампаніі (БКК) Уладзіслава Баўм-
гертнера). Мы працягваем расследаваць «калійную справу» і выяўляць беларускіх грамадзян, якія маюць дачыненне да гэтай шкоды (следчыя органы Беларусі лічаць, што супрацьпраўныя дзеянні Баўмгертнера і шэрагу іншых топ-менеджараў БКК нанеслі «Беларуськалію» і БКК шкоду ў памеры да $100 млн).
Пра зневажанні на форумах
Што тычыцца абраз у інтэрнэце, на форумах, то, як адзначыў Генпракурор, нядаўна ўстанавілі факт абразы адной высокай службовай асобы выканкама.
«Вылічыць гэтага чалавека было складана, бо на форумах людзі хаваюцца пад несапраўднымі фота, псеўданімамі. Тым не менш, вылічылі. Гэты чалавек, які «паліваў брудам» чыноўніка, жыве недалёка ад выканкама. На першы раз мы яго папярэдзілі. Будзем і надалей адсочваць правапарушэнні ў інтэрнэце. Людзі павінны разумець, што бясследна гэта не пройдзе».
Надзея ДРЫЛА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».