Пацыенты недаацэньваюць праблемы болю ў суставах і пазваночніку, а значыць, позна звяртаюцца да ўрача. Эфектыўнасць жа лячэння залежыць ад ранняй дыягностыкі захворванняў суставаў.
— Як правіла, дыягностыку суставаў пачынаюць з правядзення рэнтгенаграфіі, — расказвае ўрач-рэўматолаг 3-й цэнтральнай раённай клінічнай паліклінікі г. Мінска Алена СІДАРОВІЧ. — На здымках можна ўбачыць прыкметы пашкоджання — парушэнні адпаведнасці сустаўных паверхняў, касцявыя разрастанні па краі храстка, участкі адкладання кальцыю... Некаторыя суставы можна даследаваць з дапамогай ультрагуку. Ён дэталізуе мяккія тканкі, асабліва тыя, што акаляюць сустаў — сухажыллі, звязкі, мышцы. Гэты метад досыць дакладны, аднак лепш за ўсё падыходзіць для выяўлення захворванняў менавіта калясустаўных тканак...
Калі неабходна даследаваць унутраны склад сустава, праводзяць пракол (пункцыю) сустаўнай капсулы з заборам сінавіяльнай вадкасці. Яе аглядаюць візуальна і пад мікраскопам у пошуку інфекцыйных узбуджальнікаў, а пры неабходнасці могуць пасеяць на спажыўнае асяроддзе для бактэрыялагічнага даследавання.
Існуе метад, які дазваляе пабачыць сустаў знутры. Ён называецца артраскапіяй
і заключаецца ў аглядзе ўнутранай поласці з дапамогай эндаскопа, уведзенага праз пракол. Падчас такога даследавання можна ўзяць і біяпсію — кавалачак сінавіяльнай капсулы, а таксама правесці некаторыя лячэбныя маніпуляцыі.
Часам для дыягностыкі захворванняў суставаў звяртаюцца да камп'ютарнай тамаграфіі і магнітна-рэзананснай тамаграфіі.
Камп'ютарная тамаграфія
На камп'ютарным тамографе атрымліваюцца здымкі ў выніку рэнтгенаўскага выпраменьвання. Ён працуе на прынцыпе рознай празрыстасці розных тканак арганізма, у тым ліку касцявой і храстковай. Камп'ютарны тамограф з'яўляецца, па сутнасці, рэнтгенаўскай устаноўкай, якая робіць серыю здымкаў з розных пазіцый. Устаноўка складаецца з рухавай кушэткі, на якой размяшчаецца пацыент, і спецыяльнай трубкі, якая падае і ловіць рэнтгенаўскія прамяні. Далей камп'ютар апрацоўвае і суміруе звесткі. Канчатковую ж ацэнку дае ўрач. Такі метад нельга выкарыстоўваць у масавых абследаваннях, паколькі апраменьванне чалавека падчас даследавання досыць вялікае.
Камп'ютарная тамаграфія добра перадае стан касцей, што дазваляе выкарыстоўваць яе для вызначэння менавіта касцявых траўмаў і розных пашкоджанняў. КТ вызначае памер сустава, сустаўнай шчыліны, якасць сустаўных паверхняў, колькасць сінавіяльнай вадкасці ў сустаўнай сумцы, астэафіты, храстковыя разрастанні, наяўнасць ацёку ў суставе і інш. Даследаванне падобнае да рэнтгенаграфіі, якая якраз лепш за ўсё ўспрымае касцявыя структуры.
Супрацьпаказанні: клаўстрафобія, цяжарнасць.
Камп'ютарную тамаграфію ў Мінску можна зрабіць:
*2-я гарадская клінічная бальніца (т. 327 50 36)
*5-я гарадская клінічная бальніца (т. 296 49 63, 296-34-25)
*6-я гарадская клінічная бальніца (т. 245 18 23)
*9-я гарадская клінічная бальніца (т. 272-45-94)
*Гарадская клінічная бальніца хуткай медыцынскай дапамогі
(т. 201 90 51, 287 00 10)
*10-я гарадская клінічная бальніца (т. 345 32 71)
*11-я гарадская клінічная бальніца (т. 225 88 14)
*Мінскі кансультацыйна-дыягнастычны цэнтр (т. 270 21 42)
*38-я гарадская паліклініка (т. 225 81 89)
*Мінскі гарадскі клінічны анкалагічны дыспансер (т. 292 91 62)
*МСЧ ААТ «МАЗ» (т. 217 23 82)
*Мінская абласная клінічная бальніца (т. 265 22 24, 265-22-56)
*Рэспубліканскі клінічны медыцынскі цэнтр (т. 328-64-64, 227-82-63)
*Рэспубліканская клінічная бальніца медыцынскай рэабілітацыі (п. Аксакаўшчына — т. 509-72-42)
*РНПЦ неўралогіі і нейрахірургіі (т. 267 12 40, 263 38 96)
*РНПЦ траўматалогіі і артапедыі (т. 279 78 03)
*РНПЦ анкалогіі і медыцынскай радыялогіі імя М.М. Аляксандрава (т. 265 34 10, 268-31-93)
*РНПЦ «Маці і дзіця» (т. 288 96 40, 288 94 75)
*РНПЦ пульманалогіі і фтызіятрыі (т. 289 83 52).
Магнітна-рэзанансная тамаграфія
Магнітна-рэзанансны тамограф працуе на аснове магнітнага поля, у якое змяшчаюць пацыента. Падчас уздзеяння хвалямі на тканкі ў іх узнікае рэзананс атамаў вадароду — гэта фіксуюць датчыкі і перадаюць у камп'ютар, які апрацоўвае звесткі і пераводзіць у чорна-белую выяву (форму, даступную для інтэрпрэтацыі). Здымкі выконваюцца паслойна, таму на іх удаецца з вялікай дакладнасцю вызначыць паталагічныя змяненні. На здымках добра відаць мяккія тканкі (храсткі, сустаўную капсулу, сухажыллі, мышцы, звязкі, дыскі, меніскі, сумкі, сасуды, спінны і галаўны мозг, рэпрадуктыўную сістэму і інш). Часам праводзяць і КТ, і МРТ — для пастаноўкі максімальна дакладнага дыягназу.
Супрацьпаказанні: наяўнасць у пацыента кардыястымулятара, які працуе па запыце (змены магнітнага поля могуць імітаваць сардэчны рытм), наяўнасць электронных імплантантаў унутранага вуха, кліпсіраваных сасудаў у цэнтральнай нервовай сістэме (кліпсы пад уплывам поля могуць саслізнуць і адкрыецца ўнутрымазгавы крывацёк). Адносныя супрацьпаказанні: кома або іншыя станы, пры якіх неабходны апараты жыццезабеспячэння (напрыклад, штучная вентыляцыя лёгкіх), дзіцячы ўзрост, парушэнні свядомасці, клаўстрафобія.
Падобныя абследаванні праводзяцца толькі па накіраванні ўрача, платна, па папярэднім запісе.
Магнітна-рэзанансную тамаграфію можна прайсці ў наступных медыцынскіх установах Мінска:
*2-я гарадская клінічная бальніца (т. 327 50 36)
*5-я гарадская клінічная бальніца (т. 296 49 63)
*6-я гарадская клінічная бальніца (т. 245 18 23)
*Бальніца хуткай медыцынскай дапамогі (т. 201 90 51, 287 00 10)
*Мінскі кансультацыйна-дыягнастычны цэнтр (т. 270 21 42)
*Мінская абласная клінічная бальніца (т. 265 52 58)
*Рэспубліканская клінічная бальніца медыцынскай рэабілітацыі (п. Аксакаўшчына — т. 509 72 42)
*Рэспубліканскі клінічны медыцынскі цэнтр (т. 200 40 74)
*РНПЦ неўралогіі і нейрахірургіі (т. 267 12 40)
*РНПЦ траўматалогіі і артапедыі (т. 279 78 03)
*РНПЦ анкалогіі і медыцынскай радыялогіі імя М.М. Аляксандрава (т. 265 32 91)
*РНПЦ «Маці і дзіця» (т. 288 96 40, 288 94 75)
*Медыцынскі цэнтр «Авіцэна» (т. 271 84 22, 271 53 26)
*Медыцынскі цэнтр МТЗ (т. 230 07 13).
Святлана БАРЫСЕНКА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».