«... І Нарвегія з рагамі. Кругом!»
Фраза, якую кінуў камусьці ў тэлефонную трубку вядомы каментатар тэлеканала «Расія» Дзмітрый Губерніеў, праходзячы міма. Вядома, нічога крыўднага для краіны, што мяжуе з Палярным кругам, журналіст не сказаў. Наадварот: ён меў на ўвазе шматлікіх нарвежскіх балельшчыкаў, нашчадкаў грозных вікінгаў, якія радаваліся, як дзеці, у сваіх «рагатых» масках, размаляваных у нацыянальныя чырвона-сінія колеры. Увесь лыжна-біятлонны стадыён «Лаура» (вышыня над узроўнем мора 1470 м) да глыбокай ночы стаяў, як кажуць, «на вушах».
Яшчэ б! Радавацца ў іх была нагода, і не адна. Ужо ў суботу, у першы дзень медальных спаборніцтваў, скандынавы захапілі лідарства ў медальным заліку — адразу 4 узнагароды (2 «золаты», «серабро» і «бронза»). Спачатку лыжніца Марыт Б'ерген першынствавала ў скіятлоне. Яна апярэдзіла ўсіх на дыстанцыі 15 кіламетраў (7,5 км класічным стылем + 7,5 — свабодным, або «каньковым»). І гэта ўжо чацвёртае алімпійскае «золата» ў кар'еры 33-гадовай спартсменкі.
А затым адбылася проста неверагодная гісторыя: 40-гадовы біятланіст Уле-Айнар Б'ёрндален папоўніў сваю калекцыю ўзнагарод, выйграўшы сёмы залаты медаль Алімпійскіх гульняў (першае «золата» нарвежац узяў яшчэ ў японскім Нагана ў далёкім ужо 1998-м). Найлепшы біятланіст у сусветнай гісторыі (яго ўжо сёння, яшчэ дзеючага спартсмена, называюць так) з адным промахам фінішаваў у спрынтарскай гонцы на першым месцы.
«Былі сумненні, — сказаў ён адразу пасля фінішу. — Але, напэўна, я змог сканцэнтравацца своечасова, змог вытрымаць тэмп і хуткасць да апошняга круга на гэтай самай складанай трасе з усіх, дзе мне давялося выступаць». Нарвежац адзначыў, што адчувае сябе поўным сіл, нягледзячы на ўзрост: «Здавацца не збіраюся, буду змагацца і далей. За спінай у мяне — добрая падтрымка таварышаў, выдатная матывацыя. Адсюль і вынік».
А як на гэтым фоне нашы? У суботу ўся пяцёрка, якая брала ўдзел у стартах, была далёкая ад п'едэстала. Спачатку няўдала выступіла лыжніца Алена Саннікава, яна заняла ў згаданым ужо скіятлоне 53-е месца з 62 удзельніц. Праўда, сама спартсменка не выглядала засмучанай. Вашаму карэспандэнту ў мікст-зоне (спецыяльнае месца, дзе алімпійцы маюць права даваць інтэрв'ю. — Аўт.
) яна, між тым, адзначыла: «Я прайграла ўсім саперніцам, у якіх раней выйгравала — па паўхвіліны ці нават па цэлай хвіліне. Не ведаю, з чым гэта звязана... Можа, з тым, што у нас дома да сярэдзіны студзеня не было снегу і мы доўга не стартавалі. Наступныя гонкі будуць абавязкова лепшымі. Скіятлон — не апошняя дысцыпліна, і нават не асноўная, дзе я змагу паказаць усё, на што здольная. Вельмі спадзяюся на 10-кіламетровую гонку класічным стылем і «трыццатку» каньковым».
Алена таксама сказала, што беларускія лыжнікі не маюць у Сочы ніякіх праблем. «Усе нашы службы забеспячэння, сэрвісмены, урачы, масажысты працуюць выдатна, таму і ўражанні пазітыўныя. А яшчэ хацелася б адзначыць, што мясцовая публіка вельмі прыязна ставіцца да беларускіх спартсменаў, падтрымлівае іх падчас стартаў. Гэта таксама дае сілы».
Сіл, дарэчы, не хапіла і чацвёрцы нашых біятланістаў: Уладзімір Чапелін у спрынце — 29-ы, Сяргей Новікаў — 33-і, Яўген Абраменка — 56-ы, Юрый Лядаў — 57-ы (усяго на спрынт выйшла 87 біятланістаў). Крыху радуе, што беларусы змогуць пазмагацца ў гонцы праследавання.
«Гонка праследавання ў мяне — самая любімая, — распавёў Уладзімір Чапелін. — Не магу падвесці балельшчыкаў. Перад Алімпіядай для нас было зроблена ўсё неабходнае. Гэта мой дэбют на Алімпійскіх гульнях, і мне вельмі хочацца, каб ён запомніўся не толькі першымі стартамі, але і паспяховым выступленнем. Першыя хваляванні пройдуць, так што ўся барацьба — наперадзе!».
«Гэта была трэніроўка...»
Так ацаніла сваё выступленне лідар нашай біятлоннай каманды Дар'я Домрачава, якая ў нядзелю вечарам не змагла ўвайсці ў лік медалістаў у спрынтарскай гонцы на 7,5 кіламетра. Першы стрэл — у «малако». І, хоць астатнія мішэні Дар'я закрыла, той промах стаў фатальным: толькі дзявятае месца.
Так склалася, што пасля гонкі я спускаўся па канатнай дарозе, седзячы ў адной кабінцы з Дар'яй. Была яшчэ пара валанцёраў-расіян, і таму ў іх прысутнасці наша галоўная медальная алімпійская надзея была нешматслоўнай. Але сказала, што не расчаравана няўдачай.
— Аптымізму не губляю. Наперадзе мая любімая дысцыпліна — гонка праследавання. Затым — індывідуальная гонка. Там будзе ўсё па-іншаму. Сёння медаль у мяне адабраў парыў ветру: ён нечакана змяніў напрамак — якраз у момант першага выстралу. Зрабіла папраўку, і далей пайшло нармальна.
— Усе скардзяцца на складаную трасу...
— Гэта праўда. Тут жа, па сутнасці, сярэднягор'е, недахоп кіслароду адчуваецца. Акрамя таго — нізкая вільготнасць паветра. Ну і траса вельмі няпростая. Пастаянныя пад'ёмы-спускі, крутыя віражы, калі думаеш: толькі б упісацца ў паварот. Упадзеш — усё... Нервы таксама трэба мець жалезныя, а мы ж усяго толькі людзі.
Нічога тут не дабавіш. Як склалася — так склалася. Забыцца пра першую няў-
дачу і рыхтавацца да новых гонак. Тым больш што ўсе ўмовы для гэтага ёсць.
Застаецца дадаць, што астатнія тры нашы біятланісткі выступілі наступным чынам: Надзея Скардзіна была 17-й, Настасся Дубарэзава — 34-я, Людміла Калінчык — 37-я (з 84 удзельніц). І Надзея, і Людміла пасля гонкі былі настроены аптымістычна, а вось Насця Дубарэзава не ўтойвала слёз у мікст-зоне: «Спадзявалася, што будзе лепш. Цяжка было бегчы».
Цяжка было ўсім. Тут усё залежыць ад многіх фактараў — як складуцца абставіны. У нядзелю яны склаліся выдатна для расійскай «славачкі» Анастасіі Кузьміной, расіянкі Вольгі Вілухінай, украінкі Віты Семярэнка, якія ўзышлі на п'едэстал.
Вось хто змагаецца ў Сочы па-сур'ёзнаму, дык гэта амерыканцы. Першым чэмпіёнам сёлетняй Алімпіяды стаў менавіта заакіянскі спарстмен: сноўбардыст Сэйдж Котсенбург атрымаў перамогу ў мужчынскіх спаборніцтвах па слоўпстайле.
А вось яго суайчынніку, бабслеісту Джоні Куіну, паспяхова выступіць перашкодзіла... нечаканасць. «Я прыняў душ, а калі сабраўся выйсці з ваннай, то ўбачыў, што дзверы замкнёныя. Таму быў вымушаны выкарыстаць бабслейны штурхач, каб выбіць дзверы і трапіць на волю», — напісаў Куін у Твітары.
Застаюцца пытанні. Чаму містар Куін пайшоў у ванную са штурхачом? Можа, што-небудзь ці хто-небудзь вырашыў сарваць планы амерыканца па заваяванні медаля? Ці, напалоханы празмернымі мерамі бяспекі, ён вырашыў, што ў выпадку чаго і штурхачы спатрэбяцца?
Дарэчы,
Пра бяспеку
Гэта мы адчулі адразу, калі самалёт з беларускай дэлегацыяй на борце яшчэ толькі прызямляўся ў аэрапорце Адлера. З ілюмінатара было добра відаць, як праз кожную сотню метраў уздоўж перыметра агароджы расстаўлены паліцэйскія і армейскія патрулі. З сабакамі і без, у машынах і без іх. Намаганні па забеспячэнні бяспекі Алімпіяды і перад яе пачаткам і асабліва цяпер былі сканцэнтраваны менавіта на авіярэйсах. Вось адна з прычын гэтага. Улады ЗША папярэджвалі кампаніі ўсяго свету аб магчымасці праносу ўзрыўчаткі на борт самалётаў нават у цюбіках ад зубной пасты. Таму расійскімі ўладамі было забаронена пасажырам самалётаў праносіць на борт любыя вадкасці, гелі ці пасты, нават у ёмістасцях да 100 мл, якія ў іншых краінах дазволены.
Алімпійскі парк ахоўваецца таксама выключна строга. Над лыжным стадыёнам «Лаура» пастаянна кружыцца верталёт, вісіць пара дырыжабляў. Відаць па ўсім, сканіруюць тэрыторыю. Зусім блізка — праблемныя расійскія раёны. Паўночны Каўказ. Мясцовыя калегі кажуць, што на вяршынях гор, якія акружаюць Алімпійскі парк, устаноўлены батарэі зенітных ракет. Усе лясы, якія прылягаюць да дарог, што вядуць да спартыўных аб'ектаў, кругласутачна патрулююць. Паліцыя ў магазінах, банках, кавярнях. Яна ветлівая, але строгая. (Карэспандэнт «Звязды» ў іх чамусьці карыстаецца даверам. Наогул да беларусаў стаўленне тут вельмі добрае)... Гэта — што датычыць быту. Але варта трапіць на сам спартыўны аб'ект — усё выглядае як звычайнае спартыўнае мерапрыемства.
Як свята!
Карэспандэнт «Звязды» Анатоль Сланеўскі — з Сочы
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!