Вы маеце права адмовіцца ад прышчэпак, але неапраўдана рызыкуеце. Вы падвяргаеце такім чынам небяспецы не толькі ўласнае жыццё, але і жыццё іншых людзей. Калі ваша дзіця не атрымала прышчэпкі, значыць, яго будучыня пад пагрозай. Такую пазіцыю займаюць медыкі.
Паводле слоў намесніцы галоўнага ўрача па медыцынскай частцы 23-й гарадской дзіцячай паліклінікі г. Мінска Ірыны ХОДЗІНАЙ, узбуджальнікі інфекцыйных захворванняў, якія пастаянна цыркулююць у папуляцыі, у першую чаргу пагражаюць непрышчэпленым людзям. Калі ўзбуджальніка «падхопіць» прышчэплены чалавек, ён значна лягчэй перанясе захворванне, без рызыкі лятальнага зыходу.
Нацыянальны каляндар прафілактычных прышчэпак — гэта нарматыўны прававы акт, які вызначае тэрміны і парадак правядзення прышчэпак. І права любога дзіцяці — быць абароненым ад хвароб. Сёння ў свеце прымяняюць вакцыны супраць 40 інфекцыйных захворванняў, а гэта азначае, што ад любой інфекцыі, супраць якой існуе вакцына, бацькі ў стане абараніць сваё дзіця. Менавіта таму ў кожнай краіне дзейнічае свой нацыянальны каляндар прышчэпак, куды ўключаны эфектыўныя і даступныя вакцыны супраць найбольш масавых і небяспечных інфекцый. У нашай краіне ўключаныя ў згаданы каляндар прышчэпкі робяцца бясплатна. На жаль, не ўсе бацькі валодаюць поўнай інфармацыяй, калі становяцца ахвярамі недаверу да прышчэпак.
Коклюш
. Прыкладна ў аднаго з дзесяці дзяцей, якія захварэлі на коклюш, развіваецца запаленне лёгкіх, у аднаго з 50-ці ўзнікаюць сутаргі, у аднаго з 250-ці — энцэфалапатыя (паражэнне галаўнога мозга). Коклюш і яго ўскладненні могуць прывесці да гібелі.
Дыфтэрыя. 10-12 чалавек з 100 непрышчэпленых паміраюць. У выпадку выздараўлення часта маюць месца ўскладненні з боку сардэчна-сасудзістай сістэмы, нырак і наднырачнікаў.
Слупняк. Таксін, які выпрацоўваецца ў арганізме пры траплянні ўзбуджальніка слупняку, валодае нервова-паралітычным дзеяннем. Практычна ў 100 працэнтах выпадкаў непрышчэпленыя гінуць.
Поліяміэліт. Захворванне выклікае вірус, які пашкоджвае нервовую сістэму і заканчваецца развіццём стойкіх парэзаў (парушэнняў руху) і паралічу (адсутнасці руху) або смяротным зыходам.
Адзёр. Асноўная прычына смерці сярод дзяцей ранняга ўзросту ва ўсім свеце.
Туберкулёз. Застаецца адной з вядучых прычын смерці ў свеце. Пашкоджвае не толькі лёгкія. Носьбітамі бацылы туберкулёзу лічаць кожнага трэцяга зямляніна.
Бацькі, якія не прышчэпліваюць дзяцей, «прапаноўваюць» ім магчымасць:
* з вялікай верагоднасцю стаць інвалідам пасля адру;
* да 2-х месяцаў пакутаваць ад кашлю, а магчыма і перанесці энцэфаліт пры коклюшы;
* мець 10-20-працэнтны шанц захварэць на дыфтэрыю;
* застацца калекам пасля поліяміэліту;
* быць безабаронным перад туберкулёзам, які не ведае межаў для распаўсюджвання;
* атрымаць бясплоднасць (у кожным чацвёртым выпадку для мужчын) пасля перанесенай «свінкі»;
* мець патрэбу ва ўвядзенні супрацьслупняковай сывараткі пасля кожнай траўмы, што звязана з верагоднасцю атрымання анафілактычнага шоку;
* стаць безабаронным перад гепатытам В з перспектывай цырозу і раку печані;
* вырасці і нарадзіць дзіця-інваліда з сіндромам прыроджанай краснухі.
Святлана БАРЫСЕНКА.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.