За вас вырашыць... кашалёк
Інжынеры з Японіі стварылі кашалёк, які можа здзейсніць рэвалюцыю ў сферы эканоміі асабістых сродкаў. Распрацоўшчыкі назвалі гаджэт «Lіvіng wallet», што азначае «жывы партаманет».
Па словах распрацоўшчыкаў незвычайнага кашалька, яго можа сінхранізаваць з планавальнікам бюджэту ў мабільнай прыкладной праграме ўладальніка. Збіраючы інфармацыю аб пакупніцкіх паводзінах, гаджэт праводзіць яе аналіз і прымае рашэнне, варта гаспадару рабіць пакупку ці лепш устрымацца.
Калі сродкі на рахунку пакупніка заканчваюцца, прылада запускае ахоўныя механізмы. Гаджэт спачатку робіць спробу ўцячы ад свайго ўладальніка (для гэтага ў яго ёсць маленькія колы), а калі ў гаспадара атрымаецца злавіць кашалёк, прылада пачынае «крычаць». Калі і гэта не спыніць уладальніка партаманета, ён пачынае рассылаць SMS-паведамленні з просьбай аб дапамозе маці ці яшчэ камусьці, чый нумар быў пазначаны пры наладцы. У выпадку, калі сродкаў на рахунку ўладальніка дастаткова, кашалёк становіцца «хадзячым дарадцам», які дае свайму ўладальніку рэкамендацыі наконт самых разнастайных тавараў у інтэрнэт-краме. Пакуль не паведамляецца, паступіў «жывы» партаманет у продаж ці не.
Варта нагадаць, што высокатэхналагічныя кашалькі раней былі распрацаваны ў Масачусецкім тэхналагічным інстытуце ў ЗША. Праўда, яны былі не смешнымі, а хутчэй жудаснымі.
________________________________________________________________________
У золата можна адзецца
А зрабіць гэта можна ў Індыі — менавіта там стварылі кашулю з чыстага золата. Да твору мастацтва прыкладаюцца таксама залатыя абшэўкі, кольцы і папружка. Кашуля ўпрыгожана шасцю гузікамі з буйнымі крышталямі Swarovskі.
Індыйскі бізнесмен Дата Фудж уразіў прыхільнікаў эксклюзіўнага адзення і заказаў мужчынскую кашулю з чыстага золата. Майстар ствараў свой шэдэўр на працягу двух тыдняў, працуючы па 16 гадзін на суткі. Усяго на кашулю пайшло тры кілаграмы жоўтага золата. Кашуля выканана з залатых пласцін, старанна злучаных паміж сабой. У працы выкарыстоўвалася адмысловая тэхналогія, якая робіць выраб па-сапраўднаму люксавым, але сакрэт яе майстар не раскрыў. Вядома, што залатыя пласціны кашулі мацуюцца да асновы з белага вельвету, каб не падрапаць скуру ўладальніка гэтага цуду моды. Кошт кашулі — $22,5 тысячы, і яна лічыцца самай дарагой у свеце.
________________________________________________________________________
Я не сплю, не сплю, не сплю...
Кітайскія студэнты вынайшлі цікавы (а некаторыя лічаць, што нават геніяльны) спосаб рыхтавацца да іспытаў па начах і не засынаць. Яны з дапамогай прышчэпак прывязваюць валасы да столі або вешалак. Кожны раз, калі студэнт пачынае вадзіць носам, прышчэпкі ўтрымліваюць валасы, і рэзкі рывок за іх не дае заснуць.
Метад стаў папулярным пасля таго, як дзве студэнткі з Універсітэта сельскай і лясной гаспадаркі правінцыі Фуцзянь сфатаграфаваліся ў такім выглядзе і выклалі фота ў інтэрнэт. 20-гадовай Чэнь Тан і яе суседцы па пакоі 21-гадовай Хуань Лю давялося тады спраўляцца з велізарным аб'ёмам матэрыялу, і спаць ім папросту было не было калі, а хацелася.
Яны спрабавалі адагнаць сон звычайнымі метадамі — кафеінам, адцісканнямі і паніжэннем тэмпературы з дапамогай кандыцыянера, але нічога не дапамагала. І тады студэнткі вырашылі пашукаць рашэнне ў падручніках па гісторыі. Яны прачыталі пра двух вядомых кітайскіх навукоўцах, якія практыкавалі крайнія метады, каб захаваць яснасць розуму: калолі сябе іголкамі кожны раз, калі пачыналі засынаць, або прывязвалі валасы да столі. Чэнь вырашыла, што другі метад можа быць эфектыўным, і вырашыла паспрабаваць.
Пасля таго, як яе першы фотаздымак з прывязанымі да прышчэпак валасамі з'явіўся ў сеціве, спосаб, здаецца, стаў вірусным: з кожным днём з'яўляецца ўсё больш і больш такіх фота. Некаторыя студэнты гэтак жа, як Чэнь, выкарыстоўваюць прышчэпкі, іншыя — шалікі.
________________________________________________________________________
Хочаце сыру за... 1200 долараў?
Вырабам самага дарагога сыру ў свеце займаюцца на аслінай ферме ў Засавіка, адным з самых вядомых запаведнікаў Сербіі. Сыр Пуле зроблены з малака асліц і каштуе 1200 долараў за кілаграм.
Адзін з працаўнікоў фермы расказаў, што для вытворчасці аднаго кілаграма самага дарагога сыру трэба 25 літраў свежага малака асліц. Белы, рассыпісты сыр вонкава падобны да іспанскага сыру манчэга, але з больш глыбокім, багатым смакам. Манчэга прадаецца ў еўрапейскіх супермаркетах па параўнальна нізкай цане 20 долараў за кілаграм і з'яўляецца, вядома, больш сціплым варыянтам. У запаведніку таксама вырабляюць малако асліц у бутэльках, якое, як лічыцца, было адной з таямніц прыгажосці Клеапатры. Легендарная егіпецкая царыца штодня прымала ванну з гэтага малака. Іншымі дарагімі сырамі лічацца сыр з малака шведскіх ласіх, які каштуе каля 950 долараў за кілаграм, і Cacіocavallo Podolіco — сыр, выраблены з малака рэдкай італьянскай пароды каровы, якая дае малако толькі ў маі і чэрвені.
Падрыхтаваў Іван Купарвас
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.