Амаль як на вядомай карціне Шагала, закаханыя ў Віцебску могуць «узляцець» над горадам. Такая ўнікальная магчымасць з'явіцца ў Дзень закаханых на вежы сімвала старажытнага Віцебска — ратушы.
— Узняцца на вежу ратушы будзе магчыма толькі ў гэты дзень — 14 лютага (з 17.00 да 21.00 гадзін). Наверсе будынка можна будзе прызнацца ў каханні ці зрабіць прапанову рукі і сэрца. А таксама запусціць у нябёсы паветраны шарык са сваімі запаветнымі пажаданнямі і проста палюбавацца вячэрнім горадам з вышыні птушынага палёту. Закаханыя пары атрымаюць валянцінку з нумарам, каб удзельнічаць у латарэі. Пераможца ж стане ўладальнікам запрашальнага квітка на ўнікальную выставу «Made іn Іtaly», — паведамілі «Звяздзе» ў Віцебскім абласным краязнаўчым музеі.
Цікава, што гараджане і госці Віцебска таксама змогуць пакінуць запіс у «Кнізе рэгістрацыі закаханых». Наведнікам кожнай экспазіцыйнай залы ратушы гарантуюцца сюрпрызы. Запрацуе «Салон чараўніцы», у якім наведнікаў чакаюць карты Таро, варажба на бабах, прадказанне па воску і іншыя забавы. Адкрыецца незвычайнае фотаатэлье. Будзе праведзена і віктарына, падчас якой разыграюць галоўны прыз Дня закаханых — падарункавы сертыфікат на 100 тысяч рублёў у кавярню-кандытарскую «Бісквіт».
Арганізатары незвычайнай экскурсіі ў музей таксама прапануюць астралагічны прагноз для закаханых «Як кахаць…» Усе ахвотныя змогуць наведаць і майстар-клас па выцінанцы члена Саюза Майстроў Беларусі Вольгі Арасланавай. У яе вучняў будзе магчымасць сваімі рукамі зрабіць арыгінальныя сувенірныя паштоўкі.
Аляксандр ПУКШАНСКІ.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.