Чалавецтва з даўніх часоў спрабавала лячыць ускладненні варыкознай хваробы — трафічныя язвы. Сёння варыкоз з'яўляецца вельмі распаўсюджаным захворваннем чалавецтва. Больш за 50 працэнтаў жанчын і 30 працэнтаў мужчын ва ўзросце пасля 40 гадоў пакутуюць ад варыкознага расшырэння вен ніжніх канечнасцяў
.
Паводле слоў загадчыцы хірургічнага аддзялення 11-й гарадской паліклінікі г. Мінска Таццяны ПУНІНСКАЙ, адзінай прычыны гэтага захворвання няма. Існуюць фактары, якія спрыяюць развіццю варыкозу, і фактары, якія запускаюць сам працэс захворвання.
Да першых адносяцца спадчынная схільнасць і жаночы пол. Да другіх — цяжарнасць і роды, цяжкія траўмы ног, цяжкая фізічная праца, працяглае знаходжанне ў становішчы стоячы падчас працы, лішняя вага, гарманальная перабудова, прыём кантрацэптываў і інш.
Развіваецца захворванне гадамі. Спачатку варыкоз праяўляецца адчуваннем стомленасці ў нагах напрыканцы дня, цяжарам у нагах, начнымі сутаргамі. Пасля з'яўляюцца ацёкі, якія праходзяць бліжэй да раніцы, аднак паступова становяцца больш стойкімі. Затым развіваюцца шчыльныя, бурыя, амаль рубцовыя плямы ў ніжняй трэці галёнак.
Сам варыкоз не страшны, калі б не яго ўскладненні — тромбафлебіт і трафічныя язвы. З-за іх важна як мага раней звяртацца на прыём да ўрача-хірурга або флеболага: чым раней пачынаецца лячэнне, тым меншая верагоднасць развіцця ўскладненняў.
Самым сучасным метадам дыягностыкі варыкознай хваробы з'яўляецца ўльтрагук вен з дуплексным сканаваннем. Такое даследаванне дазваляе вызначыць узровень і від варыкозу, што дапамагае хірургу да і падчас аперацыі.
Існуюць кансерватыўныя і аператыўныя метады лячэння. Сярод аператыўных метадаў — малаінвазіўныя (малатраўматычныя). Наогул прымяняецца камбінацыя методык. На пачатковых стадыях захворвання гэта таблеткі і кампрэсійны трыкатаж. Пры адсутнасці эфекту дадаецца склератэрапія: падчас яе ўводзіцца хімічнае рэчыва — склеразант, які склейвае сценкі хворых вен. Цячэнне крыві ў склеразаваных венах спыняецца, і назіраецца добры касметычны эфект. Выбар метаду лячэння застаецца за ўрачом, залежыць ад праяў захворвання і выніку ўльтрагукавога даследавання.
У нашай краіне прымяняюцца ўсе сучасныя методыкі лячэння варыкозу, у тым ліку і лазерная.
Нярэдка пацыенты дрэнна разумеюць сутнасць праблемы, не ўсведамляюць неабходнасці сучаснага аператыўнага лячэння, а мужчыны грэбуюць неабходнасцю нашэння кампрэсійнага трыкатажу. А таму і сёння, пры сучасных магчымасцях лячэння варыкозу, сустракаюцца трафічныя язвы, якія лечацца доўга і часам беспаспяхова.
Святлана БАРЫСЕНКА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.