Пасля пластычнай аперацыі Юля Кубарава правяла чатыры тыдні ў коме... Да апошняй секунды яе бацькі верылі, што іх дачка будзе жыць...
«Пасля смерці Юлі я атрымаў ад яе падарунак»
З таго дня, як Юрый і Ала Кубаравы з Гродна пахавалі сваю адзіную дачку, прайшло больш як 9 месяцаў... Але яны дагэтуль не могуць паверыць, што іх Юлі больш няма... Я гэта, вядома, разумела, таму, калі шчыра, не адразу адважылася набраць нумар Юрыя. Баялася, каб, не дай Бог, нейкім недарэчным пытаннем не закрануць за жывое... Юрый адразу ж пайшоў на кантакт. Мяне ўразіла, наколькі цёпла бацька гаварыў пра сваю дачку. Падумала, што паміж імі былі вельмі адкрытыя, даверлівыя адносіны. І не памылілася.
«У нас было поўнае разуменне, — кажа Юрый. — Юля была доўгачаканым дзіцем. Мы з Алай рабілі для яе ўсё, што маглі. І яна пра нас клапацілася. На сярэбранае вяселле зрабіла нам сюрпрыз: замовіла рэстаран, тамаду. Калі Вадзім, з якім яны 8 гадоў сябравалі, зрабіў прапанову, Юля пачала рыхтавацца да вяселля. Завяла спецыяльны дзённік, каб нічога не забыцца. Сярод пунктаў былі і такія, як «упрыгожыць пакой для выкупу нявесты», «прыгожа адзець тату»... Юля была таленавітым дызайнерам. За што б ні бралася, усё хацела давесці да ідэальнага стану... Вельмі даражу прыгожым будаўнічым касцюмам, які Юля правезла мне з Літвы. Казаў ёй, «дачушка, навошта ты трацілася, у мяне ж хапае старых штаноў ды куртак, каб працаваць на лецішчы». А яна толькі ўсміхалася (Юрый нейкі час маўчыць, збіраецца з думкамі). ...Нават пасля таго, як дачкі не стала, я атрымаў ад яе падарунак на свой дзень нараджэння, — на вочы мужчыны наварочваюцца слёзы. — Мастак Юрый Якавенка прынёс карціну. Я яму адразу сказаў, што не магу прыняць такі падарунак, бо ведаў, што карціна вельмі дарагая. «Калі даведаецеся ад каго яна, не адмовіце», — пачуў у адказ. Аказалася, гэту карціну Юля нагледзела яшчэ ў сакавіку, перад аперацыяй. Уяўляеце, у яе аперацыя, а яна думае, які падарунак мне зрабіць у чэрвені...
— Што было на той карціне?
— Карціна называецца «Цмок». Я нарадзіўся ў год Цмока.
...Юлі было ўсяго 25. Пасля ўніверсітэта яна паспела папрацаваць у выставачнай зале Гродзенскага гарвыканкама, дызайнерам-афарміцелем у адным з атэляў Гродна.
— У нас з Алай свой бізнес, звязаны са стварэннем рэкламы. Усе здзіўляліся, чаму мы Юлю да сябе на працу не бяром. А яна сама не ішла, бо разумела, што мы яе заўсёды прымем. Працавала на іншых людзей, не хацела, каб яе ўспрымалі як «татаву дачку». Юля была таленавітай. Перамагла ў конкурсе плакатаў супраць СНІДу і стала прэзідэнцкім лаўрэатам. За плакат, прысвечаны тэме бежанцаў, атрымала прэмію ЮНЕСКА. Дачка ўваходзіла ў лік «залатой моладзі». Калі прапанавалі паехаць вучыцца ў Італію, Германію, Францыю, Юля, адна з групы, адмовілася. Сказала: «Хачу быць з вамі...»
Паступіла дзяўчына вучыцца на дызайнера ў суседнюю Літву. Практычна кожныя выхадныя прыязджала дадому. Спачатку на цягніку, пасля атрымала еўрапейскія правы.
— Паступала на платную форму навучання, але добра здала сесію, і яе перавялі на бясплатную. Нават стала атрымліваць стыпендыю. За сэканомленыя на вучобе грошы мы набылі ёй машыну.
«
Галоўнае — не пластыка. Ёй было цяжка дыхаць па начах»
Праблемы з носам пачаліся ў Юлі ў дзяцінстве, пасля таго, як у школьным двары ёй трапілі ў твар сняжком.
— Снег быў мокры. З носа пайшла кроў. Мяне адразу выклікалі з працы. Я адвёз дачку ў траўмапункт. Але там сказалі, што ўсё добра, і адправілі дадому. Пазней аказалася, што нос быў зламаны. З часам у Юлі на носе з'явілася гарбінка, каля яе — ямінкі, адна ноздра практычна не дыхала. Урачы казалі, што, калі не зрабіць аперацыю, з узростам нос будзе «правальвацца» яшчэ больш, бо храсткі дрэнна прыраслі.
Юля збіралася замуж 31 жніўня. Ужо і заяву з Вадзімам падалі, і ў рэстаране аванс пакінулі. Таму, каб да вяселля, як кажуць , «загаілася», яна вырашыла зрабіць аперацыю вясной.
Хірурга выбірала сама па інтэрнэце. Водгукі пра Віктара Серабро былі станоўчыя. 35 гадоў стажу. Да таго ж хірург з'яўляецца загадчыкам аддзела пластычнай хірургіі дзяржаўнай бальніцы. У «Экамедсэрвісе» ён працаваў па сумяшчальніцтве на паўстаўкі.
Тады, вядома, ні бацькі, ні яе жаніх, ні сама дзяўчына не маглі і падумаць, чым скончыцца для іх вечар 26 сакавіка...
— Замест дзвюх гадзін аперацыя доўжылася амаль тры. Дзесьці ў 19.40 адчыніліся дзверы аперацыйнай, нашу дачку павезлі ў палату. Яна дыхала вельмі надрыўна і цяжка. Праз нейкі час нам дазволілі ўвайсці ў палату. Там нас з Алай ахапіў жах: Юля не варушылася. Мы сталі надзяваць ёй цёплыя шкарпэткі — ведалі, што пасля аперацыі вельмі мерзнуць ногі. Я занепакоіўся, бо ведаю, як гэта выходзіць з наркозу: сам перанёс 7 аперацый. Але ўсе вакол пераконвалі, што ўсё ідзе па плане. Анестэзіёлаг сказаў, што, калі мы Юлю пабудзім, яна ўсю ноч будзе мучыцца ад болю. Чым і прытупіў нашу пільнасць. Вядома, хто ж хоча нанесці боль свайму дзіцяці...
У той дзень бацькам ніхто не сказаў, што падчас аперацыі адбылася пазаштатная сітуацыя.
Бліжэй да 23.00 ахова папрасіла пакінуць палату... Кожныя паўгадзіны, ужо з дому, Юрый з Алай тэлефанавалі, каб высветліць, ці прыйшла ў прытомнасць дачка. Каля дзвюх гадзін ночы ім патэлефанаваў хірург Серабро і сказаў, што Юля ў рэанімацыі...
— Што апошняе сказала Юля, памятаеце?
— «Мама, не сварыся на тату». ...Так атрымалася, што ў той злашчасны дзень я праскочыў паварот на «Экамедсэрвіс». Усё ж такі Мінск не такі знаёмы горад, як Гродна. У нас быў запіс на вызначаны час, таму Ала пачала нервавацца, нават прыкрыкнула на мяне...
...23 красавіка Юрый з Алай пачалі бегаць па Мінску ў пошуках вясельнай сукенкі — але ўжо для іншай мэты...
— Калі супрацоўнікі салона даведаліся, чаму з намі няма нявесты, яны расплакаліся, — узгадвае Юрый. — Няма нічога страшней за смерць уласнага дзіцяці, асабліва калі яно памірае ў пакутах.
...Пасля пахавання дачкі Ала Кубарава сама трапіла ў рэанімацыю з сардэчным прыступам. І дагэтуль, прызнаўся Юрый, яна «сядзіць» на антыдэпрэсантах, якія прапісалі ўрачы.
— Мы з жонкай знаходзімся ў дэпрэсіі, нас мучыць бяссонніца. Першы час на пару гадзін выходзілі на працу, цяпер — на цэлы дзень. Ведаеце, сядзець без справы вельмі цяжка. Добра, што ў нас ёсць за 4 кіламетры ад Гродна лецішча: уцякаем туды ад сумных думак. У прыватным доме заўсёды занятак можна знайсці: нешта прыбіць, падфарбаваць. Трэба хоць нейкай механічнай працай займацца. Ведаеце, калі здарылася бяда, першае жаданне было наогул кінуць усё і з'ехаць з краіны куды вочы глядзяць, каб цябе ніхто не ведаў. Але ад сябе не ўцячэш...
— Юрый, а праўда, што вы хочаце ўсынавіць дзіця?
— Мы думалі пра гэта даўно, яшчэ калі Юля была жывая. Цяпер, каб нейкім чынам зачапіцца за гэтае жыццё, знайсці ў ім сэнс, вырашылі ажыццявіць даўняе жаданне. Спадзяёмся, што ў нас усё атрымаецца. Праўда, па нашых законах трэба, каб пасля смерці Юлі прайшоў год. І, думаю, гэта правільна. Бо ўсынаўленне — сур'ёзны крок. Гэта павінна быць свядомае рашэнне, а не выкліканае адчаем.
«Лепш бы я тых грошай не зарабіў...»
— На форумах людзі рознае пішуць, асабліва пасля таго, як даведаліся, што «Экамедсэрвіс» павінен выплаціць вам больш як мільярд рублёў у якасці кампенсацыі матэрыяльнай і маральнай шкоды...
— Калі нехта думае, што мы падалі іск, бо хочам нажыцца на смерці дачкі, гэта іх права. Я нікому нічога даказваць не збіраюся. Мы забяспечаны: і кватэра ёсць, і дом. Зразумела, грошы нам Юлю не заменяць. Гэта сімвалічнае пакаранне. Бо, заўважце, «Экамедсэрвіс» наогул ніяк не праходзіў па крымінальнай справе... Падчас аперацыі адключыўся апарат штучнага дыхання: аказалася, ніхто не цікавіўся яго спраўнасцю ажно тры гады! Галоўны інжынер медцэнтра сказаў на судзе, што калі б Міністэрства аховы здароўя патрабавала, ён адрамантаваў бы апарат... Ён не сказаў: «Адрамантаваў бы, калі б ведаў, што гэта пагражае жыццю пацыентаў...» Гэта так мяне абурыла!.. Як і тое, што анестэзіёлаг не дачакаўся, пакуль Юля прыйдзе ў прытомнасць пасля аперацыі, і паехаў у Маскву на чарговую аперацыю. Людзі толькі аб прыбытку думаюць, таму з нашага боку гэта толькі спосаб прымусіць кіраўніцтва задумацца, каго яны наймаюць. У маёй галаве не ўкладваецца: як можна было ўзяць для абслугоўвання медыцынскага абсталявання чалавека з сельгасадукацыяй (маецца на ўвазе Вадзім Ліхута. — Аўт.)?..
— Я так разумею, вы не задаволены рашэннем суда? (Нагадаю, 31 студзеня суд прагаварыў анестэзіёлага Аляксандра Шурава і галоўнага інжынера Вадзіма Ліхуту, адпаведна, да 4 і 3 гадоў калоніі-пасялення, гендырэктара Галіну Валжанкіну — да 2 гадоў умоўнага абмежавання волі. — Аўт.)
— Я разумею, што ніякае пакаранне нам Юлю не верне. Нават калі б ім смяротнае пакаранне вынеслі. Тым не менш, на мой погляд, імёны ўсіх вінаватых у смерці нашай дачкі павінны быць агучаны. Інакш атрымліваецца, суд не меў ніякага сэнсу, і медыкі будуць думаць, што заўсёды можна «адмазацца». Мы пайшлі на гэты душэўны боль, каб такое больш ніколі не паўтарылася, каб дапамагчы іншым людзям, якія будуць звяртацца да ўрачоў. Чаму не назвалі хірурга? Я не разумею, як такое можа быць, што галоўны інжынер вінаваты, а хірург, які рабіў аперацыю, — не? Калі на судзе кажуць, што яго нельга пазбаўляць ліцэнзіі, што ён можа яшчэ выратаваць шмат людзей, то я гэтага не разумею. Разумею, калі б гэта быў адзін урач на ўсю краіну, які робіць найскладанейшыя аперацыі на сэрцы. А Віктар Серабро — пластычны хірург.
Я лічу, што вінаватая ўся аперацыйная брыгада. Менавіта іх безадказнасць прывяла да смерці нашай дачкі. Вядома, ёсць віна і кіраўніцтва «Экамедсэрвіса», якое сэканоміла на абсталяванні. Але тут гаворка ідзе пра антычалавечнасць, урачы забыліся на клятву Гіпакрата. Я разумею, што ўсякае магло здарыцца, але пакінуць пацыента ў такой сітуацыі і не паспрабаваць яго выратаваць — гэта злачынства... Гэта тое ж самае, як збіць чалавека і пакінуць яго на дарозе, не аказаўшы дапамогу. Быў бы сярод іх хоць бы адзін сумленны чалавек, выклікаў бы «хуткую»... А выйсці з аперацыйнай — і тут жа збегчы? Усе як адзін думалі пра сябе, пра тое, як сысці ад пакарання, клапаціліся пра карпаратыўныя інтарэсы... І не далі Юлі апошняга шанцу на жыццё.
За аперацыю Кубаравы заплацілі 15 мільёнаў. Думалі, паколькі кошт высокі, вынік павінен быць найлепшым.
— Лепш бы я гэтых грошай не зарабіў, — уздыхае Юрый. — Я даверыўся рэкламе, лічыў, што там добрыя спецыялісты. Аказалася ж, што бардак — гэта яшчэ мяккае слова, якое характарызуе сітуацыю ў гэтым медыцынскім цэнтры... І гэты бардак выліўся на нас. Атрымліваецца, гэта ў іх норма — узяць грошы, але не правяраць апаратуру, якая забяспечвае жыццёва важную функцыю дыхання, кінуць чалавека, не пераканаўшыся, што той прыйшоў у свядомасць. Наша трагедыя павінна стаць сігналам нядбайным урачам. Яны павінны альбо самі звольніцца, альбо іх павінна звольніць кіраўніцтва.
Балючая гісторыя дагэтуль не ўкладаецца ў маёй галаве. Няўжо трэба было прынесці ў ахвяру Юлю, маладую і прыгожую, каб усе зразумелі, што кожны чалавек на сваім месцы павінен добрасумленна выконваць свае абавязкі?
...А ўсё пачалося з таго злашчаснага сняжку. Дактары ў той час, пэўна, таксама спяшаліся дадому і замест таго, каб проста падправіць дзіцяці носік, кінулі жартаўлівае: «Да вяселля зажыве». Праз шмат гадоў урачэбная халатнасць паўтарылася...
Застаецца дадаць, што кропка ў гэтай справе яшчэ не пастаўлена. Як гэта ні дзіўна, касацыйныя скаргі на рашэнне суда першай інстанцыі падалі ўсе тры абвінавачаныя...
Надзея ДРЫЛА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».