Каля 22 працэнтаў сем'яў беларусаў, паводле апытанняў, займаюцца фізкультурай і спортам. Каля 30 працэнтаў — залежаць ад тытуню. Можна сказаць, што адна з гэтых лічбаў надта нізкая, а другая — высокая. Аднак літаральна дзесяць гадоў таму ў нашай краіне курцоў было на 10 працэнтаў больш, а спортам займаліся… правільна, толькі спартсмены. Сур'ёзная прафілактычная работа робіць сваю справу. Надалей жа медыцынская служба будзе ўцягваць у працэс прафілактыкі кожнага паасобку, у тым ліку кіраўнікоў прадпрыемстваў, якія ў сучасных умовах абавязаны клапаціцца яшчэ і пра здароўе сваіх падначаленых. Пра іншы важны складнік у галіне аховы здароўя — якасць аказання медыцынскай дапамогі — расказваюць спецыялісты.
Нагрузка на стацыянары будзе змяншацца
Намеснік начальніка галоўнага ўпраўлення арганізацыі медыцынскай дапамогі Міністэрства аховы здароўя Рэспублікі Беларусь Таццяна МІГАЛЬ:
— Летась у краіне зноў зафіксаваны нізкі каэфіцыент дзіцячай смяротнасці. Назіралася зніжэнне агульнай смяротнасці, колькасці выпадкаў смерці ад анкалагічных захворванняў, хвароб органаў стрававання і дыхання, знешніх прычын. Паколькі летась крыху вырасла нараджальнасць, у першую чаргу мы будзем удасканальваць аказанне дапамогі маці і дзецям. Цяпер, напрыклад, працягваецца рэканструкцыя жаночых кансультацый, удасканальваюцца методыкі аказання дапамогі немаўлятам. У развіцці спецыялізаванай дапамогі ўпор робіцца на анкалагічныя і сардэчна-сасудзістыя захворванні, хваробы органаў дыхання і цукровы дыябет.
Набліжэнне меддапамогі да сельскіх жыхароў застаецца актуальным пытаннем. На вёсцы ўдасканаленне меддапамогі ажыццяўляецца з дапамогай урачоў агульнай практыкі (павялічваецца іх колькасць, удасканальваецца падрыхтоўка), у горадзе ўкараняецца вопыт работы з удзелам каманды спецыялістаў — участковы ўрач, памочнік урача і медсястра.
Дыспансерызацыя насельніцтва — задача не толькі медработнікаў, але і кожнага чалавека. На гэта скіраваны праект закона «Аб ахове здароўя», дзе вялікая ўвага надаецца выхаванню адказнасці за сваё здароўе і, па-другое, ажыццяўленню захадаў па ахове здароўя насельніцтва юрыдычнымі і фізічнымі асобамі, у тым ліку індывідуальнымі прадпрымальнікамі. Распрацоўваецца і нарматыўна-прававая база, якая будзе рэгламентаваць абгрунтаванасць выклікаў «хуткай дапамогі» і ўрача на дом.
У хуткім часе плануецца перагледзець клінічныя пратаколы дыягностыкі і лячэння захворванняў — выдаліць даследаванні, якія дублююць адно аднаго, улічыць новыя метады дыягностыкі і лячэння, працягнуць укараненне стацыянарзамяшчальных тэхналогій.
У Мінску, Салігорску працягваюцца пілотныя праекты па скрынінгу раку прастаты, малочнай залозы, шыйкі маткі і тоўстага кішэчніка. Скрынінгавыя праграмы (у межах якіх абследуецца здаровае насельніцтва) вельмі дарагія, а таму неабходна выпрацаваць дакладны механізм іх правядзення дзеля далейшага ўкаранення ва ўсіх рэгіёнах Беларусі.
Для больш шырокага ўкаранення стацыянарзамяшчальных тэхналогій, удасканалення ўзроўню падрыхтоўкі спецыялістаў у рэгіёнах будзем праводзіць ратацыю кадраў.
Новыя аптэкі будуць з'яўляцца толькі ў новых раёнах
Генеральны дырэктар унітарнага прадпрыемства «Белфармацыя» Ігар КАВАЛЬЧУК:
— На пачатак года ў краіне функцыянуе 2950 аптэк, з якіх 1665 — дзяржаўнай формы ўласнасці. Згодна з сацыяльным стандартам, адна аптэка павінна прыпадаць на 11,5 тысячы насельніцтва ў сталіцы і на 8 тысяч — у абласцях. У нас цяпер у цэлым па краіне адна аптэка прыпадае на 3,2 тысячы чалавек. Далейшае пашырэнне сеткі аптэк мэтазгоднае толькі ў новабудоўлях.
Жорсткія патрабаванні прад'яўляюцца да наменклатурнага асартыменту аптэк, паколькі гэта дазваляе забяспечыць пацыентаў неабходнымі лекамі па першым патрабаванні або на працягу пяці дзён. Ажыццяўляецца пастаянны кантроль за бесперабойнай наяўнасцю лекавых сродкаў, уключаных у пералік асноўных лекавых сродкаў. Наогул на фармацэўтычным рынку краіны — звыш 5 тысяч найменняў лекавых сродкаў, 1200 з іх пастаўляюцца беларускімі вытворцамі. Летась у межах праграмы імпартазамяшчэння былі асвоены 103 новыя лекавыя прэпараты. Беларускія лекі — гэта і даступнасць па кошце, і мінімальныя тэрміны выканання паставак у аптэкі. Штогадовы рост аб'ёмаў рэалізацыі беларускай прадукцыі складаў 20–25 працэнтаў. Для падтрымання даступнага ўзроўню цэн на лекі, прадухілення неабгрунтаванага іх росту ўстаноўлены кантроль за парадкам іх фарміравання — шляхам пастаяннага маніторынгу. Закупкі імпартных лекаў па выніках конкурсных таргоў дазваляюць захаваць кантрактныя цэны нязменнымі на працягу года. Нязначныя ваганні рознічных цэн абумоўлены зменай курсу валют Нацыянальнага банка.
Для зніжэння коштавай нагрузкі аптэкі прадпрыемстваў «Фармацыя» рэалізуюць усе айчынныя лекі маламаёмасным грамадзянам — пенсіянерам, інвалідам усіх катэгорый, шматдзетным сем'ям і дзецям да 3 гадоў — са зніжкай 5 працэнтаў ад рознічнага кошту.
Для аператыўнага вырашэння пытанняў, што ўзнікаюць у службах нашага прадпрыемства, дзейнічае «гарачая» тэлефонная лінія. На сайце www.farma.by працуе інтэрнэт-прыёмная, якая дазваляе ў электронным выглядзе звярнуцца з пытаннем лекавага забеспячэння і інтэрактыўна атрымаць неабходную інфармацыю.
Начальнік аддзела арганізацыі лекавага забеспячэння Міністэрства аховы здароўя Рэспублікі Беларусь Наталля МАЛАШКА: «У нас ёсць усе неабходныя лекі для лячэння раку»
— На набыццё лекаў толькі за кошт сродкаў міністэрства аховы здароўя плануецца патраціць сёлета звыш 80 млн долараў. Большая частка пойдзе на набыццё супрацьпухлінных прэпаратаў. Неабходна адзначыць, што задача любой сістэмы аховы здароўя — патраціць грошы рацыянальна, так, каб набыць больш лекаў, якія дапамогуць большай колькасці людзей. Можна набыць вельмі дарагія лекі і ахапіць абмежаваную колькасць людзей, а можна набыць лекі па аптымальным кошце і дапамагчы вялікай колькасці пацыентаў.
Адразу заўважу, што сёння ў Беларусі ёсць усе неабходныя прэпараты для лячэння тых жа анкахворых. Можна пачуць, як нехта прадае кватэры, машыны, каб набыць нейкія вельмі дарагія цуда-прэпараты за мяжой. Гэта памылковае ўяўленне, што ў нашай краіне — недастатковыя магчымасці, а недзе ў развітых краінах ёсць штосьці такое, што лечыць рак.
Зараз у краіне дзейнічае пералік асноўных лекавых сродкаў, куды ўключаюцца лекі для аказання бясплатнай і льготнай дапамогі на амбулаторным этапе. У новы Рэспубліканскі фармуляр уключаюцца як асноўныя лекавыя сродкі, так і лекі, якія ўваходзяць у пратаколы лячэння ў стацыянарах.
Рэабілітацыя — крок за крокам
Дырэктар Рэспубліканскага навукова-практычнага цэнтра медыцынскай экспертызы і рэабілітацыі Васіль СМЫЧОК:
— Наша краіна — адзіная на постсавецкай прасторы — мае этапную сістэму правядзення рэабілітацыі. Лячэбна-рэабілітацыйны этап у стацыянары, стацыянарны этап ранняй медыцынскай рэабілітацыі, амбулаторна-поліклінічны этап, хатні этап, наступная рэабілітацыя і этап санаторны. Так, у выніку інсульту пацыент трапляе спачатку ў рэанімацыйнае, затым неўралагічнае аддзяленне, а далей яго непасрэдна з бальніцы на машыне хуткай дапамогі перавозяць у стацыянарнае аддзяленне ранняй медрэабілітацыі. Безумоўна, для кожнага этапу ёсць свае паказанні.
У кожнай вобласці працуе шматпрофільны цэнтр медыцынскай рэабілітацыі. Усяго па краіне — 315 аддзяленняў і цэнтраў медрэабілітацыі. 229 з іх — амбулаторна-поліклінічныя, астатнія — стацыянарныя. Гэта дастатковая колькасць для правядзення рэабілітацыйных мерапрыемстваў пацыентам з цяжкай кардыялагічнай, неўралагічнай, траўматалагічнай, эндакрыналагічнай паталогіямі.
У Беларусі 528 тысяч інвалідаў. Летась упершыню за апошнія некалькі гадоў гэта колькасць перастала расці. Наогул, гэтую лічбу трэба правільна разумець. У нас зніжаецца першасны выхад на інваліднасць, аднак агульная колькасць інвалідаў расце за кошт павелічэння працягласці жыцця гэтай катэгорыі пацыентаў. Дзяцей-інвалідаў у краіне — каля 26 тысяч, а яшчэ што зусім нядаўна мы гаварылі пра 29–30 тысяч.
Раней інваліднасць устанаўлівалася за страту працаздольнасці, а сёння чалавек можа быць працаздольным, але інвалідам. Гэта міжнародны падыход: інваліднасць прызначаецца за абмежаванне жыццядзейнасці, а не за сам факт наяўнасці захворвання або траўмы, ва ўлік бяруцца толькі наступствы захворванняў.
У міністэрстве разглядаецца пытанне аб адмене працоўных рэкамендацый для інвалідаў. Інваліду ўжо не будуць рэкамендаваць, дзе і кім працаваць. Няхай чалавек працуе, кім хоча, калі не нашкодзіць ні свайму, ні чужому здароўю.
Сталіца: пацыентам — больш інфармацыі
Першы намеснік старшыні Камітэта па ахове здароўя Мінгарвыканкама Ігар ЮРКЕВІЧ:
— Летась на ўмацаванне матэрыяльна-тэхнічнай базы ўстаноў аховы здароўя сталіцы было затрачана каля трыльёна рублёў. 200 млрд з іх — гэта набыццё абсталявання, 800 млрд — капітальны рамонт і будаўніцтва новых аб'ектаў. У выніку мы атрымалі 14 буйных аб'ектаў — сярод іх новая падстанцыя хуткай дапамогі, дзіцячая і дарослая паліклінікі і інш. Здача новага радзільнага дома на тэрыторыі 5‑й клінічнай бальніцы запланавана на першае паўгоддзе 2015 года. Гэта важны для горада аб'ект. Дарэчы, у 2013 годзе ў сталіцы нарадзілася на 361 дзіця больш, чым у папярэднім годзе.
Працягваецца рэканструкцыя поліклінічных устаноў, укараняецца магчымасць электроннага вядзення гісторый хвароб, медкартак амбулаторнага хворага, пасля чаго пачнецца стварэнне адзінага цэнтра даных пацыентаў, што для апошніх абяцае быць вельмі зручным. Вядзецца збор інфармацыі па ўсіх відах платных медыцынскіх паслуг, каб пацыент мог лёгка і проста атрымаць патрэбную падказку.
Святлана БАРЫСЕНКА
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.