Блуканне “над зямлёй”

Апублікавана ў газеце "Літаратура і мастацтва" 28.02.14

___________________________________________________________________________

У Інстытуце тэалогіі імя святых Мяфодзія і Кірыла Беларускага дзяржаўнага ўніверсітэта адкрылася выстаўка “Над зямлёй”, якая будзе працаваць да 4 сакавіка. Экспазіцыю складаюць пейзажы і нацюрморты маладога беларускага мастака Васіля Пешкуна.

Незвычайныя пейзажы, на некаторых з якіх я ўбачыла знаёмыя мясціны Мінска, прасякнуты цеплынёй і святлом: мастак падаецца вельмі пазітыўным і энергічным!

Уражвае яго дар бачыць незвычайнае ў самым надзённым. І адразу становіцца зразумелай назва выстаўкі: “Над зямлёй” — г. зн. не толькі бачыць штосьці звысоку, але і заўважаць тое, што не відаць іншым. А вось як тлумачыць назву сам аўтар: “Экспазіцыю складае шмат карцін з выявамі цэркваў. Мне падабаецца іх маляваць — архітэктура заўсёды выдзяляецца з агульнай масы. Калі пішу такія пейзажы, то быццам лунаю над зямлёй. Малюю ў асноўным з натуры, дзеля гэтага часта езджу па розных гарадах Беларусі. Вельмі падабаецца і Суздаль – аж тры разы пабываў!”

Урбаністычныя пейзажы і выявы цэркваў, прадстаўленыя на выстаўцы, ствараюць цікавы кантраст “духоўнае — людское”:  “Суздальскі падворак”, “На Нямізе”, “Царква Пятра і Паўла” і інш.

За плячыма мастака шмат выставак (з іх больш як 10 персанальных), карцін, ганаровая ўзнагарода — медаль “Талент і прызванне” Сусветнага дабрачыннага альянса “Міратворац”. Васіль з’яўляецца членам Беларускага саюза мастакоў, а яго працы захоўваюцца ў прыватных калекцыях Беларусі, Расіі, ЗША, Ізраіля, Японіі, Італіі і Францыі, іх можна пабачыць таксама ў Нацыянальным мастацкім музеі Беларусі і Музеі сучаснага рускага мастацтва ў ЗША, у беларускім пасольстве Венгрыі.

Калі з’явілася жаданне натхніцца творчасцю таленавітага земляка або зірнуць на родныя мясціны па-новаму, вачыма мастака, які блукае “над зямлёй”, тады гэтая выстаўка — для вас!

Марыя ГАЛУБЦОВА