1. Калі дзіця нарадзілася ў прамежку ад поўначы і да поўдня, лічылі, што яно даволі хутка пачне хадзіць, гаварыць, вырасце рознабакова развітым чалавекам, у яго руках любая праца будзе спорыцца.
2. Другая палова дня, г. зн. час ад поўдня і да поўначы, лічылася менш спрыяльнай. У гэты перыяд сутак на свет з'яўляюцца людзі недаўгавечныя і непрыстасаваныя да жыцця, не адзначаныя добрым здароўем і жаданнем добра працаваць.
Нельга не ўлічыць і фактар, зафіксаваны ў этнаграфічных запісах, які вызначаў характар, тэмперамент, здароўе, шчасце ці няшчасце чалавека ў залежнасці ад пары года
ў момант яго з'яўлення на свет:
3. Народжаныя ўзімку будуць людзьмі «мярзлявымі», але вельмі стараннымі, працавітымі. Пра такіх людзей у народзе кажуць: «на зімовых дзецях зямля трымаецца». Іх лічылі шчаслівымі.
4. Народжаным увесну, у прыватнасці, у сакавіку, усё жыццё не будзе хапаць самастойнасці, упэўненасці. Стаўленне да іх больш за іранічнае: «На марцовых (сакавіцкіх) людзей малая надзеі, яны ўсё жыццё марцуюць і круцяцца, бы непрытомныя». Майскія дзеці «маюцца» ўсё жыццё, у той жа час яны таленавітыя, з іх выходзяць добрыя музыкі, артысты, спевакі.
5. Тыя, хто нарадзіўся ўлетку, звычайна запальчывыя, нястрыманыя, часам і злосныя. Толькі іх чамусьці ніхто не баіцца, бо, як той казаў, «з вялікага грому дажджу не бывае».
6. Народжаным увосень, калі ідзе збор ураджаю, прарочылі багацце, заможнасць, верылі, што яны будуць заўсёды мець добрую хату, вялікую сям'ю, значны капітал. Гаварылі так: «Калі дзіця родзіцца па восені, калі ўсяго многа на гумне й на агародзе, то кажуць, што тое дзіця, як вырасце, будзе багата жыць».
7. Няўдалым для нараджэння заўсёды лічылі высакосны год.
(Працяг будзе).
Аксана Катовіч, Янка Крук.
«Гэта не толькі пра бізнес, але і пра чалавечыя адносіны».
«Нашы работы — жывыя, з энергетыкай любові і дабра».
