Дэкан факультэта прафесійнага развіцця спецыялістаў адукацыі Акадэміі паслядыпломнай адукацыі, доктар псіхалагічных навук, прафесар Уладзімір ЯНЧУК — унікальны псіхолаг. Таму што ведае адказы на ўсе пытанні. А калі не ведае, то з задавальненнем даведаецца. Ён умее і гаварыць, і слухаць. І дзякаваць за крытыку. Можна даволі доўга пералічваць дасягненні чалавека, якому акурат сёння спаўняецца 60 гадоў, а можна проста распытаць яго пра некаторыя важныя для жыцця кожнага з нас рэчы. Што і было зроблена.
— У якім настроі вы сустракаеце свой новы юбілей?
— Відаць, у добрым. Маё жыццё нельга назваць бясхмарным. Я страчваў дарагіх людзей. Перажываў складаныя аперацыі. Бачыў вайну, калі адпачываў у Абхазіі з жонкай і двума малымі дзецьмі... Аднак я дасягнуў вяршынь у навуцы, заслужыў прызнанне за мяжой. Не так даўно чытаў лекцыі ў Вялікабрытаніі і Казахстане. Застаюся ўдзельнікам шматлікіх міжнародных кангрэсаў. На адно такое мерапрыемства быў запрошаны ў якасці эксперта па абмеркаванні тэмы наладжвання дыялогу паміж Германіяй і Расіяй — мяне запрасіў расійскі бок... Дарэчы, тэма дыялогу паміж гэтымі краінамі досыць цікавая. Для мяне стала адкрыццём, што ў падмурку адрозненняў паміж краінамі хаваецца пытанне рознасці крытычнага мыслення. Пасля Другой сусветнай у школах Германіі пачалі ўкараняць праграму пераадолення наступстваў нацызму. З 4-га класа дзяцей вучылі крытычнаму мысленню — здольнасці гаварыць тое, што думаеш, адказваць за свае дзеянні, уменню слухаць іншых. Дзякуючы гэтаму немцы здольныя спакойна слухаць крытыку ў свой адрас і дзякаваць за канструктыўную крытыку. У рускага чалавека крытыка заўсёды выклікае агрэсію. Вось таму ў тым ліку не атрымліваецца дыялог.
Я добра ведаю замежную літаратуру, валодаю англійскай мовай, і таму мяне пастаянна запрашаюць у якасці эксперта розныя краіны свету. Летась я «налятаў» 30 тысяч кіламетраў. Браў удзел у міжнародным праекце, які ахоплівае 78 краін. У большасці быў асабіста — як даследчык. У мяне ёсць і навуковыя публікацыі, і веданне прадмета на агульнасусветным узроўні. Адсюль такая рэфлексія, што ты дасягнуў многага. Словам, творчы патэнцыял высокі, запатрабаванасць толькі расце.
— І ніякага намёку на эмацыянальнае выгаранне?
— Я гэтую праблему добра ведаю і дакладна скажу, што гэта не пра мяне. Эмацыянальнае выгаранне, як і прафесійная дэфармацыя, адбываюцца, калі чалавек знаходзіцца ў адным і тым жа асяроддзі, займаецца адным і тым жа. У мяне ж вялікая колькасць асяроддзяў, і нават прастора неабмежаваная. Кожны раз, калі ты пераключаешся, то падсілкоўваешся. Мае дзеці не пайшлі маім шляхам і многага дасягнулі, а значыць, нашы з імі размовы таксама пашыраюць мае гарызонты. Сустрэчы з людзьмі розных прафесій, з рознымі поглядамі, знаёмства з рознымі архітэктурнымі і прыроднымі формамі — усё гэта ворагі эмацыянальнай стомленасці. Фізічна ты можаш стамляцца, але гэта кампенсуецца новымі ўражаннямі. Што яшчэ важна — паступова ў мяне з'явілася талерантнасць, здольнасць радавацца поспехам іншых.
— Вы ведаеце яшчэ беларускіх мужчын, якія перасякаюць 60-гадовую мяжу падобна вам?
— Сярод маіх знаёмых шмат тых, хто не думае пра старасць, у каго ёсць ідэі. Але праблема, вядома, ёсць. І справа не толькі ў тым, што нашы мужчыны хутка старэюць, што ў іх няма культуры паважлівага стаўлення да сябе, яны шмат выпіваюць, мала займаюцца спортам і ў іх істотна менш магчымасцяў для самарэалізацыі. Каб мужчыны жылі даўжэй і лепш, ім трэба будаваць стасункі з процілеглым полам. Мужчыны і жанчыны ўвогуле павінны цікавіцца адно адным, паважаць адно аднаго, дапамагаць адно аднаму бясконца пашыраць гарызонты. Вельмі важны складнік жыцця — наяўнасць культуры дыялогу, пра які я сказаў вышэй. У нас такой культуры няма. Дыялагічныя стасункі — гэта прызнанне права на эксклюзіўнасць іншага, безумоўнае прыняцце гэтага факта.
У нас іншая схема: хто на каго сядзе... Як правіла, жанчыны імкнуцца цягнуць на сабе вельмі многае — вучацца, ходзяць на курсы, лекцыі, канцэрты, займаюцца ўнукамі. І пры гэтым наракаюць на безыніцыятыўных мужчын. Часам мужчына і мог бы далучыцца да гэтага, але ж змагаецца за сваю псеўдааўтаномію. У выніку паміж партнёрамі з цягам часу нарастае суцэльная нянавісць, і жывуць яны разам толькі таму, што «метры» не дзеляцца. За мяжой вы ўбачыце пары, дзе і ў 80 гадоў ставяцца адно да аднаго з пяшчотай і сапраўднай любоўю. Яны не саромеюцца гэтых пачуццяў.
Каб захаваць такія стасункі, трэба быць эканамічна незалежнымі. Аднак патрэбны і той самы дыялог, крытычнае мысленне, талерантнасць да іншага меркавання. Наш чалавек, калі яму нешта не падабаецца, доўга і ўпарта маўчыць. А можна ж спакойна сказаць: «Мне не падабаецца тое і тое». А партнёр у адказ: «Дзякуй, я і не падумаў аб гэтым».
Трэба будаваць разам, дзяліцца, чаргаваць ролі, цікавіцца партнёрам і прымаць яго. Будзеце рабіць з сябе «гермафрадыта» — вынік будзе сумным. Ідэальна, калі мужчына нясе сваю мужнасць, а жанчына жаноцкасць. Дыялог паміж імі зробіць так, што яны будуць дапаўняць адно аднаго. У яе лепш будзе атрымлівацца тое, што ў яго не атрымліваецца, і наадварот. Такім чынам яны атрымаюць гармонію, і іх стане больш!
— А чалавек наогул мяняецца на працягу жыцця? Або што ў дзяцінстве закладзена, тое і будзе?
— Можа мяняцца, а можа жыць па інерцыі. Біялагічная схема «Наша будучыня — гэта наша мінулае» непраўдзівая. Галоўнае — матываванасць. Калі вы рухаецеся ў нейкім кірунку, то можна развівацца бясконца.
— А калі і без гэтага руху добра?
— Адсутнасць жадання рухацца можа ўказваць на праблемы ў выхаванні. Калі маці пастаянна ўсё вырашае за дзіця (гэта называецца «гіперапекай») — значыць, дзіця вырасце інфантыльным, несамастойным. А задача бацькоў — выхаваць чалавека, здольнага на падставе мудрых парад прымаць самастойныя рашэнні і несці адказнасць за іх прыняцце. Будзеце гіперапякаць, значыць, будзеце пасля і адказваць за няўдачы. Проста знаёмце з наступствамі, пакажыце граблі, на якія можна наступіць. Урэшце не завязвайце шнуркі на ботах, а вучыце гэтаму.
Іначай маці пасля можа не здзіўляцца, з якой прычыны яе сын ажаніўся на равесніцы. Інфантылізм — гэта не тое, каб адназначна добра ці дрэнна. Гэта індыкатар таго, што чалавек не здольны знайсці агульную мову з равеснікамі, адаптавацца ў сваім асяроддзі. А вось гэта дрэнна, паколькі ў будучым усё роўна давядзецца вырашаць праблемы і мець стасункі з равеснікамі.
Лепш за ўсё здзіўляйце дзіця, развівайце адно аднаго. Чытайце тое, што яму цікава, — у вас будуць агульныя тэмы для размовы. Баўце час разам (цікавыя гульні, спорт) і вы станеце экспертам, заваюеце аўтарытэт. Бо шмат тых ведаў, якімі вы валодаеце, доўгі час неактуальныя для вашага дзіцяці.
— Што трэба, каб вырасці яшчэ і шчаслівым?
— Шчасце вельмі індывідуальнае, заўсёды прывязанае да канкрэтнай сістэмы каардынат. На маю думку, шчасце па сваёй прыродзе — паняцце сацыяльнае. Яно заўсёды ў іншых, калі табе сярод іх камфортна, калі ты бачыш сваю запатрабаванасць. Чалавеку патрэбны гледачы. Вы зрабілі макіяж — патрэбны гледачы, каб ацаніць яго. Няма апладысментаў, значыць, вы будзеце адчуваць дыскамфорт. Напісалі артыкул — ён павінен атрымаць сацыяльнае адабрэнне. Калі гэтага няма, значыць, ён вам перастане падабацца. У жанчын бізнес-эліты ёсць пасада, грошы, дзіця ад першага шлюбу, а яна вые па начах... ад адзіноты. Адчуванне шчасця дакладна не звязана з матэрыяльнымі выгодамі. Стакгольм — горад адзіноты і суіцыдаў. Там высокі матэрыяльны ўзровень і неверагодная замкнёнасць людзей.
— Чаму ж шмат гледачоў з апладысментамі, але на адлегласці, не замяняюць нам аднаго, які пастаянна перад вачыма?
— Нам неабходны той, з кім мы можам быць самімі сабой, каму прызнаемся ў нечым патаемным, у чыю камізэльку паплачам... Калі такога чалавека няма, то грамадства нас не ратуе. Немаўля дае нам шмат праблем, але дае і адчуванне шчасця. З-за безумоўнай, някупленай любові. Адсюль трагедыя багатых, паспяховых у вачах грамадства людзей, якіх аднойчы знаходзяць мёртвымі ад наркатычнай перадазіроўкі. Чалавеку патрэбна цеплыня і падтрымка. Калі ў нас гэта было і мы гэта страчваем, то фізічна адчуваем «дзіркі» ў сабе.
— Што рабіць, калі грамадства кажа «нельга», а ты парушаеш гэта?
— Сацыяльныя нормы не статычныя. Гэта тое, аб чым людзі дамаўляюцца на нейкі час. І, у прынцыпе, людзі як дамовіліся, так могуць і перамовіцца. Дзякуючы дыялогу.
— І як жа выпрацаваць рашэнне, здольнае задаволіць розныя бакі?
— Звычайна рашэнне прымаецца па волі большасці. Меншасць застаецца ні з чым і проста чакае правалу большасці. Аднак існуе іншая схема. У развітых заходніх краінах засяроджваюць увагу на меншасцях. Таму што большасць можа і памыляцца. Менавіта меншасць падбухторвае да большай прадуманасці. Гэта ёсць прагрэсіўнае развіццё. Наяўнасць розных рашэнняў, вялікай колькасці рашэнняў — гэта добра. Мы рабілі так, але цікава зрабіць і іначай... Тое ж самае павінна быць, скажам, і ў сексуальных адносінах пары. Калі вы не саромеецеся адно аднаго, паміж вамі ёсць давер, то вы пастаянна шукаеце нешта новае, эксперыментуеце, а калі гэтага няма, знікае цікавасць.
У Еўропе падтрымліваюць, скажам, гомасексуальную меншасць. У маі я звычайна бываю ў Лондане. Назіраў неяк, як праходзіць гей-парад: яркае відовішча, вясёлыя, расфарбаваныя людзі. І ні ў каго, хто назірае за гэтым парадам збоку, не ўзнікае жадання кінуць камень ва ўдзельнікаў парада. У Расіі такую талерантнасць уявіць немагчыма. Там проста забараняюць, а значыць, з'ява ідзе ў падполле, становіцца загадкавай, чым прыцягвае большую ўвагу.
Сфарміраваць талерантнасць вельмі няпроста. І пачынаць трэба з дзіцячага садка. Увагу дзяцей трэба арыентаваць не на асаблівасці фізічнага і псіхічнага развіцця іншых дзяцей, а на тое, што перад табой — добры хлопчык, які ўмее тое і тое.
— Дыялог азначае абсалютную адсутнасць забарон?
— Забарона — самая тупіковая рэч. Можна толькі абмяжоўваць. Аднак абмяжоўваць шляхам пераканання. Скажам, пра тыя ж гомасексуальныя пары. Яны могуць выхоўваць дзяцей, але трэба ўлічыць, што такія дзеці наўрад ці змогуць пасля жыць у гетэрасексуальнай пары. Заўсёды трэба паказваць наступствы.
— У якім дыялогу вы хацелі б зараз узяць удзел?
— Я хацеў бы сустрэцца з еўрапейскімі парламентарыямі адносна дыялогу паміж Еўропай і нашай краінай. Тут ёсць над чым працаваць. Аднак пакуль бліжэйшая цікавая паездка — у Японію, дзе я яшчэ не бываў.
Святлана БАРЫСЕНКА.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.