Магілёўшчына славіцца гаючай вадой, а калодзежы Фядоры Конюхавай рэкламуе нават афіцыйны сайт Бялыніцкага райвыканкама
Сёння аграэкатурызм — галоўная цікавінка беларускай глыбінкі. Гэта вельмі актуальна ў Год гасціннасці. Экзатычных сядзіб цяпер шмат, таму, каб зацікавіць кліента, трэба мець нейкую «разыначку». Здаецца, у Бялыніцкага раёна яна ёсць. Тая самая знакамітая знахарка Фядора, да якой у 90-я гады мінулага стагоддзя стаялі вялікія чэргі.
Цяпер яна, акрамя лячэбных паслуг, аказвае яшчэ і... турыстычныя. Іншымі словамі, Фядора для райцэнтра не толькі лекарка, да якой у пошуках цуду звяртаецца народ, але яшчэ і прадпрымальніца, якая робіць для роднай спадчыны карысную справу — плаціць у мясцовую казну падаткі. Яе сядзіба так і называецца «У Фядоры Данілаўны». На афіцыйным сайце райцэнтра нават ёсць спасылка на гэты «аб'ект адпачынку і вольнага часу». З невялікага каментарыя можна даведацца пра тое, што «гаспадыня мае значныя веды ў галіне народнай медыцыны». А аматараў цішыні і фотапалявання чакаюць прагулкі па лесе, дзе шмат грыбоў і ягад, а таксама багаты жывёльны і раслінны свет. Да паслуг адпачывальнікаў — дыхтоўны двухпавярховы дом, які знаходзіцца на ўскрайку лесу.
Ад Бялынічаў да вёскі Пільшычы, дзе жыве Фядора, каля 25 кіламетраў. Гэты куток нават не кранула радыяцыя. Мясціны тут і насамрэч маляўнічыя. Але з транспартам — праблемы. Дзякуй, выручыў выканаўца абавязкаў старшыні Цяхцінскага сельсавета Аляксандр Цыбульскі.
Пакуль едзем, ён распавядае пра зямлячку: «У яе — дар, моцная энергетыка. Яна лечыць бескантактавым масажам, вадой і глінай. Цяпер ажыятажу няма, але людзі звяртаюцца. Магчыма, ёсць і такія, хто вылечыўся, але яны не прызнаюцца. Казаць, што гэтае лячэнне — панацэя, нельга. Адны людзі вераць, што ім яно дапамагае, іншыя — не».
Машына ў апошні раз вынырвае з лесу, і перад вачыма паўстае вёска Пільшычы — каля дзясятка хат, раскіданых паабапал дарогі. Двухпавярховы катэдж — тая самая Фядорына гасцініца — адразу кідаецца ў вочы. На падворку шмат гаспадарчых пабудоў. «Прыехалі!» Навокал — цішыня і, на дзіва, ніякіх чэргаў. Гукаем гаспадыню. Аб візіце карэспандэнта ёй ужо загадзя паведамілі па тэлефоне. Вось і яна. Нягледзячы на свае амаль 88 гадоў, выглядае маладжава. І апранута, як гараджанка: у прывабную сукенку па фігуры. Валасы акуратна пастрыжаны і завіты. Адчуваю на сабе ўважлівы позірк карых вачэй. «Толькі праўду напішыце, — патрабуе яна. — А то былі тут да вас... Усякае глупства напрыдумвалі».
«Маці майго бацькі валодала гіпнозам»
У чырвоным куце вялікага светлага пакоя, куды нас запрашае гаспадыня, — абразы ў некалькі ярусаў. Пасярэдзіне — вялікі абраз святой Матронушкі, Багародзіца, Ісус. Побач са святымі — партрэты сваякоў. Каля Мікалая Цудатворца — фотаздымак ваеннага ў кепцы. Пра яго Фядора кажа з павагай: «Гэта мой дзед Філіп — анёл-ахоўнік». Ён загінуў падчас рэвалюцыйных хваляванняў у пачатку ХХ стагоддзя ў Кіеве. Менавіта ён «наказаў» унучцы ў сне лячыць калодзежнай вадой. Яго «загады» Фядора выконвае, чаго б ёй гэта ні каштавала. Кажа, што можа праігнараваць прапанову жывога чалавека, а вось дзедаву — ніколі. Нават яго партрэтаў зрабіла столькі, каб былі ў кожным пакоі. Паважаць продкаў — гэта святы абавязак кожнага, настаўляе яна. Як і зямлю, на якой яны жылі. Фядора адчувае моц зямлі сваіх продкаў і гэта натхняе яе.
— А яшчэ мы пакутуем ад таго, што шмат дрэнных слоў ведаем, — павучае Фядора. — Напрыклад, нельга казаць «спасибо», трэба — «Спасі Бог». Тады будзе дапамога. Я гэта бачыла ў сне. А яшчэ, калі просіш у Бога здароўя, трэба яму яшчэ і падзякаваць за дапамогу.
...Незвычайныя здольнасці Фядоры яе бацька заўважыў яшчэ тады, калі ёй было 3 гады. Аднойчы ён ляжаў у бальніцы, і, калі да яго прывялі дзяўчынку, адчуў, як раптам боль адступіў. Пакуль яна сядзела побач і гладзіла па руцэ, было добра, а калі выходзіла за дзверы, зноў пачынала ўсё балець. Мужчына быў упэўнены: гэтая гаючая сіла ў дачкі — ад яго маці. Яна валодала гіпнозам і працавала лекаркай у мясцовага памешчыка. Памерла ў 1914 годзе ад чумы. Здаецца, нейкім незразумелым чынам бабуля перадала дар унучцы, якая з'явілася на свет роўна праз 13 гадоў пасля яе смерці — у 1927 годзе. Фядора памятае, як бацька вадзіў яе ў цырк «развіваць талент». Дзе яшчэ можна было ўбачыць, як працуюць ілюзіяністы? А потым была вайна, з якой ён не вярнуўся...
Калодзежы Фядоры
Сон, які, па сутнасці, вызначыў яе лёс, Фядора ўбачыла пад канец вайны, калі разам з роднымі была ў эвакуацыі. У ім дзед «патрабаваў», каб яна вярталася ў родную вёску і працавала з вадой. Яна так і зрабіла.
— Вёска была спалена, а на тым месцы, дзе стаяла хата, за 4 гады вырасла вярба, з-пад якой выцякаў ручай, — успамінае лекарка. — Гэтая вярба мне і прыснілася. Я нават чула голас: «Пад ёй і капай». Разам з маці ўзяліся за работу і на глыбіні амаль 3 метры наткнуліся на старадаўні зруб. Гэта быў першы наш калодзеж. Цяпер іх — шэсць.
Фядора кажа, што менавіта гэтая вада дапамагла ёй аднойчы вярнуцца з таго свету. Жыццё склалася такім чынам, што яна разам з мужам і дзецьмі доўгі час жыла ў Казахстане. Там яна трапіла ў цяжкую дарожную аварыю, пасля якой цудам засталася жыць. Урачы нават не спадзяваліся, што пацыентка ачуняе. Яна — таксама. Таму і вырашала ехаць паміраць на радзіму. Піла ваду і, на здзіўленне ўсім, выжыла.
— У мяне нават ёсць дакументы, што гэтай вадзе няма роўных у свеце, — кажа яна і працягвае пажоўклы фірменны бланк... Расійскага ўніверсітэта дружбы народаў імя Патрыса Лумумбы з заключэннем «па даследаванні метаду біяэнергетычнай індукцыйнай актывацыі донара Фядоры Конюхавай для вывучэння магчымасці лячэння хворых хірургічнага профілю». У ім і сапраўды даецца навуковая адзнака і пільшыцкай вады, і лекавых здольнасцяў Фядоры. Бянтэжыць толькі... адсутнасць пячаткі на дакуменце і нумар яго рэгістрацыі.
Фядора, між тым, знаходзіць сярод сваіх паперак яшчэ адзін «доказ» — засвечаную фотакартку з адбіткамі сваіх пальцаў, ад якіх быццам зыходзіць ззянне. Яна ўдакладняе: «Гэта мае рукі. Энергія, якая з іх выходзіць, — жывое іголкаўколванне». Кажа, што здымак зроблены ў медінстытуце ў канцы 1970-х гадоў.
— Гэта тут для мяне няма гонару, а ў Маскве ўсе акадэмікі вакол мяне танцавалі, — абураецца яна. — Магла б нядрэнна ўладкавацца ў Расіі, але ж на радзіму пацягнула. 25 гадоў таму вярнулася дадому і лячу людзей. У тым ліку і безнадзейных. Калі не верыце, магу даць тэлефоны тых, каму дапамагла.
— А вы за лячэнне грошы бераце? — пытаюся я.
— А хто без грошай жыве? Вядома, бяру. Колькі даюць — столькі і бяру. Гасцініцу ж трэба неяк утрымліваць.
Гасцініца чакае наведвальнікаў
Яна знаходзіцца побач з домам, дзе жыве сама Фядора. Для турыстаў тут створаны ўсе ўмовы: ёсць душ, санвузел, пакой для ежы. Унутры ўсё аздоблена дрэвам. З мэблі — толькі неабходнае. Напрыклад, у двухмесным нумары 2 ложкі, стол, тумбачка, шафа. І ў кожным пакоі — абразы святых і ... сваякоў Фядоры. Пакуль кліентаў няма, у адным з нумароў стаіць таз з перцамі. Фядора радуецца: расада добра ўзышла. Побач з гасцініцай — агарод, дзе Фядора з дапамогай дачкі вырошчвае бульбу і агародніну. Ураджаю хапае і сабе, і пастаяльцам. Фядора нават свой хлеб выпякае, а ў краме купляе толькі самае неабходнае.
— Шкадую аб адным, — кажа яна напаследак. — Памру — і гэтае месца без догляду застанецца. Вада тут вельмі каштоўная, такой нідзе не знойдзеш. Яна — жывая. Нездарма ў савецкія гады сам міністр аховы здароўя Яўген Чазаў рэкамендаваў тут санаторый пабудаваць. Добра яшчэ, што знайшліся памочнікі, якія дапамаглі мне гасцініцу ўзвесці. Усё ж такі людзям зручней.
Калі развітваліся з Фядорай, да сядзібы пад'ехалі некалькі машын. Пацыентаў у жанчыны ўсё яшчэ хапае.
Нэлі ЗІГУЛЯ, фота аўтара.
Меркаванне ў тэму
Аляксандр Плятнёў, настаўнік фізікі Магілёўскага ліцэя БРУ:
— Людзі, якія кажуць пра свае энергетычныя магчымасці, проста добрыя псіхолагі. У медыцыне такі феномен называецца «эфект плацэба». Увесь сакрэт у тым, што «пацыент» проста верыць у тое, што яму такое «лячэнне» дапаможа. Але пакуль навуковых доказаў гэтаму няма, гарантыі на станоўчы вынік ніхто даць не зможа.
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.