З-за анамальна цёплага сакавіцкага надвор'я ацяпляльны сезон пачаў завяршацца непрывычна рана. Аднак батарэі астынуць не паўсюль.
У сталіцы ацяпленне пакуль што застанецца ў дзіцячых дашкольных, лячэбна-прафілактычных, медыцынскіх і навучальных установах. Будуць грэць батарэі і ў музеях, дзяржаўных архівах, бібліятэках, гасцініцах, інтэрнатах і ўстановах сацыяльнага забеспячэння. Пра гэта карэспандэнту «Звязды» паведамілі ў прэс-службе Мінгарвыканкама.
Што адметна, ацяпленне пакуль адключаць не будуць і ў аб'ектах жыллёвага фонду мегаполіса. Начальнік аддзела энергетыкі і навукова-тэхнічнага развіцця Мінжылкамгаса Вячаслаў Шміт
заявіў раней, што рашэнне аб адключэнні ацяплення ў жыллёвым фондзе могуць прымаць мясцовыя распарадчыя органы.
— Казаць аб фінішы ацяпляльнага сезону на Віцебшчыне пакуль рана, — гаворыць начальнік вытворча-тэхнічнага аддзела ўпраўлення жыллёва-камунальнай гаспадаркі Віцебскага аблвыканкама Анатоль Судак. — У нас па начах тэмпература нават цяпер зніжаецца да нуля, а часам ртутны слупок ідзе ніжэй за гэтую адзнаку. Тым больш што ўжо на заўтра нам абяцалі пахаладанне. Таму пакуль што мы знізілі тэмпературу цепланосьбіта да аптымальнай — 35-40 градусаў.
— Яшчэ ў панядзелак было прынята рашэнне аб адключэнні ацяплення ў адміністрацыйных будынках ды карпусах прамысловых прадпрыемстваў, — паведаміў намеснік начальніка аддзела энергетыкі і энергазберажэння ўпраўлення жыллёва-камунальнай гаспадаркі Гродзенскага аблвыканкама Дзмітрый Андрэеў. — Астылі батарэі і ў месцах агульнага карыстання жыллёвага фонду. У саміх жа кватэрах, інтэрнатах, гасцініцах ды навучальных установах сістэма пакуль што пераведзена ў рэжым прапальвання.
Валяр'ян ШКЛЕННІК.
Карэкціроўкі па аплаце жыллёва-камунальных паслуг закрануць чатыры катэгорыі жыхароў.
