Адкрыццё станцыі метро «Малінаўка» плануецца на 8 мая 2014 года, пасля чаго ў паўднёва-заходняй частцы Мінска ўступіць у сілу новая схема руху наземнага гарадскога пасажырскага транспарту.
А ўжо 1 мая адкрыюць для руху праспект Дзяржынскага. Пра гэта на сустрэчы з жыхарамі Брылевічаў і Малінаўкі паведамілі кіраўнік адміністрацыі Маскоўскага раёна Яўген Воўна і дырэктар ДУ «Сталічны транспарт і сувязь» Валерый Шкуратаў. Чыноўнікі сустрэліся з гараджанамі менавіта для абмеркавання запланаваных змяненняў у рабоце гарадскога пасажырскага транспарту.
— Завершана ўнутранае аздабленне новай станцыі метро. Цяпер заканчваюць работы ў самым тунэлі ад «Пятроўшчыны» да «Малінаўкі», — расказаў Я. Воўна. — І прыкладаецца максімум намаганняў для таго, каб у названы тэрмін новая станцыя прыняла пасажыраў, а дабірацца да яе было зручна з усіх бліжэйшых мікрараёнаў.
— Мы пастараемся стварыць максімальна камфортныя ўмовы падвозу пасажыраў да станцыі метро «Малінаўка», — адзначыў В. Шкуратаў. — Пры гэтым прапануем да абмеркавання новую схему руху наземнага транспарту і гатовы ўлічыць усе пажаданні.
Пытанняў у мінчан узнікла нямала. Напрыклад, некаторых не задавальняе тое, што першыя аўтобусныя маршруты раніцай пачынаюць працаваць толькі ў 6.00, а метро адкрываецца на паўгадзіны раней. Іншыя скардзіліся на вялікі інтэрвал паміж аўтобусамі на 120-м, 97-м і некаторых іншых маршрутах. Цікавіліся гараджане і тым, ці з'явяцца дадатковыя аўтобусы на прыпынках «Некрашэвіча» і «Сямашкі», якія пакуль, на іх думку, абдзелены грамадскім транспартам. Спецыялісты патлумачылі, што распрацаваная схема прадугледжвае ўвядзенне новых маршрутаў (у тым ліку на ўказаных участках) і будзе ўдасканальвацца на працягу месяца з улікам пажаданняў і заўваг пасажыраў. Не выключана і тое, што наземны транспарт будзе пачынаць працу раней — з улікам рэжыму работы метрапалітэна.
Наталля ЯРЭМІЧ, «Мінск—Навіны».
«Гэта не толькі пра бізнес, але і пра чалавечыя адносіны».
«Нашы работы — жывыя, з энергетыкай любові і дабра».
