У краіне дзейнічаюць 70 груп ананімных алкаголікаў.
Алкагалізм нездарма называюць сацыяльным захворваннем: людзі выкарыстоўваюць спіртное ў якасці ўніверсальнага антыдэпрэсанту і запаўняльніка маральнай пустаты. Па інфармацыі Міністэрства аховы здароўя, у Беларусі на яго хварэюць (толькі па афіцыйнай статыстыцы) 170 тысяч чалавек, а яшчэ прыкладна палова ад гэтай колькасці стаіць на прафілактычным уліку. Увогуле ж атрымліваецца, злоўжываюць алкаголем 250 тысяч чалавек — насельніцтва вялікага горада.
Спосабаў лячыць хваробу шмат. Адзін з іх — гэта збор колішніх сабутэльнікаў не для таго, каб у чарговы раз «скінуцца на траіх», а падзяліцца сіламі і ўласным вопытам. Такой тактыкі прытрымліваецца таварыства ананімных алкаголікаў, супрацоўнікі Офіса якога згадзіліся пагутарыць з карэспандэнтам «Звязды». Па вядомых прычынах іх імё-
ны не называюцца.
Хто такія ананімныя алкаголікі?
«Гэта цалкам добраахвотнае сусветнае таварыства, якое аб'ядноўвае мужчын і жанчын розных узростаў, сацыяльнага статусу, узроўню адукацыі, якія збіраюцца для таго, каб пастаянна падтрымліваць стан цвярозасці. Жаданне кінуць піць і ёсць галоўная ўмова членства. Удзельнікі таварыства не плацяць якіх-небудзь узносаў. Мы не атрымліваем грашовай і рэчавай дапамогі з-за мяжы, не бяром ахвяраванняў ад людзей, якія не ўваходзяць у таварыства. Усё фінансаванне адбываецца выключна на добраахвотнай аснове, грошы ахвяруюць удзельнікі. Мэта нашай дзейнасці — заставацца цвярозымі і дапамагаць іншым алкаголікам займець здаровы цвярозы лад жыцця. Мы не адносімся да якіхсьці рэлігійных арганізацый, палітычных груповак...
Механізм нашага функцыянавання просты. Таварыства ў кожнай краіне складаецца з асобных груп. Між іншым, іх у свеце налічваецца каля 125 тысяч — а гэта 2-3 мільёны чалавек. Дакладнай лічбы назваць нельга, бо гэтая статыстыка не вядзецца наўмысна. Колькасць людзей у групе, якія збіраюцца для таго, каб падзяліцца вопытам, таксама жорстка не рэгламентуецца. Галоўнае, каб іх было мінімум два. У Беларусі ж працуюць 70 груп ананімных алкаголікаў, з іх толькі ў Мінску — 24. Прыходзілі да нас і юнакі, і людзі ва ўзросце за 60».
Як члены таварыства дапамагаюць адно аднаму?
«Галоўнае, каб чалавек пераадолеў страх і сказаў сабе: «Так, я залежны ад алкаголю. Але не хачу больш піць — дапамажыце мне вылезці з гэтай багны». Бо галоўныя прынцыпы нашай працы, акрамя ананімнасці, — гэта шчырасць і добрасумленнасць не толькі перад людзьмі навокал, але і перад самім сабой. Зразумела, што праграма таварыства ананімных алкаголікаў прадугледжвае стапрацэнтнае адмаўленне ад выпіўкі. Цвярозасць дасягаецца на аснове праграмы дзеянняў «Дванаццаць крокаў». Накіравана яна не толькі на культывацыю ў свядомасці такіх маральных якасцяў, як адказнасць, сумленнасць, дысцыплінаванасць, карыснасць, але і на «інвентарызацыю» этапаў свайго жыцця. Дасягаецца гэта тым, што адзін алкаголік непасрэдна гутарыць з другім.
Члены таварыства рэгулярна збіраюцца на сустрэчах, якія бываюць закрытымі і адкрытымі. У першых могуць удзельнічаць толькі тыя людзі, якія пакутуюць на залежнасць ад алкаголю. На адкрытыя сустрэчы могуць прыходзіць і тыя, хто хоча пераняць вопыт ананімных алкаголікаў у дасягненні цвярозасці. Ананімнасць — бадай што галоўны і важнейшы крытэрый абароны для навічка. У яго тут не спытаюць пашпартных даных, не паставяць на ўлік у наркалагічным аддзяленні, не зарэгіструюць, не паведамяць на працу».
Як выглядаюць стасункі ананімных алкаголікаў з разнастайнымі грамадскімі структурамі?
«Мы не ўваходзім у іх склад, хаця з імі супрацоўнічаем. Мы не займаемся пастаноўкай дыягназаў, але пры гэтым у нас наладжаны добрыя кантакты з медыцынскімі работнікамі. Напрыклад, гэта праяўляецца тады, калі стаіць пытанне аб неабходнасці шпіталізацыі чалавека. Актыўна супрацоўнічаем з Дэпартаментам па выкананні пакаранняў МУС Беларусі — наведваем лячэбна-працоўныя прафілакторыі і папраўчыя ўстановы адкрытага тыпу — так званыя «хіміі». Ідуць нам насустрач і адміністрацыі некаторых раёнаў, дзе сітуацыя з алкаголем проста катастрафічная».
Чаго не робіць таварыства?
«Мы не захоўваем якіясьці запісы аб нашых удзельніках і не займаемся іх уцягненнем у нашы рады. Ніякага кантролю за нашымі членамі не вядзецца. Мы не ставім дыягназаў і не прымаем ніякай аплаты за свае паслугі. Часта нас блытаюць з арганізацыямі сацыяльнага кірунку. Але мы не забяспечваем людзей жыллём, харчаваннем, адзеннем, працай, грашыма...»
Валяр'ян ШКЛЕННІК.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.