Бізнесмены Уздзеншчыны аб'ядналіся ў адраджэнні спадчыны
Ініцыятарам гэтай карыснай справы стаў дырэктар вытворча-гандлёвага ўнітарнага прадпрыемства «Аграмашсэрвіс» Аляксандр Нікітка. Вясной мінулага года ён сабраў кіраўнікоў і прадстаўнікоў малога і сярэдняга бізнесу, індывідуальных прадпрымальнікаў, неабыякавых да лёсу помнікаў даўніны, захавання гісторыка-культурнай спадчыны раёна. Краязнаўца і фундатар многіх карысных пачынанняў, ён задумаў згуртаваць вакол сябе аднадумцаў, для невялікай, мабыць, у маштабах Беларусі, але значнай для Уздзеншчыны канкрэтнай справы — рэстаўрацыі ўязной брамы помніка архітэктуры ХVІІІ стагоддзя — касцёла Святога Крыжа, роўных якой па прыгажосці не так шмат у Беларусі. Таму так важна захаваць яе для нашчадкаў, па магчымасці вярнуць выгляд, які меў касцёл два стагоддзі назад. І мясцовыя краязнаўцы вырашылі не чакаць таго часу, пакуль у дзяржавы знойдуцца сродкі для яго рэстаўрацыі, а паступова, пачынаючы з малога, крок за крокам рабіць адну вялікую справу.
—Як аказалася, — расказваў Нікітка сваім аднадумцам, робячы перад імі своеасаблівую справаздачу аб выкарыстанні сабраных сродкаў, — фінансавы бок праблемы быў у гэтай справе не з самых цяжкіх. Усе, да каго мы звярталіся, ахвотна згадзіліся дапамагчы. Хто рублём, хто тэхнікай, хто будматэрыяламі, хто — канкрэтнай работай.
Цяжкасці падсцерагалі ў іншым. Напрыклад, як зняць старыя вароты (адна створка важыць каля тоны), не парушыўшы канструкцыі слупоў-шулаў. Пасля кансультацыі з навукоўцамі і з дапамогай мясцовых майстроў-умельцаў прынялі рашэнне выпілаваць месцы мацавання разам з каменем, каб пасля паставіць на месца. Акуратна, з дапамогай крана, выканалі гэтую работу. Затым за справу ўзяліся кавалі Максім Хадановіч, Сяргей Бушыла, Яўген Барталевіч, Аляксандр Поляк, Максім Варабей. Па падрыхтаваных эскізах яны выкавалі складаныя элементы, працавалі з душой, разумеючы, што робяць не на дзень і не на два, і не звычайную брамку, а элемент гісторыка-культурнай каштоўнасці. Напэўна, і пачуццё гонару за родны край, дачыненне да такой высакароднай місіі дапамаглі ім паспяхова справіцца з няпростай задачай.
Затым асноўныя вароты і дзве вузкія брамкі па баках пафарбавалі, зрабілі адпаведнае мацаванне і ўмела ўстанавілі на месца. Абнавіліся, атрымалі прыгожыя «шапкі» з бляхі каменныя слупы, на якіх трымаліся вароты і брамкі. На ўсё гэта спатрэбілася крыху больш як два месяцы.
Пасля завяршэння работ спонсары і выканаўцы гэтай важнай справы сабраліся ў цэнтральнай раённай бібліятэцы, каб даведацца, на што патрачаны іх сродкі, але найперш — адчуць важнасць свайго дачынення да вялікай справы. Трэба было бачыць, якім бадзёрым агеньчыкам свяціліся іх вочы. Многія ўздзенцы, бачачы абноўленую браму, радаваліся, хоць і не ўсе ведалі, чыіх гэта рук справа. А каб у прадстаўнікоў малога бізнесу і надалей не знік імпэт мець дачыненне да такога, здавалася б, эканамічна нявыгаднага ўкладання сродкаў, Нікітка запрасіў на сустрэчу прафесара, доктара біялагічных навук, аўтара кніг па гісторыі садова-паркавага мастацтва Анатоля Федарука.
Анатоль Тарасавіч падрабязна, падмацоўваючы свае выказванні слайдамі, расказаў пра асноўныя архітэктурныя помнікі Уздзеншчыны і суседніх раёнаў — той жа касцёл Святога Крыжа, Кальвінскі збор і іншыя пабудовы ў Першамайску, рэшткі сядзібы ў Наднёмане, капліцу-піраміду на ўздзенскіх могілках. Цікава было прадстаўнікам бізнесу пачуць падрабязнасці пра жыццё і дзейнасць славутых землякоў, продкаў, якія мелі дачыненне да ўздзенскага краю — Казіміра і Яна Завішаў, Мікалая і Магдалены Радзівіл, Якуба Наркевіча-Ёдкі. Слухаючы выступленне навукоўца, некаторыя прысутныя ва ўтульным пакойчыку чытальнай залы бібліятэкі ці не ўпершыню ў такім аб'ёме пазнаёміліся з тым неацэнным багаццем, міма якога праходзілі раней, не задумваючыся аб яго гістарычнай значнасці. Як запавет, як сігнал для далейшых дзеянняў успрымалі яны заўвагі, прапановы, парады Анатоля Тарасавіча:
—Вы зрабілі вялікую справу, пра якую будуць успамінаць нашчадкі і праз 10, і праз 50, і праз 100 гадоў. Вас не будзе, а зробленае вамі застанецца. Любіце свой родны край. Працуйце ў імя яго росквіту. Ратуйце ад паступовага ці гвалтоўнага знішчэння ўсё тое добрае, прыгожае, пакінутае розумам і рукамі продкаў хараство. Помніце: без разумення і захавання мінулага ў нас не будзе будучыні.
Цёплыя словы падтрымкі на адрас карыснай ініцыятывы і канкрэтных яе выканаўцаў выказаў вядомы мастак, наш зямляк Алесь Філіповіч.
Дык няхай жа гісторыя ведае прозвішчы тых, хто спрычыніўся да такой важнай справы. А мелі да яе дачыненне, акрамя названых вышэй, Сташэўскі, Лойка, Панькоў, Латыш, Серыкаў, Шэдаў, Пілікевіч, Вярбіцкі, Русак, Пігулеўскі, Берасцевіч, Коваль, Тоўсты, Рычык, Рабаў, Федарынаў, Гайкевіч, Суднік, Язвінскі, Радненка, Хвастоў… Гэты спіс будзе доўжыцца. Бо спраў і праектаў, скіраваных на далейшае захаванне духоўных і матэрыяльных каштоўнасцяў, на Уздзеншчыне нямала.
Віктар САБАЛЕЎСКІ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».