Вечар 11 мая ў Нацыянальным аэрапорце выдаўся багатым на эмоцыі. Тут сустракалі Тэа (Юрыя Вашчука), які прадстаўляў сёлета Беларусь на міжнародным конкурсе «Еўрабачанне 2014». Кветкі, плакаты, апладысменты — так чакалі свайго героя прыхільнікі.
Рэйс з Парыжа, якім павінен быў прыляцець спявак з беларускай дэлегацыяй, затрымліваўся, але гэта не зніжала градус настрою прысутных. Каля ста чалавек спявалі добра вядомы «Чызкейк», паўтаралі ў танцы яго знакамітыя рухі, а некаторыя паміж сабой абмяркоўвалі конкурс. Варта было адчыніцца дзвярам тэрмінала, з якога чакалі выхаду Тэа, як натоўп узарваўся апладысментамі, свістам і выкрыкамі яго імя, што прыемна здзіўляла пасажыраў. Калі, нарэшце, дачакаліся самога артыста, то радасць публікі перадалася і яму.
— Дзякуй за вашу падтрымку! Гэта вельмі дапамагае і дае сілы, — прывітаў прысутных Тэа. І на стомленым твары з'явілася ўсмешка, а ў вачах — прыемнае здзіўленне.
Акружаны колам прыхільнікаў, большасць якіх складалі дзяўчаты, спявак прымаў віншаванні, фатаграфаваўся і раздаваў аўтографы. Пад канец нават паспяваў і станцаваў з некаторымі.
— Вярнуўся з думкай, што вось нарэшце я дома. Гэта ж фінал пяцімесячнай працы, а апошнія чатыры дні выдаліся асабліва цяжкімі: прагон другога паўфіналу, сам паўфінал, прагон фіналу. Нашы артысты спалі ў грымёрцы, і добра, калі на канапе можна было прылегчы... Таму вельмі хацелася вярнуцца на радзіму. Прычым вярнуцца так, як я: мяне сустрэлі вельмі цёпла і гасцінна. Здорава! Вось бы заўсёды так вяртацца! — падзяліўся з прысутнымі журналістамі Тэа. — Падтрымка адчувалася нават на адлегласці. Жадаю ўсім артыстам, якія будуць ехаць на «Еўрабачанне», каб слухачы і гледачы да іх ставіліся з такой жа цеплынёй. Тады ў іх усё абавязкова атрымаецца.
Наконт бліжэйшых планаў і верагоднасці вярнуцца на «Еўрабачанне» артыст выказаўся лаканічна: «Хочацца выспацца. Я толькі вярнуўся з конкурсу, таму думкамі яшчэ там. Але хто яго ведае, ці будзе наступны раз...»
Алена ДРАПКО
Традыцыя Дня Кастрычніцкай рэвалюцыі.
Пенсіі працоўным — без абмежаванняў, дадатковая падтрымка — сем’ям.
У апошнія гады колькасць чаргавікоў істотна памяншаецца
Для Блізнятаў падзеі на гэтым тыдні складуцца на іх карысць.