Можна мець вялікую сям'ю і пры гэтым не страціць сябе.
Да прыпынку пад'язджае сіні легкавік, з якога выходзіць маладая, прыгожая, без грама касметыкі на твары жанчына. «Хто тут мяне чакае?» — задорна гукае яна. Разумею, што пытанне адносіцца да мяне, і рушу насустрач Паліне Гесць, маме (цяжка паверыць!) шасцярых дзяцей.
Бязмежнасць мацярынскай любові
«Чаго-чаго, а хуткасці ў маім жыцці шмат», — усміхаецца спадарыня Паліна і запрашае мяне ў аўтамабіль, дзе на заднім сядзенні бачу самую малодшую дзяўчынку — гадавалую Стэфанію, якую мама пакуль не можа пакінуць адну.
Шматдзетная сям'я жыве ў пасёлку Сосны пад Мінскам, і ўласны дом, які будавалі восем гадоў і куды толькі-толькі перабіраюцца, — сапраўдны гонар гаспадароў. «Я ўсё жыццё жыла ў Соснах. У горадзе я знаходзіцца не магу — хварэю», — прызнаецца жанчына.
Зранку ў доме засталіся толькі Паліна Міраславаўна ды маленькая Сцеша. Муж на працы, а астатнія дзеці разбегліся хто на вучобу, хто на трэніроўку, хто ў дзіцячы садок. Мы праходзім на кухню, дзе гаспадыня, прыгатаваўшы кашу для дачкі, пачынае яе карміць.
«Мы з мужам думалі, што нам хопіць дваіх дзяцей, — распавядае маці, пакуль маленькая з захапленнем размазвае лыжкай кашу па стале. — Але, відаць, лёс вырашыў іначай, і спыніцца на дваіх не атрымалася».
Цяпер да гэтага бацькі ставяцца па-філасофску: маўляў, калі Бог даў, значыць, усіх паднімем. «Прыйшлі б яны да мяне ўсе адначасова — напэўна, звар'яцела б. А так — паспяваю адаптавацца», — кажа жанчына. Зрэшты, старэйшыя ўжо самі пакрысе становяцца памочнікамі. Першынцу Стасу цяпер 18 гадоў. Ён вучыцца ў БНТУ. Апроч таго, займаецца тэнісам і цяпер перайшоў на ўзровень судзейства, што дае хлопцу магчымасць зарабляць грошы. Увогуле ў сям'і Гесць тэнісам займаюцца чацвёра старэйшых дзяцей — на гэтым настойвае бацька. І хоць ва ўсіх розныя здольнасці да гэтага віду спорту, але затое аднолькава добрая фізічная падрыхтоўка. Вялікіх поспехаў у тэнісе дасягае другі сын Ян, якому цяпер 14. Дванаццацігадовы Трафім займаецца авіямадэліраваннем і сур'ёзна захапіўся варкаўтам — сілавымі трэніроўкамі. Ганна, якой 9 гадоў, чэмпіёнка Беларусі і свету па індыйскіх танцах сярод дзяцей. Пяцігадовую ціхмяную Глафіру спадарыня Паліна з усмешкай называе «дзіця — мамін адпачынак». Мяркуе, што Сцеша займее такі ж неспакойны характар, як старэйшая Ганна.
Усе дзеці вельмі розныя, і маці выдатна ведае характары, здольнасці і недахопы кожнага з іх. І калі раптам нехта з малечы праяўляе інтарэс да пэўнай дзейнасці, бацькі адразу імкнуцца развіваць гэту сферу: аддаюць дзяцей у гурткі, рыхтуюць тэматычныя падарункі. На маё пытанне, як удаецца не абдзяліць нікога ўвагай, жанчына адказвае: «Я заўсёды знаходжуся побач з тым, каму мая ўвага найбольш патрэбна ў гэты момант. Калі з адным трэба зрабіць урокі — іду да яго; другому пашыць касцюм да выступлення — шыю. Усе гэта разумеюць, і ніхто не адчувае сябе пакінутым». І, што адметна, мацярынскай любові ад гэтага менш не становіцца. Наадварот, са з'яўленнем новага дзіцяці яе ўсё больш.
Шасцёра дзяцей — гэта не страшна
З вопыту сям'і Гесць мець шасцёра дзяцей зусім не страшна. Толькі часам «цісне» грамадскае меркаванне. «Адно дзіця — гэта абавязкова, два — малайцы, а вось з'яўленне трэцяга ў вачах грамадскасці выклікае нараканні: маўляў, як жа вы іх будзеце карміць? Калі ў нас нарадзілася чацвёртае дзіця, пытанні задаваць перасталі. Цяпер ужо цікавяцца, калі будзе сёмае», — усміхаецца спадарыня Паліна.
Ёсць і такія «добразычліўцы», якія любяць папракнуць шматлікімі льготамі і дзярждапамогай. Але сям'я Гесць — яскравы прыклад таго, як можна не «сядзець на шыі» ў дзяржавы. «Безумоўна, вельмі істотным плюсам з'яўляецца бясплатнае абавязковае харчаванне ў школе, якое для ўсіх каштуе 110 тысяч на тыдзень. Да таго ж за дзіцячы садок мы плацім 50%. Але ў астатнім мы разлічваем толькі на ўласныя сілы, бо працуем на сябе. Дарэчы, з вялікай сям'ёй лягчэй эканоміць», — дзеліцца шматдзетная маці.
Гэта можа падацца неверагодным, але сама Паліна Гесць — з тых жанчын, каму адначасова ўдаецца і агонь сямейнага ачагу падтрымліваць, і рэалізоўвацца ў прафесіі (скончыла аспірантуру, выкладала маркетынг, і цяпер, у дэкрэце, працуе па спецыяльнасці ў кампаніі мужа), а таксама весці актыўнае грамадскае жыццё і займацца шматлікімі відамі рукадзелля. Апошняе, як і любімае хобі — чытанне, — спосаб рэлаксацыі. Спадарыня Паліна шые, вяжа, варыць мыла і дамашнія касметычныя крэмы — напэўна, дзякуючы натуральнай касметыцы жанчына мае такі малады і здаровы выгляд. Дзе яна знаходзіць на ўсё гэта час — можна толькі здагадвацца, але сама гераіня кажа, што яго не хапае ніколі.
Тым не менш, паспяваць рабіць усё гэта ўдаецца дзякуючы моцнаму характару, а таксама надзейнаму мужу Ільі, пра якога спадарыня Паліна расказвае з вялікай цеплынёй. Дарэчы, пазнаёміліся будучыя муж і жонка яшчэ ў студэнцтве і ўжо 20 гадоў крочаць па жыцці разам. У абаіх было строгае выхаванне з традыцыйнымі каштоўнасцямі, але ў той жа час у іх сям'і няма падзелу на «мужчынскія» і «жаночыя» абавязкі — ва ўсім пануе ўзаемавыручка. Усё гэта бацькі імкнуцца перадаць і дзецям. Але кожны з іх — асоба са сваім светам, сваімі здольнасцямі і сваім жыццёвым шляхам. Мудрыя бацькі гэта бачаць і толькі накіроўваюць сваіх нашчадкаў, але не стараюцца іх перайначыць.
Спадарыня Паліна не лічыць шматдзетнасць гераізмам, пераканана, што гэта норма. «Я заўсёды была кар'ерысткай і марыла «адбыцца» як спецыяліст, а дзеці былі далёка не на першым месцы. Але чым больш жыву, тым больш пераконваюся ў тым, што галоўнае прызначэнне жанчыны — сям'я».
Прыклад сям'і Гесць смела можна назваць паспяховым. Хоць, безумоўна, у гэты поспех укладзена шмат намаганняў, а шлях да яго зусім не лёгкі. Але недарэмна любімым выразам маёй суразмоўцы ў апошні час стаў наступны: «Дарогу адолее той, хто ідзе». На развітанне гаспадыня прызналася, што змагла рэалізавацца ў розных сферах, і пры гэтым захоўвае прагу жыцця. «Я зразумела, што галоўнае — жыць у гармоніі з сабой. У мяне гэта атрымліваецца».
Дзіяна СЕРАДЗЮК.
Фота аўтара
і з архіва сям'і Гесць.
Мінскі раён
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.