Першая беларуская прафесійная опера — аднагодка «Вяселля Фігара» Моцарта
Ёй 230! Столькі — жывуць. У прыватнасці, жанчыны, калі яны гераіні цудоўных твораў, што перажылі стагоддзі.
Дзе ж у Беларусі такія жанчыны? Далёка ездзіць не трэба — у Нясвіжы. Там наогул што ні імя — то гістарычная асоба, што ні герой — то вядомы за межамі мясцовасці, якая яго нарадзіла. І неабавязкова гэты герой са славутага роду: паходжанне можа быць простым і нават сялянскім. Калі ласка: Агатка. Звычайная вясковая дзяўчына з Нясвіжчыны. А каралёў пакарыла — на ўсю Рэч Паспалітую грымела яе імя. Таму што гэтае імя аўтары далі мастацкаму твору, оперы, напісанай у Нясвіжы нямецкім кампазітарам Янам Давідам Голандам на лібрэта аднаго з прадстаўнікоў роду Радзівілаў, чалавека, адоранага талентамі — Мацея Радзівіла. Сёлета на свяце «Музы Нясвіжа» адзначалі своеасаблівы юбілей «Агаткі», якая лічыцца першай беларускай прафесійнай операй. Калісьці яна гучала ў сценах палаца. Але падчас фестывалю музыка з «Агаткі» дзякуючы музыкантам Нацыянальнага канцэртнага аркестра Беларусі выйшла ў горад, да людзей, якія імкнуцца трапіць на канцэрты ў Палац культуры горада Нясвіжа.
Цяпер «Агатку» зноў выконваюць у Беларусі, нягледзячы на тое, што быў час, калі яе сляды згубіліся ў прасторы. Але жыло імя — сярод даследчыкаў, якія змаглі адчуць, што выпадковая знаходка цягне на сенсацыю. У 1989 годзе опера была знойдзена ў Кракаве, у адным з архіваў, і фактычна цудам (таемна!) вярнулася на радзіму. У яе новым нараджэнні для Беларусі адыграла ролю доктар мастацтвазнаўства Вольга Дадзіёмава, якая з'яўляецца навуковым кіраўніком «Муз Нясвіжа» ад пачатку гэтага фестывалю. Мэта яго — рабіць гісторыю беларускай музыкі больш зразумелай, а саму музыку вядомай людзям. Усё ж яна стваралася тут і ўвабрала мелодыку гэтых мясцін. Што да «Агаткі» — дык дакладна...
На службе ў магнатаў
Ян Голанд прыехаў у Нясвіж, быўшы ўжо вядомым кампазітарам у Германіі. У Гамбургу тады музычнае жыццё віравала. А Голанд да таго ж быў дырэктарам музыкі гамбургскага кафедральнага сабора. Ён пісаў шмат музыкі, якую ігралі ў канцэртах. Але дзіўны лёс творчых людзей: яны могуць нарадзіцца на адной зямлі, а набыць славу і пашану на іншай, як гэта стала з Голандам. Ён ехаў у Нясвіж, каб стаць дырыжорам нясвіжскай капэлы — запрасіў яго тагачасны гаспадар палаца Караль Станіслаў Радзівіл, вядомы як Пане Каханку. Новае месца абяцала шмат творчасці: заможныя і ўплывовыя гаспадары не шкадавалі сродкаў на свае капэлы і тэатр (напэўна, нездарма ж немец потым напіша кантату ў гонар Станіслава Караля Радзівіла). Нясвіж натхняў Голанда прыгожымі краявідамі і адкрыў шмат магчымасцяў для працы, якія кампазітар скарыстоўваў амаль 20 гадоў, пакуль тут жыў...
Менавіта ў Нясвіжы Ян Голанд пачаў пісаць оперы і балеты. Адзін з яго славутых твораў — опера «Агатка», прэм'ера якой адбылася ў тэатры пры палацы Радзівілаў ў 1784 годзе. Кампазітару пашчасціла на лібрэтыста. Ім стаў адзін з прадстаўнікоў славутага роду Мацей Радзівіл, чалавек добра адукаваны, які пажыў у Еўропе. і калі ён вярнуўся ў Нясвіж, то ведаў і адчуваў еўрапейскія мастацкія павевы і кіраваўся імі ў сваё творчасці. Сам быў літаратарам, музыкантам-аматарам (пісаў паланезы, санаты, серэнады)... Але на гэты раз нагода патрабавала маштабнага твора: у Нясвіжы чакалі прыезду караля Рэчы Паспалітай Станіслава Аўгуста Панятоўскага. Была ў яго неабходнасць сустрэцца з уплывовым літоўскім магнатам Радзівілам напярэдадні выбараў у Сейм Рэчы Паспалітай. Гаспадар наладзіў каралю пышны прыём, часткай якога павінна была стаць прэм'ера оперы.
Сёння гэтая гісторыя вядомая і нават асэнсаваная і абыграная ў тэмах сучасных мастацкіх твораў. Але не ў малой ступені менавіта дзякуючы «Агатцы», у назве якой ёсць і другая частка: «Прыезд Пана».
Сялянка як зорка
Спярша ўсё ж яна, звычайная сялянская дзяўчына. Праўда, шчыра закаханая. Так, што без свайго Антака жыцця не бачыла. Маладая пара змагаецца за сваё шчасце. І ёй-такі шчасціць — на добрага пана, які дапамагае яднанню закаханых. Казка...
Не, сапраўды, нешта неверагоднае было: перад каралём іграць спектакль, дзе галоўныя героі — мясцовыя сяляне. Вымусіць ім спачуваць, перажываць, ды і захапляцца ўрэшце. Нешта крамольнае праглядаецца ў такой ідэі... Але не быў бы то Караль Радзівіл, каб не імкнуўся зарыгінальнічаць, нават перад такім саноўным госцем і фактычна паказаць яму на яго месца ў Нясвіжы... А Мацей у гэтым дапамог — праз лібрэта. Ян Голанд галоўную ідэю адчуў і ўвасобіў праз музыку: у ёй можна пачуць народныя мелодыі, якія найлепшым чынам падкрэсліваюць мясцовае паходжанне герояў і дэмакратызм сюжэту (пан у ім усё ж не галоўную ролю адыгрывае). Мо такім чынам некаранаваныя каралі Вялікага Княства Літоўскага вырашылі намякнуць галоўнаму пану на яго ролю ў палітычным спектаклі, які разыгрываўся на вачах ва ўсіх у той час?..
неверагоднае было: перад каралём іграць спектакль, дзе галоўныя героі — мясцовыя сяляне.
Гісторыю цяжка адсячы, разважаючы пра гэтую оперу. І такое адчуванне, што той грамадскі кантэкст (ды і самі гаспадары з іх госцем) былі дадатковымі ўдзельнікамі добра прадуманага спектакля. Камічная опера «Агатка, або Прыезд Пана» была пралогам да яго... Але ж якім бліскучым! Сам кароль паддаўся духу твора і нават перайшоў на беларускую мову, калі прамаўляў вершаваны тост у гонар гаспадара. І пайшла слава нашай «Агаткі» далей за Нясвіж...
Пра гэта і іншыя факты з біяграфіі оперы, народжанай у Нясвіжы, можна даведацца з даследавання Вольгі Дадзіёмавай «Еўропа на музычных скрыжаваннях». А таксама пра тое, што пасля той прэм'еры «Агатку» яшчэ 40 гадоў паказвалі ў Варшаве, Кракаве, Любліне, Познані, Львове. Пра оперу шмат пісалі ў газетах таго часу — настолькі яна была папулярная. І нават на пачатку ХХ стагоддзя да яе звярталіся як да класічнай оперы. Напрыклад, у 1926-м менавіта выкананнем «Агаткі» адзначалася 150-годдзе Варшаўскага тэатра.
«Фігара» — тут?..
А потым пра «Агатку» забыліся. Лічылі страчанай. Тым больш што тэатры свету аддавалі прыхільнасць іншым камічным операм, прызнаным шэдэўрамі эпохі класіцызму, як напрыклад, «Вяселле Фігара» Моцарта. Лёгкі сюжэт, інтрыга, кемлівы герой і цудоўная музыка зрабілі гэтую оперу вельмі запатрабаванай. І ў нас таксама — як вядома, месцы пустымі не бываюць... Але «Агатка» вярнулася, нават загучала. У 1990-м опера была запісана на беларускім радыё, а ў 1999-м паказана ў Мінску «Беларускай капэлай» у памяць пра аднаго са стваральнікаў — Мацея Радзівіла. З вяртаннем «Агаткі» ў музычнае жыццё пайшлі параўнанні: на што яна падобна і чаму? Калі наш самы буйны музычны помнік культуры ХVІІІ стагоддзя паўстаў у адзін час з операй «Вяселле Фігара», то невыпадкова гэтыя творы падобныя?..
Віктар Скарабагатаў, кіраўнік «Беларускай капэлы», які займаецца аднаўленнем беларускіх опер, зрабіў акцэнт на параўнанні «Агаткі» з «Фігара» і прыйшоў да высновы: «Нават для дылетанта ў музыцы пасля праслухоўвання відавочнае не проста падабенства, а амаль поўнае супадзенне мелодый пачатку каваціны Фігара з «Вяселля...» і другой часткі арыі Агаткі з 1-й дзеі оперы Голанда. Паколькі «Агатка» напісана на два гады раней за «Фігара», меркаванні наконт, здавалася б, натуральнага пераасэнсавання Голандам творчасці Моцарта адпадае само сабой. Можна і вышэйзгаданым супадзенням даць тлумачэнне. Тэматызм, мастацкія ідэі, што называецца, луналі ў паветры Еўропы XVІІІ стагоддзя. З прыемнасцю можна ўсвядоміць, што свежыя мастацкія ідэі даляталі ў Вену таксама і з Нясвіжа...»
Але нам сёння важна, каб музычныя ідэі з Нясвіжа пайшлі па ўсёй Беларусі. Насамрэч тое, што даносяць пра беларускую музычную культуру праз асветныя фестывалі навукоўцы і музыкі, дапамагае ўглядзецца ў сваю радзіму і зразумець: яна дзівосная! Можа, не без дзівацтваў (але часам свядомых), якімі грашылі некаторыя гістарычныя асобы. Не без шчырасці і чысціні душ, як у простых герояў «Агаткі». І не без талентаў, якія прапаноўваюць цудоўныя ідэі і арыгінальныя сюжэты праз мастацкія творы, да якіх звяртаемся праз часы. І ўсё не перастаем здзіўляцца іх загадкам...
Ларыса ЦІМОШЫК.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.