Па выніках ІІ чэмпіянату свету па класічным паўэрліфтынгу, што праходзіў у ПАР, у скарбонцы беларускай зборнай чатыры залатыя, адзін сярэбраны, два бронзавыя медалі, а таксама адзін сусветны рэкорд.
У асноўным складзе зборнай выступілі члены аб'яднанай каманды рэспубліканскага грамадскага аб'яднання «Белая Русь» і духоўна-спартыўнага цэнтра. Увогуле ў першынстве ўдзельнічала 35 краін, за перамогу змагаліся каля 600 спартсменаў. Беларусь на спаборніцтвах прадставілі пяць чалавек у катэгорыях «дарослыя», «юніёры» і «юнакі».
Двухразовы чэмпіён свету па паўэрліфтынгу (сілавому трохбор'ю) Аляксандр Грынкевіч-Суднік сваім выступленнем задаволены, але не ўтойвае, што спартыўны вынік мог быць яшчэ вышэйшым — фізічная форма дазваляла. Аднак чэмпіён заўважае, што ў спорце не заўсёды атрымліваецца рэалізаваць усе рэзервы.
«У першым практыкаванні атрымаў невялікую траўму, і яна сказалася на далейшых спаборніцтвах, — тлумачыць Аляксандр. — Але атрымалася галоўнае — здабыць залатую ўзнагароду, таму я задаволены».
У цэлым жа выступленне беларускай зборнай на чэмпіянаце Аляксандр Грынкевіч-Суднік лічыць вельмі ўдалым, бо, па яго словах, беларускія спартсмены «не разбэшчаны колькасцю ўзнагарод» у параўнанні з нашымі суседзямі — расіянамі і асабліва ўкраінцамі — прызнанымі фаварытамі ў гэтым відзе спорту.
Канкурэнцыя на спаборніцтвах была сур'ёзная — больш за 10 чалавек у катэгорыі. Але гэта не перашкодзіла прыгожай і таненькай з выгляду дзяўчыне Аляксандры Атчанашка ўстанавіць сусветны рэкорд, падняўшы ў суме 330 кілаграмаў. І хто пасля гэтага скажа, што штанга — не «дзявочы» снарад? «Было вельмі цяжка. Дасюль не верыцца, што чэмпіён свету — гэта я», — усміхаецца Аляксандра.
Дзіяна СЕРАДЗЮК
Мерапрыемства праводзіцца на добраахвотнай аснове.
Не выявіць ні секунды абыякавасці.