Нядаўна вядомы амерыканскі эканаміст і прафесар Кенэт Рогаф, які працуе ў Гарвардскім універсітэце, прапанаваў досыць нечаканую для многіх ідэю — знішчыць усе наяўныя грошы ў свеце.
У артыкуле, апублікаваным у газеце Fіnancіal Tіmes, ён выказвае пункт гледжання аб тым, што наяўныя грошы маюць шэраг сур'ёзных праблем. Па-першае, калі цэнтрабанкі, спрабуючы змагацца з крызісам, робяць стаўку значна ніжэй за нулявую адзнаку, людзі пачынаюць пераводзіць грошы ў наяўныя. Па-другое, існуе відавочная праблема выкарыстання наяўных грошай для злачыннай дзейнасці і ў ценявой эканоміцы. Ён прыводзіць прыклад, калі пасля арышту вядомага прадстаўніка мексіканскай наркамафіі Хаакіна Гузмана ў адным з яго пакояў было знойдзена 200 мільёнаў долараў наяўнымі.
Таксама выкарыстанне наяўных грошай у сваім бізнесе дазваляе некаторым не плаціць падаткі. Па разліках прафесара Рогафа, у Еўразоне і ЗША на кожнага жыхара прыпадае прыкладна 4000 долараў наяўнымі, а на тэрыторыі Японіі сума амаль у два разы большая. Пры гэтым вялікая частка наяўных грошай захоўваецца ў буйных купюрах.
Можна пагадзіцца з тым, што адмова ад наяўных грошай істотна ўскладніць жыццё злачынцаў. Сапраўды, цяжка ўявіць, якім чынам, напрыклад, наркадылер будзе прадаваць наркотыкі сваім кліентам. Наўрад ці яго задаволяць грашовыя пераводы або аплата крэдытнай карткай, што можа быць лёгка прасочана паліцыяй і стане доказам яго злачыннай дзейнасці.
На прадпрыемствах кіраўніцтву прыйдзецца адмаўляцца ад практыкі заробкаў «у канвертах», што, на жаль, з'яўляецца распаўсюджаным спосабам ухілення ад падаткаў і ў Беларусі. У выніку ўся заработная плата будзе налічвацца ў адпаведнасці з афіцыйнымі рэкамендацыямі і дзяржава будзе ў поўнай меры атрымліваць сацыяльныя адлічэнні, а работнікі, якія раней атрымлівалі грошы ў канверце і гублялі ў выніку частку сваёй пенсіі з‑за нявыплаты працадаўцам падаткаў, змогуць прэтэндаваць на пенсію ў поўным аб'ёме.
Нанясе такая практыка ўдар і па ценявой эканоміцы. Прадпрымальнік, які нелегальна вядзе бізнес, цяпер будзе вымушаны легалізавацца, не будучы ў стане ні набыць сыравіну, ні прадаць за наяўныя гатовую прадукцыю, не пакідаючы слядоў для падатковай інспекцыі.
Мінусы таксама відавочныя. Сістэмы для аплаты электроннымі грашыма недасканалыя, часта «завісаюць» або адмаўляюцца абслугоўваць пэўную картку. Уявіце, што вы пайшлі вечарам па хлеб, а ў краме тэрміналы для аплаты крэдытнай карткай не працуюць ці не хочуць абслугоўваць вашу картку ў сувязі з нейкай памылкай або збоем. Сітуацыя малапрыемная, але лёгка вырашальная сёння, калі можна аплаціць пакупку наяўнымі. А што рабіць, калі іх больш не будзе? Класціся спаць галодным?
Іншай праблемай з'яўляецца неабходнасць адначасовай адмены наяўных грошай па ўсім свеце. Калі ў большасці эканомік наяўныя грошы адменяць, але дзесьці яны ўсё ж такі захаваюцца, нічога не перашкаджае выкарыстоўваць замежную наяўную валюту як для злачыннай дзейнасці, так і для выдачы заробкаў у канвертах. Яна, дарэчы, можа аказацца вельмі запатрабаванай у падобнай сітуацыі, што дазволіць гэтым дзяржавам зарабляць, друкуючы наяўныя грошы на экспарт, і пазбавіць сэнсу адмову ад наяўнасці ў іншых краінах.
Трэцяй праблемай стане неабходнасць эмісіі крэдытных картак для ўсіх жыхароў Зямлі без выключэння і стварэнне сістэмы аплаты і прыёму плацяжоў не толькі для ўсіх гандлёвых кропак, але і для звычайных грамадзян. У выпадку адмены наяўных грошай атрымаецца, што чалавек без крэдытнай карткі страціць магчымасць купляць што-небудзь неабходнае для задавальнення сваіх патрэб. І што рабіць у тым выпадку, калі вы хочаце прадаць непатрэбную вам рэч за невялікія грошы іншаму грамадзяніну?
Гэтыя відавочныя праблемы не дазволяць нам дачакацца ў бліжэйшыя гады адмовы ад выкарыстання наяўных грошай.
Сяргей КІЗІМА,
доктар палітычных навук
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.