Вострыя кішэчныя інфекцыі таму так і называюцца, што востра атакуюць страўнікава-кішачны тракт, куды трапіў нейкі інфекцыйны агент. Агентаў гэтых неверагодная колькасць. Свет густа населены мікраарганізмамі, якіх мы не бачым, але яны ёсць! Той, хто не жадае ўсведамляць гэта, становіцца іх ахвярай. Сёлета было зафіксавана звыш 6,5 тысячы такіх фактаў. І, зразумела, гэта не ўсе выпадкі, паколькі ў большасці падобных сітуацый хворым не патрабуецца спецыяльная медыцынская дапамога.
Спецыялісты кажуць, што самае важнае — не дапусціць масавых заражэнняў у тых жа дзіцячых калектывах, аздараўленчых летніках і г.д., што бывае звязана з ужываннем няякасных прадуктаў харчавання і вады. Сёлета такіх успышак не было. Самае важнае, што павінен мець на ўвазе кожны з нас — мы самі адказваем за тое, што спажываем. Гэта яшчэ называецца прафілактыкай на асабістым узроўні. Якімі б жорсткімі ні былі для гандлю меры пакарання за парушэнне правілаў рэалізацыі прадуктаў (а гэта досыць вялікія штрафы), пакупнік не павінен губляць пільнасць. Наўмысна ніхто нікога труціць не хоча, аднак цалкам расслабляцца не варта ў любым выпадку, паколькі ніхто не адмяняў чалавечы фактар. Хадзіць па прадуктовым аддзеле варта з усведамленнем важнасці справы — прыглядаючыся да ўсяго, на чым спыняецца выбар. Умовы захоўвання і тэрмін прыдатнасці павінны хваляваць нас нават больш, чым тое, наколькі смачнай акажацца пакупка. Калі вы заўважылі нейкае парушэнне, неабходна звярнуць увагу адміністрацыі ўстановы. Аднак калі парушэнні носяць сістэмны характар, скаргі трэба накіроўваць у Міністэрства гандлю.
Сусветная арганізацыя аховы здароўя рэкамендуе прытрымлівацца некаторых правілаў:
1
Чысціня. Падчас гатавання ежы заўсёды чыстымі павінны быць рукі, рабочыя паверхні, абсталяванне, посуд.
2
Раздзяленне сырога і прыгатаванага. Каб мікраарганізмы з сырога мяса, рыбы, малака не трапілі ў гатовыя прадукты, іх трэба асобна гатаваць і захоўваць у закрытым посудзе.
3
Тэрмічная апрацоўка. Малочныя і мясныя прадукты павінны падвяргацца тэрмічнай апрацоўцы, што цалкам знішчае або істотна змяншае колькасць мікробаў.
4
Умовы захавання. Прыгатаваныя стравы (асабліва мясныя, а таксама салаты з маянэзам/смятанай) могуць захоўвацца пры тэмпературы не вышэй за +5 градусаў. Неабходна ўлічваць, што халадзільнае абсталяванне (як у гандлёвых залах, так і дома) не так эфектыўна спраўляецца са сваёй задачай, калі тэмпература паветра ўзнімаецца вышэй за 30 градусаў.
5
Ужыванне надзейных прадуктаў і вады. Нельга набываць прадукты «з зямлі» (стыхійнага гандлю) і піць небутыляваную і негатаваную ваду.
— Шпіталізацый, звязаных з вострымі кішэчнымі інфекцыямі, у сталіцы у апошнія гады ўсё менш, — тлумачыць намеснік галоўнага ўрача па лячэбнай рабоце Мінскай гарадской клінічнай інфекцыйнай бальніцы Святаслаў ВЕЛЬГІН. — Найчасцей сустракаюцца гастраэнтэрыты, звязаныя з парушэннем захоўвання, правілаў чысціні падчас гатавання. Дзеці, а следам за імі і дарослыя нярэдка пакутуюць ад вірусных гастраэнтэрытаў — ротавіруснай інфекцыі. Фіксуецца на працягу года некалькі выпадкаў батулізму, што звязана з ужываннем няправільна прыгатаваных мясных, грыбных, рыбных кансерваў.
Паводле слоў загадчыка супрацьэпідэмічнага аддзялення Рэспубліканскага цэнтра гігіены, эпідэміялогіі і грамадскага здароўя Дзмітрыя ГАЛОЦІКА, калі падчас вострага кішэчнага захворвання хворага непакоіць не толькі моцная дыярэя, але і высокая тэмпература з ванітамі, неабходна звярнуцца да ўрача. Іначай можна стаць у выніку носьбітам бактэрыі дызентэрыі. У выпадках «лёгкіх атручэнняў» рэкамендуецца мець у хатніх аптэчках ніфураксазід, цыпрафлаксацын, а таксама энтэрасарбенты кшталту смекты і актываванага вуглю. Падчас дыярэі неабходна таксама спажываць вялікую колькасць вады. Можна прымяняць і салявыя сумесі, якія ў сухім выглядзе прадаюцца ў аптэках (нормагідрон у парашку).
Парады ад жыцця
*Не ўжывайце сырыя яйкі — ні курыныя, ні перапяліныя. Гэта не толькі некарысна, але і небяспечна, паколькі пакідае рызыку захворвання на сальманелёз. Яйкі трэба добра смажыць і варыць.
*Практыка сведчыць, што атручэнні падчас тых жа вясковых вяселляў летам здараюцца не па віне грамадскага харчавання, а па віне клапатлівых гаспадынь, якія намагаюцца карміць гасцей стравамі, прыгатаванымі на некалькі дзён наперад.
*Калі вы — аматар гатовых і паўгатовых вырабаў кулінарыі, то абавязкова сачыце за тэрмінамі рэалізацыі такой прадукцыі і абавязкова прымяняйце самую працяглую тэрмічную апрацоўку, якая калі не цалкам вынішчае хваробатворныя мікробы, то значна зніжае іх колькасць, што робіць прадукт бяспечным.
*Нават самая сур'ёзная тэрмічная апрацоўка не зробіць дзічыну бяспечнай, калі яна заражана, скажам, трыхінеламі. Тут патрэбен толькі ветэрынарны агляд.
*У грамадскіх месцах лепей карыстацца вадкім мылам — так бы мовіць, аднаразовага выкарыстання. Мыла шматразовага карыстання (цвёрдае) само па сабе збірае некаторыя бактэрыі.
*Падтрымлівайце чысціню не толькі на ўзроўні, скажам, кухоннага стала, а наогул — ва ўсёй кухні, на ўсіх паверхнях.
Святлана БАРЫСЕНКА.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».