Барысаўскі БАТЭ стартаваў у 2-м кваліфікацыйным раўндзе Лігі чэмпіёнаў з хатняй нічыёй з албанскім клубам «Скендэрбеу» з горада Корча.
Я часта чую, як у спорце паўтараюць старое і добра вядомае выказванне: «Для перамогі ўсе сродкі добрыя». У матчы з барысаўчанамі албанскія футбалісты валіліся, як падкошаныя, імітавалі пакуты, сутаргава, нібы ад болю, білі рукамі, нагамі па полі і ўсяляк імкнуліся дацягнуць гэты матч да нічэйнага выніку.
— Гэта, безумоўна, раздражняла, — адзначыў пасля гульні Аляксандр Ермаковіч, галоўны трэнер БАТЭ. — Але гэта асаблівасць паўднёвых каманд. Яны часта карыстаюцца футбольнай хітрасцю. Усё гэта непрыемна.
— Напрыканцы сустрэчы мы перасталі на гэта рэагаваць, — працягвае думку трэнера Ягор Філіпенка, абаронца барысаўскай каманды. — Мы разумелі, што гэта не столькі ад болю, колькі ад жадання адпачыць.
Але пры нічыёй з чэмпіёнам Албаніі, з далёка не самым рэйтынгавым клубам Еўропы, наракаць толькі на правакуючыя паводзіны гасцей — ідэя абсурдная. У БАТЭ было два таймы, 90 хвілін «з хвосцікам», каб упэўнена перамагчы і зрабіць зачын перад другой сустрэчай. Але гэтага каманда не зрабіла. У першай палове галкіпер албанцаў наогул сумаваў па працы і мог цалкам засяродзіцца на прыгажосці маляўнічага барысаўскага неба ці паслухаць спевы фанатаў. «Даць прыкурыць» балканцам Віталь Радзівонаў і кампанія змаглі толькі ў другой палове. Менавіта ў Радзівонава, капітана «жоўта-сіняй» дружыны, напрыканцы гульні быў самы небяспечны момант, але форвард прабіў міма. І ўсё — 0:0. Так, лічбы на табло, можа, і сапсавалі настрой балельшчыкам, аднак другі адрэзак прадэманстраваў, што такога апанента беларусы могуць перамагаць. Праўда, хто ведае, як складзецца матч у гасцях і якія футбольныя хітрыкі назапашаны ў «Скендэрбеу»?
— Лічу, што шанцы напярэдадні гульні ў адказ не змяніліся. Яны па-ранейшаму 50 на 50, — рэзюмаваў Філіпенка.
Тарас ШЧЫРЫ,
г. Барысаў.
Канцэрт для дзяцей і моладзі, пластычны спектакль Ягора Дружыніна і «Рок-панарама».