Ёсць прынамсі дзве прычыны наведаць старадаўні горад на тэрыторыі Магілёўшчыны падчас сярэднявечнага фэсту, які адбудзецца ў бліжэйшыя выхадныя. Двухдзённая праграма абяцае шмат розных адкрыццяў і забаў. Але найбольш цікавымі стануць выстаўка рэдкіх археалагічных прадметаў, знойдзеных на мінулым тыдні, і перапахаванне сярэднявечнага воіна.
Сярод артэфактаў, якія можна будзе пабачыць на свае вочы, берасцяная грамата ХІІ стагоддзя (трэцяя па ліку са знойдзеных на Беларусі!), каштоўныя ўпрыгожанні, элементы старажытнай зброі, візантыйская чаша для віна, распісаная золатам, і шмат чаго іншага. Гісторыкі мяркуюць, што ім пашчасціла знайсці княжацкі двор разам з ювелірнай майстэрняй. Што датычыцца перапахавання рыцара, то гэта і наогул незвычайны для нашай краіны факт. Па словах кіраўніка археалагічнай экспедыцыі, доктара гістарычных навук, прафесара Ігара Марзалюка, такое на тэрыторыі Беларусі адбудзецца ўпершыню. Сярэднявечныя рыцарскія даспехі, у якіх аказаліся астанкі воіна, былі знойдзены летась у мясцовай рачулцы Віхра.
—Ёсць звесткі, што 4 (16‑га па новым стылі) лістапада 1502 года ў гэтым месцы адбылася бітва войскаў Вялікага Княства Маскоўскага і Вялікага Княства Літоўскага, — кажа Ігар Марзалюк. — Але арміі ВКЛ на чале з князем Міхаілам Заслаўскім не пашчасціла, яна была разбіта, а частка войска адступіла да замка, дзе зачынілася. Знойдзены намі рыцар якраз з тых, хто не паспеў выратавацца.
Перапахаванне адбудзецца перад пачаткам фестывалю. Па праваслаўнай традыцыі невядомага воіна адпяюць у кафедральным саборы ў гонар Аляксандра Неўскага, урна з яго прахам будзе пахавана ля падножжа Замкавай гары. Там ужо ўсталявана стэла ў выглядзе аркі ў гонар воінаў — абаронцаў Мсціслава. На магіле з'явіцца помнік з надпісам аб тым, што тут пахаваны невядомы рыцар, які загінуў падчас бітвы.
Нэлі ЗІГУЛЯ.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
«Мы зацікаўлены, каб да нас прыязджалі».