Як карэспандэнт «Звязды» браў удзел у масавым зборы ягад
Ноч перад тым, як адправіцца ў лес, нястомны звяздовец правёў... у Полацкім аддзяленні міліцыі на транспарце. Гэтым, як ні дзіўна, вельмі застаўся задаволеным (матэрыял чытайце ў адным з наступных нумароў). Чарнічны чэмпіянат настолькі прыемна ўразіў, што пісаў рэпартаж амаль цэлы дзень.
Гумавыя боты
Шчыра прызнаюся, што ехаць мне на той чэмпіянат не вельмі хацелася. Тым больш у суботу.
А напярэдадні маёй паездкі ў Полацк Валянціна Уласенка, галоўны спецыяліст аддзела ідэалагічнай работы, культуры і па справах моладзі Полацкага райвыканкама, «нагадала», што ў лес трэба абавязкова апрануць куртку з доўгімі рукавамі, а на ногі — гумавыя боты. І сродак для таго, каб «пужаць» камароў, неабходны.
Каб знайсці тыя боты, патурбаваў з дзясятак сваіх знаёмых. Аднакласнік, былы будаўнік, прапанаваў кірзавыя, але яны цяжкія, ды і на пару памераў больш, чым мне трэба. Цесць парадаваў, што ёсць! Але ж 44-га памеру, а мне максімум патрэбен 40-ы. Былая мая калега сказала, што боты ёсць! Але яны ў вёсцы. Зразумеў я, што мае знаёмыя гараджане, як і я, зусім не гатовыя да лясных прыгод.
Нацягнуў на ногі нешта падобнае на кеды — вельмі лёгкі атрымаўся абутак.
Мой цягнік адыходзіў а другой гадзіне ночы. З задавальненнем прайшоўся па родным горадзе, які, аказваецца, у гэты час сутак не спіць. На пешаходнай вуліцы Талстога з кавярні гучала песня «ДДТ». Народ расслабляўся.
З'еў камара
Па тэлефоне супрацоўнікі Полацкага райвыканкама мне сказалі, што роўна ў 6.40 недалёка ад Дома быту адправіцца аўтобус, які павязе ўдзельнікаў чарнічнага чэмпіянату ў лес. Спачатку мяне хацелі ўключыць у склад каманды... медсанчасці, якая адказвае за здароўе супрацоўнікаў мясцовых праваахоўных органаў. Потым, як той казаў, «перайгралі», і мяне даверылі «апякаць» іншым медыкам.
Калі я ўбачыў Вольгу Сяргееўну Кочатаву, галоўнага спецыяліста па ідэалагічнай рабоце Полацкай цэнтральнай гарадской бальніцы, зразумеў, што ў лесе ў мяне будзе больш цікавы аб'ект для асаблівай увагі, чым нейкія ягады... Я ў добрым сэнсе гэта пішу.
— Вы, наогул, у лесе арыентуецеся? Галоўнае — не згубіцца! — звярнулася яна да мяне, калі мы сышлі з дарогі.
— Трэба пакінуць нейкую... — адказаў я.
А што меў на увазе пад словам «нейкую» — і сам не ведаў. Добра, што мабільная сувязь не адключылася. А калі б заблудзіліся, дык была б нагода для напісання артыкула ў рубрыку пра працу выратавальнікаў.
У нашай кампаніі быў яшчэ Дзяніс Гуткін, галоўны спецыяліст аддзела ідэалагічнай работы, культуры і па справах моладзі райвыканкама. Вялікі яму дзякуй за тое, што дапамог зрабіць здымкі.
Шчыра кажучы, збор чарніц у мяне не ладзіўся. Пакуль Вольга Сяргееўна вельмі хутка знаходзіла ягады і збірала іх, пры гэтым умудраючыся задаваць мне пытанні, я расказваў пра тое, чым займаўся на міжнародным фестывалі мастацтваў «Славянскі базар у Віцебску». Гаварыў і пра сустрэчы з цікавымі людзьмі. Як таго Астапа Бэндэра, героя твораў Ільфа і Пятрова, які з раніцы нічога не еў, мяне «панесла». І падчас размоў я рабіў перакуры.
А чарніцы тут і там, толькі прыглядзецца трэба, пакланіцца. Раней, дарэчы, мяне ў прафесійным плане раздражняла, калі калегі, пішучы пра збор ягад, пісалі нешта кшталту: «трэба пакланіцца кожнай ягадцы». А так яно ж і ёсць!
Пакуль балбатаў, умудрыўся праглынуць камара.
Пра «зорак»
Працэс збору чарніц актывізаваўся, калі ў лес прыехалі два Алегі з тэлеканала «АНТ»: Гаруноў (аператар) і Шапель (карэспандэнт). Чым здзівіў спадар аператар: ён падчас здымак лепш за ўсіх бачыў, дзе ёсць ягады, і падказваў, дзе лепш збіраць.
— Саня, ты што, па ягадах ходзіш? Во, паглядзі! Во яшчэ, не тут, а направа паглядзі! Ну, зноў наступіў! — звяртаўся да мяне майстар кадра. І вельмі здзівіўся, што ў мяне сёння, аказваецца, чарнічны дэбют.
А яго цёзку чамусьці здавалася, што сёлета чарніц мала. Так і сказаў, калі яны запісвалі так званы стэндап (рэпарцёрскі прыём, калі журналіст працуе непасрэдна ў кадры, на месцы падзеі. — Аўт). Агучыў, што наконт колькасці ягад хваліцца асабліва сёлета няма чым. Дык ён узяў жа, каб паказаць гледачам, менавіта маё вядро! А там ягад толькі на донцы на той час і было! Шчыра прызнаюся, не занадта шмат з'явілася і потым.
А вось «мая праўда»: хто хацеў і не ленаваўся, як я, назбіраў поўнае вядро! Некаторыя і грыбоў паралельна трохі. Ёсць чарніцы ў полацкіх лясах, прыязджайце!
Не ведаю, колькі было чарніц летась, але і сёлета нямала. Магчыма, паважаны Алег зрабіў такі захад з-за таго, што па чутках чарніцы «замарозіла», але я ж быў у тым жа лесе і бачыў іх на ўласныя вочы.
Дамы-медыкі спачатку вельмі хваляваліся перад камерай. Але ж хутка высокапрафесійныя цёзкі знайшлі падыход да тых, хто павінен быў трапіць у кадр і адказваць на пытанні.
Дарэчы, потым нечакана для сабе звяздовец стаў у лесе «зоркай». Цікава, што яшчэ перад пачаткам збору ягад некаторыя жанчыны ўсё хацелі ўбачыць «жывога карэспандэнта». А пасля таго, як узважвалі ўраджай, пачаўся «ажыятаж». Некалькі разоў з задавальненнем фатаграфаваўся побач з тымі, хто хацеў фота на памяць. Добра, што аўтограф не прасілі...
Сярод 40 прадстаўнікоў сферы аховы здароўя Полацкага раёна, якія бралі ўдзел у чэмпіянаце, «золата» ў каманды Вароніцкай бальніцы сястрынскага догляду — 20 кг чарніц!
«Серабро» — у каманды Ветрынскай участковай бальніцы (13,5 кг).
«Бронзавы медаль» заваявалі медыкі са стаматалагічнай паліклінікі (11 кілаграмаў 350 грамаў).
Чарнічныя кароль і каралева
Вынікі чэмпіянату праводзіліся ў Полацку ля знакамітага знака, які паказвае, што гэты горад — цэнтр Еўропы. Вельмі крэатыўна арганізатары падышлі да правядзення святочнай праграмы. У скверы можна было паваражыць пры дапамозе напою з чарніц: на каханне, грошы, здароўе... Я выбраў на каханне... Не верце варажбе! Усё атрымаецца, калі вы шчыра кахаеце!
Медыкі расказвалі пра тое, чым карысныя чарніцы. Працавалі таксама «Ягадная карчма», тэматычнае фотаатэлье, мастацкая і іншыя пляцоўкі — усяго іх было 11. Упершыню правялі конкурс «Ягадная краса».
Самым інтрыгуючым момантам, вядома, стала абранне чарнічных Караля і Каралевы. Пры дапамозе «латарэйнага барабана» вызначылі тых, хто будзе з гонарам насіць гэтыя высокія і насамрэч унікальныя тытулы. У барабане былі прозвішчы тых, хто больш за астатніх назбіраў ягад.
— Чорныя ручкі, зубкі, язычок, — гэта будзе пацвярджэннем таго, што кандыдаты насамрэч збіралі чарніцы, — сказала вядучая цырымоніі.
Каралём стаў... хлопчык Глеб Дзятлаў. А Чарнічнай каралевай — работніца Полацкага лясгаса Анастасія Маразёнак.
— Навінка сёлетняга фестывалю ў тым, што ён праводзіцца і ў горадзе, а не толькі па-за яго межамі. Летась вынікі чэмпіянату падводзілі ў аграгарадку Заазер'е, раней — на беразе возера Белае, любімым месцы масавага адпачынку. Зразумела, не ўсе могуць з самай раніцы адправіцца ў лес па чарніцы. Галоўная задача чэмпіянату — зрабіць для людзей свята. Думаю, налета запросім узяць удзел у чэмпіянаце прадстаўнікоў гарадоў-пабрацімаў, а іх у Полацка аж 24. І пакажам гасцям, як беларусы ўмеюць збіраць ягады, шанаваць сваю прыроду, родны край, святкаваць! — пракаментаваў Пётр Пяткевіч, намеснік старшыні райвыканкама па сацыяльных пытаннях.
А чарніцы я ўсё ж прывёз у Віцебск. Паўлітровы слоік з чарніцамі аддаў сваім любімым сынам.
Аляксандр ПУКШАНСКІ.
Полацкі раён — Полацк — Віцебск.
Фота аўтара
і Дзяніса Гуткіна
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!