28 ліпеня — Сусветны дзень барацьбы з гепатытам
У гарадах захваральнасць на вірусныя гепатыты вышэйшая, чым у сельскай мясцовасці. Штогод у краіне рэгіструецца каля 7 тысяч усіх выпадкаў вірусных гепатытаў.
— Вірусны гепатыт выклікае вострыя і хранічныя захворванні печані. Вострыя, жаўтушныя формы сустракаюцца ў нас сёння вельмі рэдка. Але колькасць хворых з хранічнымі віруснымі гепатытамі, якія выяўляюцца ўпершыню, паступова прырастае — за кошт больш дасканалага абследавання насельніцтва, — кажа загадчыца аддзялення вірусасацыяваных цырозаў печані Мінскай гарадской клінічнай інфекцыйнай бальніцы Людміла ЖМУРОЎСКАЯ. — Абавязкова абследуюцца цяжарныя, студэнты медустаноў, якія прыступаюць да практыкі. Пры першачарговым выяўленні ўрач павінен устанавіць, у якой форме працякае вірусны гепатыт (актыўнай ці не), ці патрабуецца лячэнне.
Найбольш добра ў свеце вывучаны пяць асноўных вірусаў гепатыту — A, E, B, C, D. Самымі распаўсюджанымі застаюцца А, В і С. Гепатыты А і Е перадаюцца з забруджанай вадой або харчовымі прадуктамі, бытавым шляхам. Працякаюць у вострай форме, так што іх цяжка «прапусціць». Гепатыты B, C, D перадаюцца ў выніку кантактаў з кроўю — падчас сексу, трапляння крыві на пашкоджаную скуру або слізістую, пры выкарыстанні забруджанага абсталявання падчас маніпуляцый, звязаных з траўмаваннем скуры (пірсінг, нанясенне тату, манікюр), а таксама пры ін'екцыйным увядзенні наркотыку.
— У большасці выпадкаў гепатыты перадаюцца сярод маладых людзей падчас сексу і выкарыстання ін'екцыйных наркотыкаў, — нагадвае загадчык аддзела эпідэміялогіі Рэспубліканскага цэнтра гігіены, эпідэміялогіі і грамадскага здароўя Уладзімір ПАШКОВІЧ.
ГЕПАТЫТ А. Прафілактычная вакцынацыя дзяцей 6 гадоў і па эпідэміялагічных паказаннях паспрыяла значнаму зніжэнню захваральнасці. Цяпер яна ў Беларусі на нізкім узроўні. Аднак рэгіструюцца выпадкі, завезеныя з іншых краін, дзе захваральнасць на гепатыт А значна вышэйшая. У асноўным цыркулююць таджыкскі, кіргізскі і егіпецкі варыянты.
ГЕПАТЫТ В. З 1996 года ў нас была арганізавана выбарачная вакцынацыя супраць гепатыту В па эпідпаказаннях, а ў 2000‑м яна трапіла ў нацыянальны каляндар прафілактычных прышчэпак. Вакцынацыя ўсіх нованароджаных, дзяцей у 13 гадоў і асобных груп рызыкі (медработнікаў і тых, хто пражывае разам з такімі хворымі) спрыяла зніжэнню і захваральнасці на гепатыт В. Цяпер яна ў Беларусі таксама на нізкім узроўні.
ГЕПАТЫТ С. Вострая і хранічная захваральнасць апошнім часам істотна не змяняецца. На жаль, вакцыны супраць гэтага тыпу віруса пакуль не існуе.
Звыш паловы выпадкаў інфіцыравання вірусамі гепатытаў В і С на працягу дзесяці гадоў не маюць ніякіх клінічных праяў. Аднак кожны чацвёрты, інфіцыраваны вірусам гепатыту В, пазней гіне ад раку або цырозу печані, якія развіваюцца з‑за інфекцыі.
Што дапаможа засцерагчыся?
1. Стандартныя санітарна-гігіенічныя захады — ужыванне ежы і вады гарантаванай якасці, захаванне тэхналогій гатавання страў, асабістая гігіена, купанне ў спецыяльна адведзеных месцах.
2. Выкананне манікюру, тату і г. д. у спецыяльных салонах, дзе, у адрозненне ад «салонаў на даму», інвентар апрацоўваецца належным чынам.
3. Рэгулярныя медагляды, здаровы лад жыцця (засцярога ад рызыкоўных сексуальных паводзін, неўжыванне наркотыкаў) і вакцынацыя. Прышчапіцца ад віруса гепатыту А можна ўсім, хто выязджае за межы краіны. Неспрыяльныя краіны па вірусных гепатытах — Сярэдняя і Паўднёвая Азія, Афрыка, Лацінская Амерыка, Украіна, некаторыя рэгіёны Расіі. Імунітэт выпрацоўваецца цягам 3–4 тыдняў. Для больш працяглага імунітэту рэкамендуецца правядзенне рэвакцынацыі. Прышчэпкі ад вірусных гепатытаў А і В можна зрабіць у Цэнтры імунапрафілактыкі на базе Мінскай гарадской дзіцячай інфекцыйнай бальніцы, а таксама ў некаторых паліклініках — платна.
Святлана БАРЫСЕНКА
Канцэрт для дзяцей і моладзі, пластычны спектакль Ягора Дружыніна і «Рок-панарама».