Дзесяцікласніца Ліцэя БДУ Настасся Капінская заваявала сярэбраны медаль на 8-й міжнароднай алімпіядзе па астраноміі і астрафізіцы ў Румыніі.
У склад беларускай каманды ўвайшлі таксама навучэнец гімназіі №1 з Ліды Сяргей Бірыч, навучэнец сталічнага ліцэя № 2 Дзмітрый Міхайлаў і выпускнікі гродзенскай гімназіі № 3 Антон Кедук і Яўген Протас. Усе яны перамаглі на рэспубліканскай алімпіядзе і ўвайшлі ў пяцёрку наймацнейшых у нашай краіне. Але на міжнароднай алімпіядзе ім трохі не хапіла вопыту і шанцавання...
У адрозненне ад міжнародных алімпіяд па матэматыцы або фізіцы, алімпіяда па астраноміі складаецца з трох тураў: тэарэтычнага, практычнага, які ўключае аналіз даных, атрыманых прафесійнымі астраномамі, і назіральніцкага. На апошнім этапе спаборніцтваў школьнікам давялося працаваць у планетарыі і пад адкрытым небам. Удзельнікам прапаноўваліся заданні на распазнаванне зорак, сузор'яў, туманнасцяў і г.д.
Падрыхтоўкай беларускай зборнай да спаборніцтваў займаліся дацэнт кафедры тэарэтычнай фізікі Брэсцкага дзяржаўнага ўніверсітэта імя А.С.Пушкіна Станіслаў Секяржыцкі і выкладчык астраноміі Ліцэя БДУ Аляксандр Паплаўскі. Па словах Аляксандра Паплаўскага, у гэтым годзе алімпіядныя заданні былі даволі складанымі і адначасова вельмі цікавымі, не падобнымі на традыцыйныя, з прыгожым тэкставым афармленнем. Напрыклад, у адной з задач касманаўту, які знаходзіцца ў адкрытым космасе, неабходна было пры дапамозе ёмістасці з вадой і вадзяной пары, стварыўшы рэактыўны струмень, вярнуцца назад у касмічны карабель.
Але бадай што галоўным сюрпрызам можна лічыць філалагічную падрыхтоўку сярэбранага прызёра міжнароднай алімпіяды ў Румыніі Настассі Капінскай. У Ліцэй БДУ дзяўчына паступала год таму як пераможца алімпіяды па беларускай мове. Але сустрэча з таленавітым педагогам, памножаная на вялікую працаздольнасць і імкненне да перамогі, прывялі Настассю да сярэбранай узнагароды на міжнародных спаборніцтвах па «няпрофільнай» для яе дысцыпліне.
Наступная міжнародная алімпіяда па астраноміі і астрафізіцы пройдзе ў жніўні 2015 года ў Інданезіі.
Надзея НІКАЛАЕВА
Мерапрыемства праводзілася на добраахвотнай аснове.
Не выявіць ні секунды абыякавасці.