Жывёліна прыкінулася цяжарнай, каб атрымаць больш булачак і садавіны.
У заапарку горада Чэнду ў Кітаі адбылася радасная падзея: самка панды па мянушцы Ай Хін зацяжарала. Супрацоўнікі звярынца вырашылі арганізаваць трансляцыю ходу яе цяжарнасці і родаў. Аднак тэлешоу прыйшлося адмяніць. Высветлілася, што хітрая панда толькі прыкінулася цяжарнай, каб атрымаць больш корму. Шасцігадовая Ай Хін дэманстравала ўсе прыкметы, характэрныя для пачатку цяжарнасці: у яе знік апетыт, яна стала менш рухацца. Спецыялісты заўважылі нават змены гарманальнага фону. Аднак абследаванне паказала, што насамрэч панда не чакае малых.
Біёлагі адзначаюць, што прытворныя цяжарнасці здараюцца ў пандаў і ў дзікай прыродзе. Але ў няволі жывёлы пачынаюць дэманстраваць характэрныя паводзіны, заўважыўшы, што будучыя мамы знаходзяцца на асаблівым становішчы. Цяжарных самак у гадавальніку пераводзяць з агульных вальераў у асобнае памяшканне з кандыцыянерам. Яны атрымліваюць больш садавіны, булачак і бамбуку. Хітрыя панды разумеюць гэта і спрабуюць палепшыць якасць свайго жыцця.
Пасля таго як хітрасць Ай Хін выкрылі, ёй прыйшлося вярнуцца ў агульны вальер.
Павел РУСАК, «Мінск—Навіны».
Канцэрт для дзяцей і моладзі, пластычны спектакль Ягора Дружыніна і «Рок-панарама».