Нашы продкі былі перакананы ў тым, што дадзенае чалавеку пры нараджэнні імя (а ў дадатак імя па бацьку, якое абазначае сувязь з родам, з Бацькаўшчынай наогул) шмат у чым вызначае яго лёс. Ва Украіне казалі: «Прыбяры пня, дай яму імя — будзе з яго чалавек!»
1
Забаранялася ў адной сям'і зваць адным і тым жа іменем трох чалавек, каб не «наклікаць» заўчасную смерць на дзіця ці на яго аднайменнага сваяка: «Адзін звядзе другога са свету».
2
Калі ў родзе часта паміралі малымі дзеці, імкнуліся «ўратаваць» наступнае дзіця. Дзеля гэтага, напрыклад, нованароджанаму давалі імя Адам ці Ева (у гонар першых бацькоў чалавецтва) або нават імёны бацькоў, «вяртаючы» ім нядобрую «эстафету», каб захаваць прадаўжальніка роду.
3
Каб наканаваць немаўляці доўгае жыццё, часам яму давалі імя самага старога чалавека ў акрузе — доўгажыхара.
4
Як верылі на Палессі (Столінскі раён Брэсцкай вобласці), уласцівасцю падаўжаць жыццё дзіцяці валодалі незвычайныя, рэдкія або старадаўнія імёны. Часам яшчэ да зачацця дзіцяці бацькі ўзгадвалі і перабіралі такія даўнія імёны: Яўхім, Яўхім'я, Гардзей...
5
З гэтай жа мэтай пры хрышчэнні дзіцяці часта давалі імя моцных святых-абаронцаў: Мікалая, Андрэя, Марыі.
6
Па славянскіх традыцыях, для абароны немаўляці, якое нарадзілася слабым, звярталіся да выбару імя так званага «першага сустрэчнага», якога таксама запрашалі і пахрысціць гэтае дзіця.
7
Двайнятам імкнуліся даць сугучныя (падобныя) імёны, бо лічылася, што ў іх і лёс падобны.
Аксана КАТОВІЧ, Янка КРУК.
Мерапрыемства праводзіцца на добраахвотнай аснове.
Не выявіць ні секунды абыякавасці.