Рабочую групу для ажыццяўлення комплекснага аналізу сістэмы адукацыі ўзначаліў намеснік прэм'ер-міністра Анатоль ТОЗІК. У яе склад увайшлі вучоныя-практыкі, кіраўнікі ўстаноў адукацыі, прадстаўнікі рэспубліканскіх і мясцовых органаў дзяржаўнага кіравання.
— Нам трэба з удзелам грамадскасці, педагагічных калектываў, бацькоў правесці комплекснае і ўсебаковае вывучэнне ўсіх звёнаў адукацыйнай сістэмы, выявіць праблемныя пытанні і вызначыць шляхі іх вырашэння, — падкрэсліў Анатоль Тозік у сваім выступленні на арганізацыйным пасяджэнні рабочай групы.
Па словах віцэ-прэм'ера, выпрацаваныя рабочай групай прапановы будуць улічаны пры дапрацоўцы Кодэкса Рэспублікі Беларусь аб адукацыі. Гэта дазволіць стварыць прававое поле для ўдасканалення сістэмы адукацыі на бягучым этапе і на перспектыву.
Анатоль Тозік зазначыў, што ўвагі патрабуюць пытанні эфектыўнага інтэлектуальнага і фізічнага развіцця навучэнцаў, працоўнага выхавання дзяцей, фарміравання прыкладнога практыка-арыентаванага зместу адукацыі на ўсіх узроўнях падрыхтоўкі.
У рамках рабочай групы ён прапанаваў таксама абмеркаваць эфектыўнасць падрыхтоўкі педагагічных кадраў і павышэння прэстыжу іх працы, пераход на нарматыўнае фінансаванне ва ўстановах агульнай сярэдняй адукацыі, пераемнасць у атрыманні адукацыі на розных узроўнях, развіццё прыватна-дзяржаўнага партнёрства і іншыя пытанні.
Прапановы па пытаннях развіцця і ўдасканалення адукацыі можна накіроўваць на спецыяльны паштовы адрас урада Рэспублікі Беларусь оbrazovanіe@government.by і на Нацыянальны адукацыйны партал www.adu.by (раздзел «Інфалінія»).
Надзея НІКАЛАЕВА
Мерапрыемства праводзіцца на добраахвотнай аснове.
Не выявіць ні секунды абыякавасці.