«Звязда» некалі была любімай газетай майго бацькі, які даўно пайшоў з жыцця. Ён нам, сваім дзецям, казаў: «Гэта наша газета. Хочаш ведаць праўду — чытай «Звязду». Яна існавала і ў гады вайны, дзе б ні прыходзілася быць рэдакцыі». Пасля смерці бацькі некаторы час і я працягвала выпісваць гэтае выданне... І вось нядаўна я зноў «прайшлася» па падшыўках любімай газеты. І тут мне трапіла на вочы невялічкая публікацыя Кацярыны Сосны: «Хірург гатовы аддаць душу за кожнага хворага» (16 ліпеня 2013 года. — Рэд.). Такім даўнім, такім мінулым павеяла на мяне з гэтай публікацыі. Я з галавой акунулася ў сваю далёкую маладосць пяцідзясятых гадоў мінулага стагоддзя...
18-гадовай дзяўчынкай, па накіраванні, я прыехала працаваць медыцынскай сястрой у Шаркаўшчынскі раён. Мне казалі «Вось пападзешся Забродскаму, за любую памылку ён з цябе скуру зніме». З якім страхам я ўваходзіла ў кабінет галоўнага ўрача, не расказаць. А сустрэў мяне чалавек сярэдняга ўзросту з зычлівым поглядам: мабыць, разумеў мой душэўны стан. Ён прапанаваў мне на выбар аддзяленні, распытаў пра бацькоў, як жылі падчас вайны, якія цяпер умовы жыцця. З кабінета я ўжо не выходзіла, а нібы на крылах узнімалася.
Вопыту ніякага, дзяўчына вясковая, як цяпер кажуць, «з комплексамі» — але падтрымку адчувала ва ўсім. Толькі такі чалавек, як Васіль Усцінавіч, мог спаяць выдатны калектыў. Ён быў добрай душы чалавекам, яго ўсе паважалі і крыху пабойваліся. Іначай быць не магло. Не хапала медыкаментаў, інструментарыя, дэзраствораў, перавязачнага матэрыялу. Ды і электрасвятло давалі толькі да гадзіны ночы. Таму пры патрэбе выклікалі сантэхніка, ён рухавічком даваў святло. Вось і ўявіце сабе: каб пераліць хворым кроў ці іншыя растворы, з флакона іх пералівалі ў прымітыўную кропельніцу: высокая прадаўгаватая колба, да яе прывязвалася круглая доўгая гумка (дыяметрам у 1 см), да яе прымацоўвалася іголка, вось так і падключалася да хворага — ці ў вену, ці пад скуру. І пры гэтым ніякага нагнаення, ніводнай унутрыбальнічнай інфекцыі. Так што без жорсткасці Васілю Усцінавічу працаваць было немагчыма. Бо ўсе тыя прымітыўныя «прычындалы» стэрылізаваліся кіпячэннем. Пра аднаразовыя шпрыцы мы і не ведалі.
Яшчэ ў тыя гады па лясах хаваліся дэзерціры і бандыты, якіх часта падстрэльвалі, а потым лячылі. Начамі іх выкрадалі хаўруснікі, бальніца ж знаходзілася наводшыбе, і нашаму доктару прыходзілася хадзіць на працу з аўтаматам. А падчас вайны ў беларускія лясы доктар Забродскі быў закінуты парашутам з Вялікай Зямлі.
Ужо мала нас засталося ў жывых, хто працаваў з Васілём Усцінавічам. Першай старшай медсястры, якая пачынала з ім працаваць, хутка споўніцца 90 гадоў. Яна плакала, калі я распавядала Марыі Георгіеўне Царыкавай пра публікацыю ў «Ігуменскім тракце».
Ёсць яшчэ некалькі былых медработнікаў, хто добра ведаў і працаваў з Забродскім. І мы, жывыя, нізка, да зямлі кланяемся Кацярыне Сосне, жанчыне, якая нарадзілася ўжо ў мірны час, за тое, што яна выбрала менавіта гэтую тэму. Аповеды пра такіх людзей, як Васіль Усцінавіч, павінны перадавацца з пакалення ў пакаленне. Мы ж ведаем пра Бехцерава, пра Пірагова, пра Луку Война-Ясянецкага, пра Дзяніса Давыдава і шмат іншых.
Калі пра публікацыю даведаліся іншыя жыхары нашага краю, то многія гаварылі і ўспаміналі: то ён лячыў чыюсьці бабулю ці маці, дзетак.
А ведаеце, калі ноччу рабіліся аперацыі, то прыходзілася дзвюм санітаркам трымаць у кожнай руцэ па газніцы, а Васіль Усцінавіч пры такім святле і працаваў. У яго была добрая памочніца — яго жонка, аперацыйная медсястра Бася Сямёнаўна, якая ўсю вайну прайшла, працуючы ў ваенных шпіталях. Аднойчы быў такі выпадак. Даюць такое святло дзве санітаркі, і адну кудысьці доктар адсылае. Што здарылася з той, каторая засталася падаваць святло: ці задрамала, ці то рукі адмовілі, толькі яна добра грымнулася назад, аб падлогу. І газа разлілася, і шкло разбілася, а на стале хворы з разрэзаным жыватом, які вось-вось прачнецца, адыдзе ад наркозу. А колькі яшчэ было такіх гісторый!..
Надзея Паляк
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.